Lungkhar Kahdohnak SAC Ralhrang 7 Renglo An Thi
========
2023 June 2 Hakha le Thangtlang kar Lungkhar lei kahdohnak a fah caah Hakha thar lei in SAC ralhrang nih hriamngan in an vun bawmh hna. Asi nian Chin ralkap tangti phu nih Drone le ralkap thazaang in an nam chih ve hna caah ralhrang lei in 7 renglo an thih lai zumh a si nak kong kahdohnak he neihniam um pakhat nih a chim.
“Ralhrang hi hnu an kir dih le kir dihlo a fiang rih lo, Kanmah ralkap pakhat hliamhma a tuar nain a fak tuk lo. Ralhrang an thihnak zawn hi fuh awk an tha deuh rih lo.”tiah a cunglei upa nih a chim. Tita leikam zongah ralhrang nih nawr an timh hna nain Chin ralkap tangti phu nih Drone in an leh rul hna. Mah ni kahdohnak ah Drone zeimaw zat an sung nain phih khar colh a si tiah kan theih.
KNU Brigade-5 Humhaknak Thla Khat Chung Kahdohnak Ah SAC, BGF Ralhrang Commander Hna Telh In 120 Leng An Thi; Karen National Union (KNU) Brigade-5 humhaknak hmun a luancia 2023, May thla (thla khat) chung lawng kahdohnak ah SAC ralhrang le an kuttang hriamtlai Border Guard Forces (BGF) Commander le Deputy Commander hna telh in 122 an thi, tiah KNU nih cathanh an chuah.
May 1 in 31 tiang ah KNU Brigade-5 humhaknak Mutraw pengkomh hmunram chung ah SAC ral hrang, an kuttang hriamtlai BGF ralhrang pawl le KNU Brigade -5 karlak ah kahdohnak a chuak, tiah theih a si.
Hi thlakhat chung ah kahdohnak voi 200 tiang a chuak i SAC le BGF ralhrang pawl 122 an thi pin ah hliam a pumi 48 hrawng an si. Mah a thimi ralhrang chung ah Commander le Deputy Commander 7 an i tel, tiah theih a si.
Cu pinah SAC ralhrang hriamthil le ei-din a chantu motor 6 kan hrawh khawh chih pin ah rang, khacer 6 zong kan thahpiak hna. Tualchung hriamtlai in minung 2 nih ram le miphun caah an nunnak a pek i, 10 nih hliamhma an tuar, tiah cathanh an chuahmi ah an langhter.
Hi thlakhat chung ah SAC le BGF ralhrang fonh nih mipi hna umnak hmun le rian an ṭuannak hmun cu tinh chih te in hriamngan kuan lung 59 in an kah hna caah mipi 1 a nunnak liam i 2 nih hliamhma an tuar, tiah theih a si.
SAC ralhrang nih mipi tangka (Thailand tangka in) sing 280,000 le (Myanmar tangka) sing 100,000, phone 3, icom 1, vainam 3 hna zong an firpiak hna, tiah Karen National Union (KNU) nih cathanh an chuahmi ah an langhter chih. Credite; Lungmili Post