Tu tiangah CNF/A nih lih lawng te an Chim rih ko Vanlawng Kahnak zong USA leiin tam ngaingai kan bawm cang ko!!

CNF/A nih lih lawng te an Chim rih ko!! (Catialtu Din Ho)
==============
CNF/A 2021 lio ah CBC USA nih a bawmhmi phaisa$1900000a si cun 2022 lio in tu tiang US khrihfa bu ka dangdang lei in an bawmh mi phaisa vialte cu $1500000000 an si cun Vaurruang nih Tlangau nak ah $9700000 hrawng a si cucu tu tiang CNF/A nih lih lawng te an Chim rih ko Vanlawng Kahnak zong USA lei in tam ngaingai kan bawm cang ko Tutiang zei Thawng hmeh thei a si lo ngeichiat ngai si kum chiar te Mipi nih ram le Miphun dawt nak in an pek mi phaisa cu a kal nak hmun hmeh thei a si tawn lo. Crd- Din Ho

Thaketa Ah Siangniamrun Siangakchia 49 Nih Cia-zan An I Eisual, Yangon ramṭhen, Thaketa peng no.29 siangniamrun ah November 2 ah siangakchia 49 nih ciazaam an i eisual tiah theih a si.

Thaketa peng no.10/ chaklei sang ah ummi no.29 siangniamrun sianginn ah chuahcamtuak a phanmi hna nih an hlutmi cia-zan an ei hnu ah, cu cia-zan a eitu ngakchia paoh an lungmit, an luak an luak i ngakchia 17 cu sizung tiang an kalpi hna tiah tualchung mi hna nih an chim.

No.29, siangniamrun ah hlutmi chungin an ei thlu lo mi cu sangchung ummi ngakchia an pek ve hna caah, sangchung mi minung 3 zong sizung ah kan kuatchih hna tiah mi bawmchantu phu an motor khaltu nih a chim tiah theih a si.

Rakhine Ramkulh Thandwe Ah SAC Ralkap Bomb Puahhnawh An Tong, Ralkap 13 An Thi, Rakhine ramkulh, Thandwe(သံတွဲ) peng le Taungkauk peng kar Thetkepin(သက်ကေပြင်) khua pawng Thadwe-Yangon motor lampi ah rallam a sialmi SAC ralkap cu nizan November 1 zinglei ah AA nih bomb an puahhnawh hna caah SAC ralkap 13 an thi, tiah theih a si.

SAC ralkap 30 hrawng cu ke in rallam an sial i, Taungkauk peng in an chuak i Thetkepin le Ywapakar(ရွာပကာ) khua karah bomb in kan puahhnawh hna caah ralkap 13 an thih hi a si, tiah theih a si. SAC ralkap bomb puahhnawh an ton ruangah pawngkam khuate um cheukhat cu an zam. SAC ralkap pawl cu khuate ah an lut i khuami cheukhat zong an tlaih hna i bia an hal hna, tiah min langhter a duh lomi pakhat nih a chim.

A luancia October 26- 31 tiang AA le SAC ralkap kar kahdohnak ah AA nih SAC ralkap 24 kan thah hna pinah 26 nak tlawm lo hlaimhma an pu, tiah nizan November 1 ah AA nih cathanh an chuah tiah theih a si.

Assam Rifles Nih Myanmar Rammi 4 An Tlaih Hna, India, Mizoram ramkulh, Siaha pengkomh Tuipan khuapawng ah Assam rifles nih myanmar mi 4 cu Kenbo 125 cycle pakhat le hriamthil he ai pehtlaimi thilri he October 30 ah kan tlaih hna tiah cathanh an chuah.

A luancia October 26 ni zong ah Siaha pengkomh Niawhtlang khua pawng Myanmar ramri ah Kenbo cycle he hriamthil a phurtu Myanmar rammi 4 cu Assam rifles nih an rak tlaih bal cang hna.

Yangon Ah A Ummi Min Aung Hlaing Le Soe Win Inn A Hngaktu SAC Ralkap Check Gate Kah An Tong, Nawlngeihnak latu Min Aung Hlaing le Soe Win an inn a umnak Yangon, Inya lam ah humhimnak a latu SAC ralkap check gate cu a luancia October 31 zan ah kah an ton caah cuka hmun kiangkap cu motor luhchuak khawh a ngah ti lo, tiah palik he naihniam in a ummi hna sinin theih a si.

“Kah an tonnak gate hi Min Aung Hlaing le Soe Win an inn hngahnak ca ah biapi in an hmanmi gate pakhat a si i nizan November 1 thawk in zan sml 8:00 thok in lam kham dih ding ah SAC nih nawl an chuah,” tiah Khit Thit Media nih an langhter.

