Hakha Ummi Hna I Ralrin Ding
=============
May 23, tuzan thok in SAC nih Hakha ah khualtlung cazin an chek lai ti a si! Tuzan thok in an duh tik paoh ah an chek lai! Motor Cycle le motor licence siseh driving licence zong siseh an chek lengmang lai tiah Hakha um pakhat nih The Chin Post ah a chim.
SAC Ralkap Nih Naungkone Khua Bomb An Thlak Ruangah Khuate 18 In Minung 21,880 An Zaam; KNU Brigade 3 hmunram um Mu peng Naungkone khua cu SAC ralkap nih drone in voi 2 bomb an thlak i tualchung mi inn le cacawnnak sianginn an kaang, tiah KNU Central nih cathanh an chuah.
SAC ralkap hna nih cun Naungkone khua cu May 21 zanlei suimilam 1:20 ah voikhat, 2:15 ah voikhat, tiin drone hmang in bomb an thlak. Naungkone khua cu inn 117 a um i, milu 782 an umnak a si. Khuami hna cu a himnak hmun ah an zam hna, tiah theih a si.
SAC ralkap nih KNU hmunram Mu peng chung ah May 10 in an lut i, khuami hna cu an thah hna pinah an inn le lo an khanghpiak hna ruangah Mu peng khuate 18 in minung 21,880 cu a himnak hmun an zam, tiah theih a si.
SAC nih nawlngeihnak an laak hnu in KNU hmunram Mu peng khuate ah hriamngan, drone le vanlawng in kahdohnak an tuah leng ah tualchungmi an thah hna ruangah khuami tampi cu ralhrial in an zam. An kaltaakmi an inn le lo vialte zong SAC ralkap nih an khanghpiak hna, tiah KNU Central nih cathanh an chuah.
SAC Nih An Chuahmi Cement Cu PDF Sinah Ngunkhuai Pek In Phorh A Si! Magway ramṭhen, Yesagyo peng, Yelaykyun hmunram Ayeyarwaddy tiva in SAC chuahmi mirang vawlei(cement) cu tilawng in phorh a si i, a phortu hna nih PDF sinah ngunkhuai an pek, tiah Bright Star Group Defense Force in ṭuanvo ngeitu nih a chim.
SAC phaisa luhnak hram a si mi le SAC serchuahmi cement cu Min Thu Aung le Yebayingyi tilawng nih an phorh i, PDF sinah ngunkhuai an peknak catlap kan hmuh, tiah Bright Star Group Defense Force nih an thanh.
PDF hruaitu hna nih phaisa mit zoh in ngunkhuai an khawlhmi catlap ah phaisa kyats sing 29 le sing 20 catlap kan hmuh i, kan lung a ṭha hrim lo, tiah Bright Star Group Defense Force in ṭuanvo ngeitu nih cun a chim.
Pakokku peng mizapi ukhruainak phu nih SAC chuahmi thilri phun 19 hna cu cawk le zuarnak nan tuah hrimhrim lai lo tiah cathanh an chuah nain nawl a zul lo mi an um tawn tiah tualchung mi hna nih an chim.
Monywa Khuapi Ṭamhnak Dawr Pakhat Cu Mifir Nih Luhhnawh In Phaisa Kyats Sing 700 Leng An Fir; Sagaing ramṭhen, Monywa khuapi um Ngwe Zar Hlaing ṭamhnak dawr dawr cu May 22 chun suimilam 12:00 tluk ah mifir nih an luhhnawh i phaisa kyats sing 700 leng le dawr hngaktu ngeihmi sui tampi zong an chuh hna, tiah Sangchung ummi hna nih an chim.
“Nu pakhat cu dawr chung ah a rak lut i cu hnu ah a hawile(pa) a auh hna. Dawr ngeitu cu cawl kho loin meithal in an hmuah hnu ah dawr chung a ummi phaisa vialte le dawr hngaktu hna an sui vialte cu an laak dih,” tiah dawr pawng a ummi pakhat nih a chim.
SAC nih nawlngeihnak an laak hnu in Monywa khupi ah, mifir nih dawr luhhnawh in phaisa le suingun chawva chuhnak atu le atu a cang nain mifir an tlaih khawhmi ngaingai an um lo, tiah tualchung mi hna nih cun an chim. Credite; The Chin Post