SAC Ralhrang Nih Parasut In A Thlakmi Hriamthil Cheukhat Cu Chin Ralkap Kut Ah A Phan
=========
Chin ramkulh, Hakha peng chung ah SAC ralhrang nih Helicopter he parasut hmang in an rak chiahthlak mi hriamthil cheukhat cu Chin ralkap CNA le CDF-Hakha fonh nih an laak, tiah theih a si. May thla thok ka hrawng khan Hakha-Gangaw lam ah SAC ralhrang nih helicopter he parasut hmang in hriamthil tom 20 hrawng an rak chiahthlakmi chung ah a chau cu Chin ralkap ṭangṭi phufonh kut ah a phan, tiah theih a si. May 11 ah Hakha-Gangaw lampi hmun pakhat ah SAC ralhrang CNA, CDF ṭangṭi phufonh karlak ah kahdohnak pehtlaiin a chuak, tiah theih a si.
Falam-Hakha Lampi Ah A Tlaumi 2 Hna Cu Zarhkhat Leng A Rau Cang Nain Hmuh An Si Rih Lo; Chin ramkulh, Tedim khua, Luaibual sang um Obed House sianginn ah rian a ṭuanmi Nu Cin Hau Vung(kum37) le Hakha si–inn ah rian a tuanmi Pu Lian Za Thawn(kum 32) hna cu a luancia May 2 khan Cycle pakhat cit ṭi in Falam khuapi in Hakha khuapi ah an kal i, zanlei suimilam 6:00 hnu in nihin tiang pehtlaih khawh an si ti lo, tiah Zalen nih a langhter.
Pu Lian Za Thawn cu Hakha um a chungkhar hna he a donghnak phone an i cawnh lio ah Chuncung an phan deng, tiah theih a si. An chungkhar le hawikom, chungkhat sahlawh hna nih an kawl len ko hna nain an konglam zeihmnah theih a si lo. An catlap le an thil hruk-aih pawl tu cu i ṭhenṭhek dih in Thlanrawn khuathar lam pawng ah khualtlawng hna nih an char.
Cu caah Pu Jerome Lian Za Thawn le Nu Cin Hau Vung @Sayamah LinLin hna cu an chungkhar hna nih chunzan rawl-ei chungpil lo le it kho lo in kan um hna caah an thawngpang theimi le a hmumi nan umsual ah cun (Viber, Whats app- 09767133283) ah pehtlaihnak nan kan tuahnak lai, tiah nawlnak zong an tuah chih.
Bomb Puah Ruangah Lunghrinh In Tlaih Mi Chin Mino 4 Kum 2 Thongthlak Hnu Ah An Luat; Chin ramkulh, Paletwa khua chung Bomb puah ruangah lunghrinh in tlaih mi Chin mino 4 hna cu thong kum 2 chung an tlak hna hnu ah May 12 Sittwe thonginn chungin an luat tiah neihniam pakhat nih a chim. Thong chung in a luat mi 4 hna hi hlasak thiam, Company riantuan le cozah zung riantuan zong an tel.
Aluan cia 2021 May 28 zinglei suimilam 8 tluk ah Paletwa khua chung Economic Bank le Penguk zung hmai Bomb puahnak ruang ah mah hna pali cu lunghrinh in an rak tlaih hna hi a si. Mah hna pali cu an tlaih hna thla 5 hnu 2021 October 12 ah an sual lo tiin an rak thlah hna nain October 13 ah Palik nih an rak tlaih than hna. 2022 April 5 ah upadi (505) ning in kum 2 thong thlak ding bia an ceih hna hnu ah Sittwe thong ah an thlak hna hi a si.
Cyclon Thlichia A Fahkhawhnak Chin Le Rakhine Ramkulh Ah Myanmar Meithahnak Zung Nih Papek In Timhtuahnak An Ngei; Thazaang thawng ngai mi Mocha Cyclon thlichia a fah khawhnak hmun a bik in Chin le Rakhine ramkulh ah papek in timhtuahnak ngeih a si tiah Myanmar meithahnak zung Director Thein Tun Oo nih a chim.
“Thlichia nih fak ngai in a phak khawhnak Chin ram le Rakhine ramkulh hna ah papek in caan karlak hman chom mi thilri, mi bawmhchanhnak thilri, caan karlak i dor chungnak hmunhma le a dangdang kong zong timh tuahnak kan ngei chung” tiah a chim chap. Bangladesh rili in aa thok ding Mocha Cyclon thlichia cu May 12 ni thok in suimilam 48 chungah Rakhine ramkulh Sittwe khua a phan cang lai tiah khuacaan zohnak zung nih an langh ter. Credite; Lungmili Post