TNLA Hriamtlai Phu Hna Cu Khuachung Tiang An Luh Cang!

Namh Kham Khuapi Chung Bazar Ah TNLA Phu An Rak Luh Caah Bazar Khar Hratin Mipi An Zaam!
=========
Shan ramkulh chaklei Namh Kham khuapi chungum bazar ah TNLA phu an rak luh caah bazar kaitu hna cu thinphang thlalau in dawr khar hratin an tli/an zaam tiah khuami nih an chim. Namh Kham khuapi chung bazar ah zinglei sml 7:00 hrawngah minung 70 hrawng a ummi TNLA phu an rak luh ruangah bazar khar hratin an tlizamnak kong cu khuami pakhat nih a chim.

“Bazar chungah an phu ningin an rak luh tikah thinphang thlalau in bazar khar hratin tlik/zaam a si. Minung 70 tluk an um. Cheukhat cu dawr khar hratin dawr chungah an i thup nain cheukhat cu an tli/an zaam tiah” a chim. Bazar chungah a rak luttu TNLA phu hna nih anmah umnak address cu phawt hratin phais an hal tiah cheukhat Media nih an tial nain cu kong he pehtlai in fehter awk a tha lo.

Cupinah nawlngeihnak latu SAC ralhrang le TNLA phu karlak ah kahdohnak a chuak sual lai timi khuami nih thinphang in an um hna caah cheukhat cu zaam dingin an i timhtuah tiah theih a si. TNLA chungtel pahnih cu January (4) ah khan Namh Kham bazar ah phaisa hal dingin an rat lioah kahdohnak chuak in an thih caah January (5) ah khan Namh Kham khuapi chungah TNLA phu an rak luh than i, SAC ralhrang ralkap he fak taktakin an i kap.

Mindat-Matupi Kahdohnak Ah SAC Ralhrang Ralkap Nih Hriamngan Vawi (50) Nak Tam An Kah! Chin ramkulh Matupi khuapi chungin Mindat khuapi leikap ah a rak i thialmi nawlngeihnak latu SAC ralhrang ralkap le Mindat CDF hna cu meng 20 nak zawnah Febuary 4 ah zanlei sml 2:00-3:30 tiang kahdohnak a chuak tiah Mindat peng chung ပအဖ phu nih cathanh an chuah.

Nawlngeihnak latu SAC ralhrang ralkap nih hriamnam phun tling telh in kuanfang nih a pemh kho lomi motor hmangin vawi (50) nak tam an kan kah pinah Mindat khuapi chungah a ummi 274 Battalion sakhan zongin moter kuanfang hna hmangin an kan kah ve.

Tutan kahdohnak ah bomb nih a hliammi telh in (7) an thi hna i, Mindat-CDF leikap ah hliam tuarmi umloin kan i zukphiak kho. SAC ralhrang ralkap hna cu meng 18 zawnah an um lio tiah Mindat peng chung mipi hruaitu phu ပအဖ nih cathanh an chuahmi ahcun an langhter chih.

Febuary 2 thawkin ni (3) chung pehzulh in kahdohnak a chuak i, nawlngeihnak latu SAC ralhrang ralkap (an thih pinah M-3 meithal pakhat zong chuh an si tiah cathanh an chuahmi ahcun an langhter chih. Credit: The Federal Times

Kahdohnak Tuahtu Vialte Nih NUG Cozah He Riantuanti Dingin KIO Chairman Nih Forh! Hramhram uknak le uktu kahdohnak a tuahtu dihlak nih NUG cozah he pehtalihnak tuah dih dingin KIO chairman nih a forh. KIO kum 61 tlinnak philhlonak ni an tuahnak ahcun Bogyokegyi nih atu bantukin a forh tiah The 74 Media nih a langhter.

