SAC Ralkap Bawi Khual Tlawn Lio A Si Caah Hakha Peng chung Phone Line An Phih Dih
=============
Thlichia nih Chinram a den hnu ah SAC ralkap bawi le SAC kuttang bawi hna cu Chinram an tlawn lio a si caah Hakha peng chung phone line an phih dih, tiah thawng theih a si. Hi kong he pehtlai in Falam um khumi pakhat nih, “Kan nih Falam hi MPT, Telenor cu an phih dih ve. Ooreedo hi a caan caan te ah a ngah. Internet line bal cu a ngah lo.
Internet line hi an phihnak a sau cang. Zinghmuh Operation a um lio in khan a si cang. Tu hi Hakha lei zong cu an phih dih ve. Kan hei tuaktan ning ah SAC ralkap bawi le a kuttang rian a tuan mi pawl khual an tlawng ngai. An i chok ngai. Cu ruangah an phih i si men lai ti kan ruat. Cun, atu hi khuachung kip ah an duty ning a ṭha ngai hna,” tiah The Chin Post ah a chim.
May 18 ni kha kokek rawhralnak ruang ah harnak a tongmi Matupi peng mi hna sin ah, SAC nih Chinram Chief Minister rian a khinh mi Dr. Vun Suan Thang le SAC ralkap bawizik hna an tlawng. Anmah tlawn ruah ah Matupi khua luhchuah zong an phihkhar, tiah theih a si. Hakha khuapi chung hi phone line an phih dih lawng si loin khuachung lam aa tonnak kip le lamte kip ah SAC nih duty an laak dih ve, tiah theih a si.
Zarh Hnih Hnu Ah Vanlawng In A Tla Mi Ngakchia Pali Nungdam In Hmuh An Si! Colombia ramchung Amazon tuhmawng i a tla mi vanlawng ah a cuang ve mi ngakchia pali cu zarh hnih a liam hnu ah nungdam in hmuh an si, tiah Colombia president Gustavo Petro nih nizan May 18 ah a chim.
Vanlawng hi a luancia May 1 ah khan Amazon tuhmawng ah a tla i, vanlawng mawngtu(pilot) pinah nungdam in an hmuh mi ngakchia hna i an hringtu nu le midang pakhat an thi. Vanlawng a tlaknak hmun hi tuhmawng chahpi chung a si caah miruak kawltu ding ah ralkap 100 le uifim zeimawzat thlah an si.
Tuzarh cawnikhatni le cawnnihnihni ah khan upa pathum ruak cu ralkap nih an hmuh hna. Ngakchia pali hi hmuh zau an si lo i thuk deuh chin in kawl an si hnu ah cawnnithumni ah khan nungdam in hmuh an si. Ngakchia pali lak ah hin nausem thla 11 mi zong aa tel. Ngakchia dang hna cu kum 13, kum 9 le kum 4 mi hna an si.
Colombia president Gustavo Petro nih cun, nungdam in ngakchia pali hmuh an si caah an i lawmhnak kong media ah a chim i, zarh hnih chung ah zei bantuk harnak dah an ton i, zeitin ah an hmuh hna ti bantuk cu a chim lo.
Mizoram Ah Myanmar In A Lutmi Bing Rang Rupees Sing 200 Man Cu Mizoram Palik Nih An Tlaih; Mizoram chung ah Myanmar ram lei in phungning loin a lut mi bing rang, India phaisa Rupees sing 200 man cu Aizawl khuapi Zarkawt sang chung ah nizan May 18 ah khan Mizoram palik nih an tlaih, tiah theih a si.
An tlaih mi bing rang hi 44 gram in a rit i a zuartu ah ruahmi, Hakha Chin Oo si sang um Pu Thang Cung (kum 46) le Mizoram Hnahthial khua, Pennial sang um Pi Lalnunsiami (kum 50) hna cu tlaih an si, tiah Mizoram Palik nih an thanh. Credite; The Chin Post