“Thisen Man Sunglawi”
Thlarau Rawl “Thisen Man Sunglawi”
========
Minung kan nunnak ah biapi tukmi le a hrampi cu thisen a si. Kan takpum chung thisen lak dih ahcun thih a si ko. Cucaah thisen man cu a sunglawi tuk hringhran. Jesuh Khrih zong nih thisen in a kan tlanh.
1. January 8 cu Ecuador ram i Huaorani miphun hna nih American Christian missionary panga (Jim Elliot le hawile) cu 1956 kum ahkhan zaangfahnak ngei loin an rak thah hna ni a si. Tupi hmawng lakah saram bang, Sertu Pathian hngal loin a tlongmi mit a autertu, thong tampi nun a thlengtu cu Jim Elliot le a hawile pawl thisen kha a rak si.
2. Australia Christian Missionary, Graham Stuart Stainer le a chungkhar cu India ram Odisha ah Pathian riantuan dingin an rak kal. Zumlotu Hindu mibu nih Graham le a fapale pahnih cu January 22, 1999 kum ahkhan an nung bakin an rak khangh hna. Sihmanhsehlaw, Graham le a fale thisen nih cun mitcaw cu khua a hmuhter hna i zungzal thihnak chungin zungzal nunnak ah mi tampi lam a hruai hna. An thisen nih mipi thinlung ah biachim i mission tuan duhnak a ngeihter hna.
3. American Baptist Missionaries, Arthur E. Carson le a nupi Laura Carson hna Laitlang i an rak phanh hlan kha, Laimi cu thing le lung a biami kan rak si. March 15, 1899 ah Hakha an phanh i kum 5 hnu 1904 ah minung pakhat a rak hrinthar. 1908 kum ah Rev. Carson cu a thi i Hakha ah an rak vui. A chuah semnak, nuam tein chungkhar he a tlonlennak vialte kaltak in Laimi mit autertu dingah a nun a pek, a lu ai phum. A thisen cu Laimi kan caah a sung tuk hringhran.
4. Kumzabu 19 lio Wales ram i thanghnak nganpi a rak tlungmi nih mino tampi nun a rak thlen hna i ramkip ah mission riantuan duhnak a rak ngeihter hna. Cu tikah, American Baptist Missionaries cu India ram Assam ahkhin an rak phan hna. Khamhnak thawngtha cu an rak aupi. Zimlotu khua pakhat ah chungkhar khat nih Jesuh cu an khamhtu an rak cohlan. Cu tikah, khuabawi le khuami nih cun nan zumhnak na hlawt than lo ahcun kan in thah hna lai an ti.
A fale pahnih le a nupi cu an thah hna. Nain, chungkhar pa cem nih cun “Jesuh hnuzul dingin kai thim cang, ka kir lai lo. Ahohmanh nih an ka dirpi lo zongah ka zulh thiam ko lai, vailam cu ka hmai, vawlei cu ka hnulei ah, ka hlaw kho hrimhrim lo” tiah a chim dih in an thah colh ve. Sihmanhsehlaw, an thisen nih cun khuami vialte nun a thlen dih. Zumlotu khua cu zumtu khua ah ai cang.
Nihin kan ram thlennak caah mi tampi nih thisen an pek cang. Anmah sualnak ruang ah a si lo. Pathian nih dantat hna caah a si hlei lo. Ram le miphun caah dawtnak thinlung taktak he thisen pek an ngamh ruangah a si. Ram caah thisen luangmi hi a lak a si hrim lai lo. “Nanmah luatnak man cu a sungmi thi, dotlak lonak zeihmanh a ngei lomi tuufa thi bantuk, Khrih thi kha a si.” (1 Petet 1:19). Credit: John Cung