Thawngtha Tuk A Si, Mipi Ralkap Nih Sikhan An Tuahmi Ah Minung 500 Leng An Thlop Manh!

Yaw Hmunhma Ah Sikhan An Phuan I, Minung (500) Lengkai Kan Thawp Tiah An Chim!
=========
Yaw Reginal Department of Health (YRDH) cu tintan a dih cangmi si lei thiamnak a ngeimi, CDM a tuahtu sibawi hna, CDM tuahtu nerse pawl le a dang si-ai lei thiamnak a ngeimi hna i fonh in 1.1.2022 ah dirh in an phuanmi le mizaw zohkhenhnak phu an si timi hmasabik ah kan in theihter hna.

YRDH-Hmuitmihmi! Kannih cu Yaw hmunhma chungah a ummi ralzaam mipi hna i zawtfahnak hna cu kan thlop hna lai.
Kannih cu Yaw hmunhma chungah covid-19 telh in zawtnak dangdang hna zong control kho dingin mipi sinah theihternak le zohkhenh ningcang hna cu kan tuan lai.

Kannih cu Yaw hmunhma chungah a ummi nu le naupawimi hna, hnuk a ding cuahmahmi ngakchia hna i ngandamnak siseh thihlonak an ton nakhnga lo a lamkip in kan i zuam lai. Zawtnak zual hmami zong thlop kho dingin sizung le sikhan tibantuk zong caan karlak ah tuah kho dingin kan i zuam. CDM tuahtu si lei thiamnak a ngeimi hna i lahkhah hna zong pehzulh in kan pek khawh nakhnga le herhbaunak dangdang hna zong kan tuah chih fawn lai.

YRDH Nih Zeidah A Tuah Cang! Yaw Reginal Department of Health (YRDH) nih caan karlak ah a tuahmi sikhan ah atu ahcun mizaw (500) lengkai thlopbulnak pekin damnak an hmuh cuahmah cang. Cucaah Yaw Reginal Department of Health (YRDH) cu harsatnak tampi chungin rak dirhmi phu a si timi kan in theihter hna.

Kanpalet Khuapi Ah Kahdohnak A Chuah Ruangah SAC Ralhrang Nih Meithal An Puah Caah Mipi Pakhat Nunnak A Liam!
Chin ramkulh Kanpalet khuapi chung Yan Aung Sii Tyi, fimcawnnak zungpi le ukbawi zungpi ah umnak sakhan a tuahtu SAC ralhrang ralkap hna cu CDF-Kanpalet nih January 31 zinglei sml 6:30-8:00 tiang luhhnawh in an kah.

Kahdohnak ahcun SAC ralhrang ralkap (3) an thi i, CDF-Kanpalet leikap ah hliam tuarmi umloin kan i zukphiak kho tiah CDF-Kanpalet nih cathanh an chuah. SAC ralhrang ralkap nih hriamngan hmangin pawngkam an kah caah Kanpalet khuapi chungum mipi umnak inn cu a khenh caah minung pakhat nunnak a liam pinah nu pakhat nih fak ngaiin hliam a tuar.

Rakhine Ramkulh Ah SAC Ralhrang Dirhkamnak An Tuah! Rakhine ramkulh khuapi (6) ahcun SAC ralhrang ralkap chungkhar hna le ralkap pension ciami chungkhar hna, USDP party hna nih January 31 ah SAC ralhrang dirhkamnak an tuah hi a si. SAC ralhrang ralkap dirhkamnak an tuahnak khuapi hna cu: Sit Tui, Kyaukh Phyu, Taung Kuk, Arm, Bu Tyi Taung le Maung Taw khuapi hna an si tiah Zalen nih a tial.

Hramhram Uknak Chungin A Zalongmi Federal Democracy Ram Dinh Dingin KNU Chairman Nih Forh! Hramhram uknak chungin a zalongmi federal democracy ram dinh dingin Kayin miphun lawng siloin ramchung mipi dihlak i tel cio dingin KNU chairman nih forhfialnak a chim hi a si.

January 30 ni ah kum 73 tlin ni Kayin Miphun Hriamtlaih Ni ah cakuat a tialmi hmangin Bogyokegyi Saw Mu Tu Sii Phu nih atu bantukin forhfialnak a chim hi a si. “Hramhram uknak le Kawl miphun tanh hleinak, ningcang loin hruainak le uknak chungin a zalongmi federal democracy ram dinh dingin i zuam cio hna u sih.

Ramchung ummi mipi dihlak nih sipuazi, thanchonak le hmailei telefa hna caah a fekmi remdaihnak hmuitimh in kannih Kayin miphun zong nih miphun kip le i hawikomnak phu kip siseh mipi dihlak nih nan thazaang dihlak le a si khawh chungin i zuam cio dingah kan in forhfial hna tiah bia ka donghter” tiin KNU chairman catialmi ahcun hmuh a si.

Cupinah UNO le Asia ramchung ah a ummi phu dangdang hna zong nih Kawlram chung buainak le ramkhel hi remdaihnak a chuah khawh nakhnga kan i zuamnak ah hin a lamkip in bawmnak kan pe hram u tiah nawlnak zong a tial chih. SAC ralhrang kahdohnak zongah a hlan chan ah a tel bal lomi le a um bal lomi zong nih an i tel cang i, SAC ralhrang kahdohnak ah PDF siseh LDF siseh an i tel cang tiah amah nih cun a chim.

Atu bantukin kahdohnak a tuahtu PDF, LDF hna zong hi KNU he pehtlaihnak kan ngeih caah KNU control nak hmunhma chungah a ummi mipi hna zong hi SAC ralhrang i hremnak le thahnawnnak phunkip an ton caah himnak hmunah an tli/an zaamnak a si tiah a chim chih. Credit: The Federal Times