KNU Brigade-5 Humhaknak Thla Khat Chung Kahdohnak Ah SAC, BGF Ralhrang Commander Hna Telh In 120 Leng An Thi
=========
Karen National Union (KNU) Brigade-5 humhaknak hmun a luancia 2023, May thla (thla khat) chung lawng kahdohnak ah SAC ralhrang le an kuttang hriamtlai Border Guard Forces (BGF) Commander le Deputy Commander hna telh in 122 an thi, tiah KNU nih cathanh an chuah.
May 1 in 31 tiang ah KNU Brigade-5 humhaknak Mutraw pengkomh hmunram chung ah SAC ral hrang, an kuttang hriamtlai BGF ralhrang pawl le KNU Brigade -5 karlak ah kahdohnak a chuak, tiah theih a si.
Hi thlakhat chung ah kahdohnak voi 200 tiang a chuak i SAC le BGF ralhrang pawl 122 an thi pin ah hliam a pumi 48 hrawng an si. Mah a thimi ralhrang chung ah Commander le Deputy Commander 7 an i tel, tiah theih a si.
Cu pinah SAC ralhrang hriamthil le ei-din a chantu motor 6 kan hrawh khawh chih pin ah rang, khacer 6 zong kan thahpiak hna. Tualchung hriamtlai in minung 2 nih ram le miphun caah an nunnak a pek i, 10 nih hliamhma an tuar, tiah cathanh an chuahmi ah an langhter.
Hi thlakhat chung ah SAC le BGF ralhrang fonh nih mipi hna umnak hmun le rian an ṭuannak hmun cu tinh chih te in hriamngan kuan lung 59 in an kah hna caah mipi 1 a nunnak liam i 2 nih hliamhma an tuar, tiah theih a si.
SAC ralhrang nih mipi tangka (Thailand tangka in) sing 280,000 le (Myanmar tangka) sing 100,000, phone 3, icom 1, vainam 3 hna zong an firpiak hna, tiah Karen National Union (KNU) nih cathanh an chuahmi ah an langhter chih
SAC Ralkap 3 PDF-Zoland Sin Ah An I Fonh; Chin ramkulh Tedim khua hrambunh SAC ralkap (269) in pakhat cu May 31 ah hriamngam he PDF-Zoland sin ah a rak i fonh tiah kan theih. A rak zam mi pa nih hin meithla Ma-1 zun 1, kuanbawm 4 le kuan 260 leng a rak i put chih caah PDF-Zoland nih sing 50 tangka an pek hnu ah a himnak ah an thlah.
Aluan cia May 13 ni zongah Tonzang khua ah umhmun khuar mi SAC ralkap (khah-lah-yah) 268 in Lah Min Aung le Myo Chit hna cu PDF-Zoland nih an rak tlaih hna hnu ah a himnak ah an rak hlat hna tiah kan theih.
Kyain Seikgy Ah SAC Ralhrang Nih Helicopter In Bomb A Thlak Caah Phungki 2 Le Mipi 2 An Thi; Karen ramkulh, Kyain Seikgy khuapi ah SAC ralhrang nih helicopter in bomb a thlak pinah hriamngan in an kah hna i phungki 2 le mipi 2 an nunnak a liam, tiah tualchungmi hna nih an chim.
June 2, zing ah Kyain Seikgy khuapi chung ah SAC ralhrang le mipi ralkap hna karlak ah kahdohnak a chuak. Cu hnu ah SAC ralhrang nih helicopter in bomb a thlak i 120MM hriamngan pawl zong in khuapi chung cu an kah caah (Block.3 sang) um phungki 2 le mipi 2 an nunnak a liam i inn rawkmi zong a tam ngai, tiah theih a si.
“Tuzing suimilam 5:30 tluk ah kahdohnak a chuah hi a si i, cu hnu ah helicopter le hriamngan an kah caah 4 an thi i, ngakchia pakhat nih hliamhma faak ngai a tuar” tiah min langhter a duh lomi tualchungmi pakhat nih Khit Thit ah a chim ve.
Atu hi Kyain Seikgy khuapi cu pehtlai in kahdohnak faak deuh in a chuak sual lai ti an phang caah khuapi chung um mipi hna cu dai tein an um hna i, SAC ralhrang nih hriamngan he hriamhme he duhpaoh in an kah thluahmah, tiah theih a si. Credite; Lungmili Post