Min Aung Hlaing le Soe Win an inn umnak Inya lam le Pyi lam thluan vialte cu SAC ralkap nih an congh dih ko nain October 31 zan ah motor in check gate hngak SAC ralkap a kaptu motor an tlaih khawh lo ruangah anmah ralkap le palik lila checkhlatnak an tuah hna, tiah theih a si.

Kahdohnak A Chuak Sual Lai Ti An Phan Caah Paletwa Peng Khuate Pathum Um Mipi An Zam Dih , Chin ramkulh, Paletwa peng ah AA le SAC ralkap kar kahdohnak a zual ngaingai caah Paletwa peng khuate 3 um khuami hna cu an zam dih, tiah mi bawmchantu pastor pakhat nih a chim.

“Zeitik ah dah kahdohnak a chuah lai ti chim khawh a si lo. A zammi khua 3 hna cu AA ralkap le SAC ralkap an umnak he naih teah a ummi an si caah a hlan kan in an zam chungnak a si,” tiah a chim chap. Tharyarkone, Kyaukpala le Sattharlawa(ဆပ်သာလ၀) khuami inn 90 hna cu Miza khua ah an zam i milu in 350 leng an si.

Church min in kan kuatmi hna hi kyats sing 10 hrawng lawng a si. Chungkhar an tam caah an i za lo, a tlawm bik sing 100 leng paoh cu a hau lai, tiah pastor pakhat nih a chim. Paletwa peng ah AA le SAC ralkap kahdohnak a chuah ṭhan caah tualchung mi hna cu Paletwa khua chungah a zammi zong an um. Ralhrial in Paletwa khua chungah aa dormi hi 5,000 leng an si cang, tiah theih a si.

SAC Ralkap Nih Khualtlawng Mi An Dirter Hna I, An Cycle Ah An Phone Battery An Tun Hnuah An Kalter Hna, Chin ramkulh, Hakha Cawbuk sang check gate hngak SAC ralkap nih khualtlawng mi hna cu an dirter hna i, anmah an phone battery an tun hnuah an kalter hna, tiah theih a si. Crd-The Chin Post

Khualtlawng mi pakhat nih, “Ka pi a dam lo ruangah Hakha ah kan kalpi i cawbuk check gate kan phak ah ralkap nih sentari an cawnghnak buk tiang rak kai u an kan ti caah kan kai, sau nawn an kan hren hnuah kan lan kho ṭhan,” tiah a chim.

“Kan phone an kan check hnuah khoika in dah nan rat tiah an kan hal. Nan cycle ah ah kan phone battery kan i tun ta lai an kan ti i, an i tun ko. Minutes 15-20 chung hrawng an i tun hnuah kal cang ko u an kan ti i an kan thlah,” tiah khualtlawng mi pakhat nih The Chin Post ah a chim.

Hakha mei a rawh ruang ah a si lai, ralkap zong phone battery an ngei ve lo, an van a sang ngaingai. Ka pi dam lo ruangah hnawhnam ngai in Hakha kan kalpi i, atu bantukin harnak an kan pek i kan cycle ah an phone battery an i tunmi hi cu a poi ngaingai ko, tiah a chim chap.

Cun Cawbuk check gate hngak SAC ralkap le palik nih khualtlawng mi cheukhat cu zu cawkpiak ding in Hakha lei ah an kirter tawn hna, tiah theih a si. Zu cawkter a tongmi pakhat nih, “Khua lei kal ding in kai thawh i check gate hngak ralkap nih zu cawkpiak ding in zu dawr ah an ka kalter caah ka khuallam zong kai i tinh ning in ka phan kho ti lo. Ka cawkmi zu zong ding ve an kan ti ko nain ka duh lo,” tiah tiah The Chin Post ah a chim.

Hakha Ah Ni 13 Chung Mei A Rawh Caah Meilul (Phazawngdan) Le Meihol A Dih Cang , Chin ramkulh, Hakha ah mei a rawknak ni 13 a si cang i, meilul (pha zawng dan) le meihol a dih cang, tiah theih a si. Hakha dawr kip ah meilul kan kawl i cawk awk a um ti lo, an rak cawk dih cang. Hakha dawr ngan bik Pearl Store zong ah a um ti lo. A man zong a kai ngaingai i minung pakhat nih voikhat cawk ah bawm tam pipi in an cawk, tiah theih a si.

Mei hi caan sau nawn a rawk rih kho menmi a si tiah thawngpang a len caah cheukhat cu solar le battery an i cawk cio hna. Mi sifak deuh nih meilul bawm khat hnih te kan i cawk i, cu hmanh cu a dih cang. Meihol cawknak chinchin cu a har ngaingai ko, tiah tualchung mi pakhat nih a chim.

Hakha ah Kawl leiin a ra mi meihol tunkhat ah kyats 15,000 le Lai meihol a tlawm bik kyats 18,000 a phan nain cawk ding a um ti lo. Meilul hi bawm khat ah kyats 1,500 in 2,000 kar a phan, tiah theih a si.Crd-The Chin Post