Thawngthar: KIA Hriamtlai Phu Le Kachin Mino Phu Nih KNO Tatmaha 108 Cu An Cohlang Lo, An Buai Kho Men

KIA Hriamtlai Phu Le Kachin Mino Phu Nih KNO Tatmaha 108 Cu An Cohlang Lo, An Buai Kho Men
==============
Kachin National Organization (KNO) cu Shan ramkulh, chaklei Mon Ko hmunram chungah Kachin National Tatmahdaw Tatmaha 108 an dirhnak kong cu June 12, 2021 ni ah cathanh an rak chuah kongah Kachin mino tampi nih duhlonak an langhter. Kachin ram pumpi dihlak aiawhtu Kachin Independence Organization/Kachin Independence Army (KIO/KIA) hriamtlai phu an um cang i, a dang hriamtlai phu a um thanmi cu kan cohlang kho lo, tiah Kachin mino pakhat nih The 74 Media sinah a chim.

Kachin ramkulh chungah hriamtlai phu pakhat an um ko cang, a dang hriamtlai phu um a herh ti lo, kan cohlang kho lo, tiah an duhlonak an chim. Aho si hmanhah miphun dawtnak le miphun le ram caah tuanvo kan ngeih dih ko. Asinain KNO hriamtlai phu tlawmpal cu an luan deuh ko. Hi bantuk hi kan duh lo. Hriamtlai phu dirh loin Organization pakhat bantuk an dirh ahcun a poi lo. Hriamtlai phu an dirh hnu cu KIA hriamtlai phu he i zuam colh bantuk a si cang.

Ramleng hrambunh Kachin National Organization (KNO) nih tatmaha thar pakhat an dirhmi cu KIA/KIO, Shan ramkulh chaklei ah Kachin Councellor phu le Shan ramkulh chaklei Kachin mino phu hna nih an cohlang lo, tiah thawngtheih a si. KNO hriamtlai phu le hruaitu pawl hna cu ramleng ah a ummi hna Kachin miphun an si i, Kachin miphun luatnak hmuhnak ding caah biatak tein le tha tein timhtuahnak kan ngeih, tiah an chim ko, nain chunmang lawng a si tiin Myitkyina mino pakhat nih a chim.

KNO hriamtlai phu le hruaitu pawl hna cu ramleng ah hrambunh mi le a ummi an si i, tatmaha pakhat an dirh mi cathanh an rak chuah mi cu Kachin ramkulh chung a ummi mipi pawl dihlak, luatternak ding caah chanthar fimthiamnak lei tha tein timhtuahnak ngeihmi a si. Kachin mipi pakhat sinak le ruah tikah chunmang an chimh sawhsawh lawng a si, tiah a chim.

Federal ram pumpi serchuah khawhnak ding caah tlangcung miphun dihlak he kut tlaih buin a kal cuahmah mi KIA/KIO hriamtlai hruainak tangah lawngah an um awk a si. Hmun dangdang ah a ummi minung 15 tlawmbik Kachin mino pawl cu KNO tatmaha 108 an dirhmi cungah ruahnak an hal hna tikah Kachin miphun dihlak nih an cohlang hna lo ti khawh an si.

KNO nih tatmaha 108 hriamtlai phu an dirhmi cungah zoh rih an hau lai. Tatmaha 108 hriamtlai phu an dirhmi hi KNO nih Kachin ramkulh chung a ummi mipi dihlak covo le KIO le a dang kawikom te pawl nih an kal pi bantuk in aruang tein kan tuan ve ko lai, tiah an chim. Cu hlei ah ralhrang tapung pawl dohnak caah Kawlram chung mipi he kan dirh ti lai i, CRPH, NUG le Gen-Z hna zong KNO phu nih thazaang an pek ko hna, tiah thawngtheih a si. Kachin National Organization phu hi 1999 kum ah an rak dirh cangmi a si i, Chairman ah U Baw Wan La Raw a rak si.