Tidim Ah Thah A Tongtu Ukbawi Cu Bo Let Hla Shew Tupa A Si!
Tidim Ah Thah A Tongtu Ukbawi Cu Bo Let Hla Shew Tupa A Si!
=======
April (6) ah meithal in kah thah a tongtu Chin ramkulh Tidim khuapi ukbawi U Kyi Min Htun kum 32 cu USDP party in Gangaw peng chungin hluattaw palai simi Bo Let Hla Shew tupa a si tiah theih a si.
Cupinah U Kyi Min Htun upa Aung Yi Ya zong SAC ralhrang ralkap a si. U Kyi Min Htun cu Maggui ramthen Pakukku chuakmi a si i, kum 2021 ah ralhrang ralkap nih nawlngeihnak an laak hnuin Maggui ramthen Saw peng in Tidim ah aa thial.
Tidim Ukbawi Cu Meithal In Kah A Tong! Chin ramkulh Tidim peng ukbawi Kyi Min Htun kum 36 cu April (6) zanlei sml 6:00 hrawngah bazar hmaiah meithal in kah a tong tiah theih a si.
A ruak zong ahohmanh nih an laak lo caah lampi cungah a um rih ko tiah theih a si. Zeibantuk phu nih an kah that timi a fiang rih lo. Amah hi Tidim ah a rak i thialnak hi kum (1) lengkai a si cang tiah theih a si.
Gangaw Mipi Hna Nih A Herh Loin Tlungkallo Dingin Mipi Hruaitu Phu Nih Ralrinnak Pek! Magway ramthen, Gangaw pengah SAC ralhrang ralkap kahdohnak ruangah Gangaw-Kalay lampi le Gangaw-Htilin lampi leikap ah a herh loin tlungkallo dingin Gangaw mipi hruaitu phu nih April (6) ah ralrin peknak cathanh an chuah.
Gangaw pengah March zarhthumnak thawk khan SAC ralhrang ralkap nih phu thum bakin kahdohnak tuah in ningcang loin mipi an tuahto hna caah atu bantukin ralrin peknak cathanh an chuah.
Matupi Ah Pastor (2) Nih Bomb An Lamhsual Caah Faktukin Hliam An Tuar! Chin ramkulh Matupi peng Yi Yua khuapi chungum sianginn campus chungah April (2) ah khan pastor (2) hna nih bomb an lamhsual caah faktukin hliam an tuar.
Bomb lamhsualtu pastor hna cu kum 37 simi pastor Myo Yu le kum 43 simi pastor Ting Za Lian hna an si.
Pastor Ting Za Lian cu a ke khattelei aa taan caah India ramchung Mizoram ah an thlop cuahmah lio. Anmah hi khua dangah an kal pah ah cu sianginn cu an zoh pah. Cu sianginn ahcun a hlan ah Matupi in a rami SAC ralhrang ralkap hna cu donh awkah a kalmi ralhrang phu umnak a si. Atu cu an tlung than dih cang. Anmah nih vawlei tangah an chiahmi bomb an lamhsualmi a si i, pakhat cu a ke pakhat aa taan tiah khuami pakhat nih a chim.
Cu bomb cu CDF nih vawlei tangah an phummi a si i, pastor (2) hliam an tuar pinah sianginn zong a rawk tiah SAC ralhrang nih cathanh an chuah. Asinain CDF Yi Yua nih cun cu bomb cu anmah ralhrang ralkap phummi a si tiah an chim. Cu bomb hna cu SAC ralhrang ralkap nih an phoih than ti lo caah khuami hna cu cuka pawngkam ah kal lo dingin CDF-Yi Yua nih ralrin peknak cathanh an chuah.
Sianginn Ah Umnak Sakhan Tuahtu SAC Ralhrang Ralkap Eidin Rak Chantu Motor Cu Bomb Kan Puah Hnawh Tiah PDF-Zoland Nih An Phuan! PDF Zoland nih Tidin khuapi အထက (၁) sianginn campus chungah umnak sakhan tuahtu nawlngeihnak latu SAC ralhrang ralkap le palek hna sinah April (5) ah eidin chan dingin a kalmi ralhrang ralkap motor cu kah dingin timhtuah a si.
Eidin chantu motor cu tlai deuh hnuah an rak phan hna i, tanghra cammipuai tuahtu ding siang ngakchia le CDM tuahlotu sayate rak phan caan a si ruangah anmah hna zawnruah in kah loin kan um than.
Cucaah mipi nih harnak nan ton nakhnga lo siseh SAC ralhrang ralkap hna cu thlerhkhawn phah in anmah motor he aa naih lo nakah bomb (2) puah hratin PDF Zoland leikap cu himnak hmunah an i zukphiak kho. Cu kong cu SAC ralhrang ralkap nih Tidim khuapi, အထက (၁) hnulei ah CDF minung pahnih nih motorcycle pakhat he rak ra hratin bomb (2) an puah hnawh tiah an langhter. Credit: The Federal Times