Karenni Ah SAC Ralkap Sakhaan 1 le Palek Sakhaan An Lak, Sakhaan Bawizik A Thi
==========
Thai le Karenni ramri, Karenni ram ah a um mi SAC kuttang Mese palek sakhaan le Taunghla sakhaan cu KNDF le KA phufonh nih June 13 zinglei sml 6:00am hrawng ah an lak khawh tiah thawng theih a si.
“SAC lei sakhaan bawizik telh in a thi mi an tam i hriam zong an lak khawh. SAC lei an sungh tuk caah vanlawng bawm in kahdohnak an tuah” tiah kahdohnak he aa naihniam mi mipi pakhat nih DVB ah a chim.
Karenni peng, Thanlwin ni chuahlei ah a um mi SAC ralkap sakhaan a si mi Taungla sakhaan, BP-14 sakhaan hna zong ah kahdohnak a fak rih tiah theih a si. Thanlwin ni chuahlei ah kahdohnak a fak i SAC ralkap a thi mi le hriam an lak khawh zat cu KNDF le KA nih a fiang in an thanh rih lo. SAC ralkap pawl an sungh tuk caah Jet vanlawng, Helicopter hna an zuan lengmang caah mipi hna nih bom a thlak sual lai tiah an phang tuk.
Kyainseikgyi Ah Riahcaw Phor SAC Ralkap An Kah Hna, Second Battalion Commander Telh In 3 An Thi; Karen ram, KNU Brigade 6 hmunhma, Kyainseikgyi peng, Kwilonetai sakhaan ah riahcaw le hriam chanh ding in a kal mi SAC ralkap an kah hna i Second Battalion Commander telh in 3 an thi, a tang mi SAC ralkap pawl bel Thai ram lei ah an zaam tiah S.O.F nih a thanh.
June 3 ah riahcaw a phor mi SAC ralkap pawl cu KNLA Special Operation Force (S.O.F) phufonh nih Sniper hmang in an kah hna, kahdohnak sml cheu chung ah Sniper kut in SAC lei Second Battalion Commander le adang 2 an thi i 13 an i hliam tiah theih a si. A sung mi SAC ralkap pawl cu Thai ram lei ah an zaam i kahdohnak ruang ah mipi hriamtlai phufonh lei 5 bom ci nih a khen hna tiah S.O.F nih an thanh.
Hramhram Uknak Lak Caan Thla 20 Chung Ah Mipi 6,000 Leng Thah An Tong; SAC ralkap nih hramhram in uknak an lak hnu 2021 February 1 in 2023 September 30 tiang thla 20 chung ah sualnak ngei lo mipi 6,337 thah an tong i mipi 2,614 an i hliam tiah Norway ram hrambunh Peace Research Institute Oslo (PRIO) nih June 12 ah report an langhter.
A thi mi chung ah SAC nih thah ruang ah a thi mi an um leng ah hramhram uknak a dohtu phu hna nih thah mi zong an telh chih hna. PRIO Professor Stein Tonnesson nih cun SAC ralkap nih mipi pawl a thah khun hna bantuk in hramhram uknak a dohtu phu pawl ruang zong ah tampi an thi tiah a chim.
Report ning ahcun dai tein duhlonak a langhter mi mipi 3,003 SAC ralkap nih an thah hna i hramhram uknak a dohtu asilole tlangcung hriamtlai phu zong nih mipi 2,152 an thah hna tiah an langhter.
Asinain mipi 1,170 hi cu zeibantuk phu nih dah an thah hna ti a fiang lo tiah an langhter. Atu langhter mi pawl hi zumh awktlak a si mi Media pawl nih langhter mi cherhchan in khawmhsuat mi report an langhter mi a si. A taktak ah atu langhter mi cazin nak in an tam kho lai tiah PRIO nih an thanh.The Chinland Post