“Nihin ah ram a dawtu le miphun a dawtu hna nih hriamnam i tlaih in hramhram uknak le uktu kahdohnak a tuahtu phu dihlak sinah biacah ka duh. Nan dihlak pasaltha nan si. Kan lawmhpi tuk hna. Sihmanhsehlaw nan dihlak min a phunphun i bunh hratin nan tuah awk a si lo. Hramhram uknak le uktu kahdohnak a tuahtu paohpaoh nih NUG cozah he pehtlainak tuah in tuanti a herh.

Cuti a si lo ahcun hmailei caan ah a herh loin buainak a chuak khomi a si ti hi philh lo ah a tha” tiah Bogyokegyi nih a chim. Hramhram uknak le uktu cu “an hrampi in a thengnge tiang” hrawh dih, phonh dih dingin ramchung hriamtlaitu hna dihlak nih timhmi pakhat tangah tuanti a herh tiah a chim chih.

A donghnak ah a chim rihmi cu ramchung buainak a chuah lioah eidin leiah harsatnak umloin khimkham tein i zuam cio a herh i, mah pumpak hlawtnak le miaknak hna hi kawl lo ding a biapi tuk. Mah pumpak hlawtnak le miaknak kawl in thutnak karcehmi si lo ding a biapi tuk tiah The 74 Media nih a langhter.

KIO/KIA he raltuk, ramkhel ah tangrualṭi ding in timhcia kan si: AA, TNLA le MNDAA. Arakan Army (AA), Ta’ang National Liberation Army (TNLA) le Myanmar National Democratic Alliance Army (MNDAA) phufonh nih Kachin Independence Organization/Army (KIO/A) he ramkhel lei siseh, raltuknak lei siseh rianṭuanṭnak kan ngei cang lai, timh cia kan si tiah a voi 61 nak Kachin dohthlennak ni ah kuatmi conglawmhnak cakuat ah an ṭial.

Ramkomh Kawlram chungah namnehnak a tongmi miphun hna hi miphun tlukruannak, mah tein khuakhan lairelnak, mah tein biakkhiah khawhnak, miphun he pehtlai in kan sunghnak le mah le miphun hna nih kan ngeihmi kan innlo le sui ngun chawva pawl humhminnak caah hriamtlaih in dothlennak kan tuahnak a si tiah thlanglei hriamtlai phufonh a simi (Northern Alliance) nih Kachin miphun dothlennak ni cu Kachin miphun tluk tein man kan ngeihter tiah cakuat chungah an telh chih.

AA le TNLA cu KIO/A nih hrinmi kan si bantukin KIO/A cu ramkhel lei, raltuknak lei zongah hawikomhmi phu an si i limhang ṭha tein a ngeinmi phu a si. Kachin ram le Kachin miphun hna cungah lunglawmhnak tampi kan ngei tiah thawng an thanh.

Hi Northern Alliance phu 4 hna cu a hlan lio tein ramkhel lei, raltuknak lei zongah lungrual tein a ṭangṭmi kan si bantukin a tulio ramkhel lei le raltuknak lei zongah ṭangṭi dingin timh cia kan si ko tiah phu thum fonh nih cathanh in an langhter.

KIA/KIO Kum 61 Tlin Ni ah CNF nih Lawmhnak Roca a Kuat. KIA/KIO nih ralhriam tlaih in Kachin miphun luatnak ca ah ral an dohnak kum 61 a tlin ni nihin February 5 ah Chin National Front (CNF) zong nih lunglawmhnak roca a ttial.
“Federal Democracy rampi kan dirh khawh nakhnga KIA/KIO he hmun khat te ah ral kan do tti lai,” tiah CNF nih an langhter.

“Jerimiah Sinah Pathian Nih Bia A Chim Mi A Um. By- Rev. M.Thawng Kam! Pathian nih “Jerimiah sin i bia a chim mi ahcun,”Mi he tlik nan izuam i na baat ahcun zeitindah Rangtum he cun nan izuam khawh kun lai? A fawinak ram i na rilh ko ahcun zeitindah Jordan kuam thuk ah nai tuah lai, a rak ti. Pathian hmanh nih cu ti cun a rak ti.

