Video : June 2 Timit Kahdohnak lio ah Chin ralkap hna nih SAC Jet Fighter an kah lio video.
Kan theih cio bantuk in SAC ralkap pawl cu Thantlang le Victoria base lei an panh caah fak ngai in Timit ah kahdohnak an tuah i, Hakha in Hriamngam a tomtom an kah pinah cunglei in fighter nih a bawmh hna. Nihin June 3 tiang zong ah Jet Fighter in bomb an thlak rih.
Timit Kahdohnak ah hin Chin ralkap 12 nih nunnak an pek i, SAC lei in ralkap 27 an thi ve. “Ralhrang pawl hi Victoria base lei panh in an ra nain an kan nam kho lai lo,” tiah CNA chimphuan nawlngeitu Salai Htet Ni nih cun a chim.
https://fb.watch/kWZLiwMfpq/
India Ram Tlawnglawng Canghsualnak Ruangah Minung 280 Leng Nunnak Liam! India ram, Odisha ramkulh, Balasore district ah nizan June 2 zaanlei suimilam 7 hrawng ah khan tlanglawng canghsualnak a chuak i minung 280 leng an nunnak a liam pinah 900 tluk hliamhma an pu, nunnak a liam mi hi an karh kho, tiah ṭuanvo ngeitu hna nih an chim. Media cheukhat nih cun nunnak a liammi hi 300 an phan cang, tiah an langhter.
Khualtlawng tlanglawng pakhat cu lam ping ah kal sual in, tlanglawng lam cung ah a ummi khualtlawng tlanglawng dang pakhat le thilri phortu tlanglawng cu a pah hna ruangah fak ngai in tlanglawng cu an rawk i, minung 200 leng an thih colh pinah minung 900 leng hliam an pu. Hi canghsualnak ahhin Bengaluru-Howrah Superfast khualtlawng tlanglawng, Shalimar-Chennai khualtlawng tlanglawng le thilri phor tlanglawng pakhat hna an i tel, tiah India media hna nih an ṭial.
Tlanglawng canghsualnak a cannak hmun ahhin bawmchantu hna nih an zuanhnawh hna i, siibawi 30, palik 200 le ambulance 60 kan fial hna, tiah Odisha Chief Secretary nih a chim. Tutan tlanglawng canghsualnak hi India ram tuanbia ah kum 20 chung i a cangmi chiattonnak ngan bik pakhat a si, tiah railway minister nih a chim i, tlanglawng canghsualnak kong hlathlai ding in Investigation Team zong dirh a si lai, tiah a chim chap. Credite; The Chin Post