May Thla Chung Ah Kahdohnak Voi 500 A Chuak I SAC Ralkap 449 An Thi – NUG
==========
NUG nih No. 1 ralram hmun tiah an sak mi Sagaing ramṭhen, Magway ramṭhen, Mandalay ramṭhen le Shan ramkulh chaklei ah May thla chung lawng ah kahdohnak voi 500 a chuak i, SAC ralkap 449 an thi, tiah NUG runvennak zung nih an thanh.
Cu kahdohnak ah cun SAC ralkap 681 hliamhma an pu i PDF in ralkap 41 nunnak a liam pinah 113 hliamhma an pu ve, tiah NUG runvennak zung nih June 12 ah an langhter i PDF lei nih SAC ralkap hriamnam phunphun zun 24 telh in zen-kuan tam ngai an chuh hna, tiah an langhter chih.
May thla chung kahdohnak cu No. 1 Military Region Commander kuttang um PDF, mipi vengtu(Pah Kah Phah) le EROs hna i bawm in SAC ralkap pawl cu an kah hna, tiah NUG runvennak zung nih cun an thanh.
Rihkhawdar SAC Ralkap Meithal Kuan In Kum 12 Ngakchia Telh In Minung 2 Hliamtuar! Chin Ramkulh, Falam Peng, Rihkhawdar chung hmunkhuar mi SAC ralkap hna nih hramhram in meithal an puah ruangah khuami kum 12 ngakchia telh in minung pahnih meithal kuan hliamhma an pu, tiah theih a si.
Rihkhawdar khuami pakhat nih, “Kahdohnak zeihmanh um lo. Hramhram in khuachung lei hoih in meithal duh poh an puah. Hiti meithal an puah ruang ah hin kum 12 ngakchia telh in minung pahnih hliam an tuar,” tiah The Chin Post ah a chim.
Hliam a tuarmi kum 12 ngakchia te hi Zokhawthar sii-inn ah an kalpi i a hma a faak pah, tiah theih a si. Cun, Pakhat aa hliammi hi thilphor motor hnu zul a si i Haimual khua pawng an phak ah kuan nih a khen, tiah khuami sin in theih a si.
Thilphor motor zul aa hliammi kong he pehtlai in, “SAC nih duh poh in meithal an puah ruang ah thilphor motor hnuzul pakhat aa hliam. Aa hliamnak zawn hi fianghlang in kan thei lo. Emergency in sii-inn ah an tlikpi colh ve,” tiah Haimual khuami pakhat nih a chim.
Breaking News
SAC Ralkap Nupi Nih Hriamngan A Kah Lioah A Puah Hnawh Hna I Hliam A Tuarmi Le A Thimi 40 Hrawng An Si; Bago ramṭhen Htantapin peng Zayetgyi khua hrambunh ke-ralkap (khah-lah-yiah) 73 sakhan ah SAC ralkap an nupi le hna cu raldoh an cawng i a tak in hriamngan kah an timh lioah a puak. Hriamngan a kaptu SAC ralkap nupi Tin Tin Maw telh in ralbawi le ralkap sawhsawh tam ngai an thi tiah Khit Thit Media nih a ṭial.
SAC ralkap nupi hna cu meithal kah le hriamngan kah tiangin an chimh hna i a herhning in kahdohnak le hmun dangdang ah an hman hna tiah theih a si. Bago ramṭhen Htantapin peng Zayetgyi hrambunh ke-ralkap 73 sakhan ah SAC ralkap nupi pawl raldoh an cawnpiak hna i a tak in hriamngan kah hmuhsaknak dingah PDF an um lai ti an zumhnak khuate hna cu an kah hna, culioah hriamngan hi a puakmi a si. Hliam a tuarmi le a thimi 40 hrawng an si tiah theih a si. Hi thil hi June 8 ah a cangmi a si i SAC nih a lengah chuahter hrimhrim lo dingin an kham caah ni 4 a rauh hnu lawngah Media nih an theih. Crd;The Chin Post