Thla ni 3 ah a kaangmi Thantlang Methodist biakinn a si!

Thla ni 3 ah a kaangmi Thantlang Methodist biakinn a si!
=========
Thla ni 3 ah a kaangmi Thantlang Methodist biakinn a si. Bawipa Pathian nih mah nak ttha in a kan pek lai. Lung cu a ttha ruam lo. Korean Methodist buu nih sakpiak mi a si.

Kawl ralkap tthat lonak tuah an thiamning hi cu theih cio a si ko. Atutan Thantlang khua an kan tuahto ning nih tthat lonak tuah an thiamning a langhter chin lengmang ko. Kum tamtuk hmuhtonnak zong an nei ve cang cu mu. Thantlang khua cu duhsah tein an kan khangh lengmang ko. A voikhat nak an khangh ah kan lung a fak tuk. Kan lungfah le kan lungrawk a dai cang kan van ti vial ah an khangh than hoi. A thar in kan lungrawknak a chuak than. A van dam vial ah an khangh tthan hoi. An kan zawtter lengmang ko.

Atu cu a voi 16nak an khangh cang. Voi 16 bak lungrawk le hngilh loin an kan tuah/kan ningzah vialte teh. Inn tamtuk a tang rih. Voi 16 bakte an kan zawtter/kan ngaih an kan chiatter/kan lung an kan rawkter. Hi hnu voi zeizat dah an khangh rih lai? tuak ngam a si lo. Cu nih a sawhmi cu hi hnu voi zeizat dah an kan zawttter rih lai ti he a lo.

Kawl ralkap pawl cu vawlei cung ram tthattha le ram rumrum University sianginn hna ah cawnnak a neimi an tamtuk i rak chei ding an si bak lo hi. Laimi degree (boih) laknak Kalay University, Monywa University, le Mandalay University tuktak nih cun rak chei ding an si lo. Hmurka lawng in zomhtaih le nehsawh le bia tthalo chim le serhsat le i hrocernak men cun vawlei cung sianginn thatha Russia ram hna ah a kaimi pawl cu rak tei ding an rak si bak rua lo hi.

Tamtuk chim nih tuahsernak a tlawmter tik ah teinak a um kho lo i annih cu tlawmte lawng an chim i tuahsernak tuk biapi ah an i thlak i kan tuar ngai ko hi. Tlawmte lawng chim ve uh sih law hmual nei ngai in tuahsernak langhter khawhnak ding lamtuk kawl ve hna uh sih a tha cang lai.

Mizoram le Assam state an buai lio ah Assam ralkap le palik pawl cu an tamtuk i an holh zong a tam i hehtiah an i hrocer len. Asinan Mizoram ralkap le palik cu an tlawmte nan dai tein an um i tuahsernak in an van langhter taktak ahcun Assam ralkap arfi zat cu ceilak in an phomh ko hna/an tei ko hna/an sung ko.

Thantlang inn kangh ti bantuk pawl hi ka mang le ka taksa nih a rak theih hmaisa tawn. Nizan zanlei cu a zaw deng bantuk in ka um, ka lungrethei tuk, ka chung sivang, ka lung a nuam lo. Ziah thla mah ti hin ka um hnga ka ti. Thilthalo ngaimi pakhat khat poah cu a um te lai/a chuak te lai ka ti.

Atu tiang ah inn a kaang cuahmah ko ti si. Atutan inn kangh zonghi zarhte zan ka mangah ka manh cang. Atu lawng a si lo, voidang inn kangh kong zong ah siseh, ral an i doh tawnnak kong zongah siseh ka mang ah ka rak manh cia lengmang i ka taksa umtu ning zongnih a theih. Nan si cio ko lai. Kawl pawl zong nih mah bantuk phun hi an zumh ngai ve.

Tahchunhnak ah Kawl video kan rak zoh tawnmi ah minta pa cu misual pawl nih an vuak maw siloah accident a tong ti bantuk pawl ah mintami nu nih kheng a putmi siloah hrai ti bantuk kha a thlak sual i a kuai dih ti bantuk a um theu. An mang zong in an manh tawn/an theih tawn, an ton dingmi thilthalo pawl cu.

Thla ni 3 ah Thantlang inn a kaang than. Thenkhat chimnak ah inn 4 hrawng si an ti. Cheukhat chimnak ah le inn 40/50 hrawng in an chim fawn. Thawngfiang theih a har lio a si ko nan inn zeizat setdah a kang timi le inn neitu min pawl van kan thanh zau uh law a tha hnga.

Inn Ka nei ve lo nan Thantlang cu Ka khua bantuk in Ka ruah caah a si. Kan buu Methodist biakinn a kang ve i ka lungtha lo ngai. Mah a kangh ding kong hi si lai ka ti tianzan ka mang a chia ngai. Credit: Saya Van Tum