Thihdar: Bethel Pastor Rev. Dr. Bei Rona nih Mual a kan Liamtak

Thihdar: Bethel Pastor Rev. Dr. Bei Rona nih Mual a kan Liamtak
——–
Hakha khua, Bethel Baptish Church ah Pathian rian a ttuan liomi Rev. Dr. Bei Rona (kum 42) cu nihin zinglei sml. 3:30 hrawng ah Mandalay sizung ah a nunnak a liam, tiah kan theih. April 2, Good Friday pumh dih ah ruah lo piin a lephiat (လေဖြတ်) i Mandalay sizung an phakpi hnu ah a nunnak a liam hi a si.

Rev. Dr. Bei Rona ruak cu nihin zanlei sml. 6:00 hrawng ah Hakha ah an rak phakpi lai. Rev. Dr. Bei Rona hi Bethel Baptist Church ah 2005 in Pathian rian a ttuan i, a service kum 15 a si cangmi a si. Church Secretary le Nubu Secretary a ttuan liomi zong a si. The Chin Journal

Ka Kawi, (Rev. Dr. Beirona) Rak kal chung ko kun law. Nang cu lungre theihnak le harsatnak a um ti lonak hmun ah na phan cang. Kan nih cu vawlei ah rethei ngai in kan rak um rih lai.

Nang cu kum 15 chung na rianhmi Pa Pathian he niahniam te in nan tlongleng ṭi cang lai. Fiangte in na Bawipa na hmuh cang lai. Kan nih cu Pa Pathian umpinak hngal bu in hi vawlei ah a rian kan hun ṭuan rih lai.

Ka Kawi, minung kan si. Na lungre theih caan a um i, ka lungre theih caan a um ve. Thla kan i cam piak i, thazaang kan i pek tawn kha. Kei cu lungre theih caan ah hawikom ṭha fuhpanh ding ka ngeih ti ṭung lai lo.

Nang cu bia tlawm te lawng a chim i tampi in rianṭuan a duhmi na si. Sikhawh tawk in mi harsa le mi nauta bawmh a duhmi na si. Ka kawi, na keneh le na tuahsernak hi kei nih ka pehzulh khawh ṭung lai lo.

Kan kawifa Pathian Ram rian caah saduh kan thah ve tawn kha. Kan thlam zong ngan ter deuh usih law kan rak ti tawn kha. Ordained Pastor na sinak hmanh sau na hman manh ṭung lo ee.

Pakhat lawng cun a si kho lo, i bawmh a hau kan rak ti tawn kha. Zeitindah kan saduhthah mi hna kha keimah lawng in ka ṭuanchuah khawh lai.

Zei a si hmanh ah nang cu na zaang a dam cang lai. Lunglawm te in Vanmi Thiang hna he Pa Pathian nan thangṭhat ṭi cang lai. A kan dongtu rak si te ko kun law.. Mangṭha. Credit: Holly Ram