Tlanglo ah a riak mi Ralkap Tio ah tum than an i tim tiah khuami sin in thawng theih

Tlanglo ah a riak mi Ralkap Tio ah tum than an i tim tiah khuami sin in thawng theih
———————————————————————————-
Nizaan March 10 ah CNF Camp Victoria ah a kal mi Ralkap cu zahan Tlanglo khua ah an riak i nihin ah Tio ah tum than an i tim tiah khuami sin in thawng kan theih. Hi kong he pehtlai in Tlanglo, Tlangpi khua upa nih “Zahan Tlanglo ah a riak mi Ralkap kha atu hi Tio ah tum than an i tim tiin kan zumh hna. An cawlcangh le an i ceih ning kan zoh hna ah tum than an i tim tiah kan ruah ko.,” tiah The Hakha Times ah March 11 chun 10:45 ah a chim.

“Tuzing tiang kha cu CNA lei in tuanvo ngei pahnih nih an umpi hna nain anmah zong tuzing ah an tum cang. Thil sining kan fiang lo nain khuami cu ramleng chuak lo ding le ralring ding in kan chimh hna. A zeimaw cu motorcycle in Thantlang leiah a van zaam mi zong an um hna,” tiah a chimchap. Hi kong he pehtlai in CNF/CNA tuanvo ngeitu kan van pehtlai kho rih hna lo. Thawng fiang deuh pehzulh in thanh than khawh kan van i zuam lai.

Relchap ding nizan thawngpang, Ralkap le CNF/CNA Camp Victoria ah an i tong. Ralkap le CNF/CNA upa cheukhat cu nihin March 10 ah Camp Victoria ah an i tong tiah thawng kan theih. Hi an i tonnak kong he pehtlai in CNF in Dr. Sui Khar nih “An ra ko. Hihi voi dang an rak kan tlawn bal bantuk kha a si ko. Kan i tonnak zong a tluang, tlam a tling ko,” tiah The Hakha Times ah a chim. Ralkap a ra mi pawl kong he pehtlai in “Ralkap lei hi bus le motor dang le motorcycle in an ra i minung 33 hrawng an si. Ralkap an si bantuk in an hriamnam he an si. An hruaitu hi Major nih a van hruai hna. Atu hi Ralkap cu Camp Victoria pawng Tlanglo khua ah zaan an riak,” tiah khuami sin in thawng kan theih.

Nihin ah Ralkap nih CNF/CNA hmun Camp Victoria ah va lut in an i ton mi cu, Ralkap nih Cozah uknak nawlngeihnak a chuh ruang ah rammi nih duhlonak an langhter i rammi le Ralkap, Palek karah buainak faktuk kan ton lio a si ca ah hi an i ton mi kong ah khuami le rammi kan lungre a thei ngai tiah kiangkap khuami sin in kan theih. Hi an i tonnak ah zei kong dah an i ceih ti cu a chung thil le kap hnih ralkap thil a si ca ah zapi nih theih awk a tha rih lo mi a si. Cucaah a hnu ah pehzulh in thawng thanh khawh kan van i zuam lai. Credit: The Hakha Times