A tu kan ram thlennak ding kong ah hin, Kan ba cang kan ti ahcun, kan dih, cucaah a liam cang mi caan kha a sautuk kan ti i a ra lai mi caan kha kan celh lo kan ti ahcun kan dih, a sinain a liamcia mi kan caan vialte kha kan hram a si ti ruat in, teinak a naituk cang mi hi hrial lo in ttan laak chin hi a hau ko.

Kan Pasalttha/Ralttha hna an biapit bantuk te in,an hnu i a um mi/a dirmi, ram chung ram leng i a um mi hi kan biapi dih, kanmah miphun ca telawng hmanh a si loh, Kawlram pumpi thlennak ding caah hin kan biapituk ve ti i hngalh bu te i nan cawlcangh mi hi, “Pathian nih an theih piak ko hna ti kha lunghring lo te in chim ka duh ko.

Nannganzi tibantuk menmen a si loh, ram pumpi thlennak ding, dothlennak ding a si. Nun peek caan a si i, hi caan i ai tel kho na si mi hi i uan awk a si. Thih kan duhloh, hliam kan duhloh, pum tlinglo siding kan in siang bak hna loh, sihmanhselaw hrial awk ttha lo mi thil a si. Nung na pum tlinglo kan si peng ding duhlo ruangah nan tuah mi thil a si le, tthawng ko uh ti kha ka fawrh duh ko hna. Kan thinlung in thlacamnak he kan in dirpi ko hna, kailawm, a ti.

Kan Cawk Ding Mi Tthum Deuh Usih Thawh Ko Rih Hna Usih. Kan ram kong he pehtlai in, Rev. Dr. Cung Lian Hup, nih a chim mi hi a ttha hringhran ko, mi fiim bia hi cu a tawi ko zong ah saupi ngeih khawh a si, a tawi ko zong ah tampi a ttuan khawh mi a si, a tawi ko zongah, rian a ttuan kho taktak mi a si an ti tawn mi hi a dik hringhran ko.

Rev. Dr. Cung Lian Hup, nih a chim mi cu, “Kan nih Khrihfabu nih CDF caah tiin bawmhnak kan peek ko hna, cu kan peek mi hna cu facang theng cu maw an cawk hnga? kan peek cang hna i, cu kan peek cang mi hna cu a herh an tinak ah an hman ko lai, hriamnaam cawknak tiin kan bawmh mi hna cu a si ruam loh, nain, an mah nih an herh mi cawknak caah an hman ko lai. Pastors zong nih hriamnam, mi thahnak caah mi kan bawmh hna ti a si lo i, kan i vennak caah kan thawh ti khi kan kalpi ning tu a si deuh.

A chim peh tthan mi cu,”ICBM ka ttuan lio ah hin khual ka tlawng tam ngaingai i, cu ahcun ka hmuh khawh mi chung in pahat cu, nu pawl nih hin an i fenh ding mi zuun 30 renglo tiangin hni an ngei hna. Cu vialte hni an ngeih mi cu an i fenh cawk hrimhrim lo, Pathian nih le zarh ttha zongah an i fenh cawk lo ti mi hi a fiang mi a si. Cutluk in hni an ngei ko nain a thar an i cah tthiamthiam hna i an duh tthiamthiam ko rih.

Cubantuk in kan mino hna zong nih phone ttha cawk kha kan i timh rihlo a ttha, nu zong nih thil puan kan i cawk rih lo ah a ttha i, cu kan i cawk ding mi tangka cun a tulio kan dothlennak caah hin kan hman hi a bia pi khun. Cubantuk in kan cawk ding mi kan i thumh ahcun teinak lam ah kan luut kho ko lai, a ti. Credit: Pu Tin Duh Thang