Bomb Puah Ruangah Lunghrinh In Tlaih Mi Chin Mino 4 Kum 2 Thongthlak Hnu Ah An Luat
=========
Chin ramkulh, Paletwa khua chung Bomb puah ruangah lunghrinh in tlaih mi Chin mino 4 hna cu thong kum 2 chung an tlak hna hnu ah May 12 Sittwe thonginn chungin an luat tiah neihniam pakhat nih a chim. Thong chung in a luat mi 4 hna hi hlasak thiam, Company riantuan le cozah zung riantuan zong an tel.
Aluan cia 2021 May 28 zinglei suimilam 8 tluk ah Paletwa khua chung Economic Bank le Penguk zung hmai Bomb puahnak ruang ah mah hna pali cu lunghrinh in an rak tlaih hna hi a si. Mah hna pali cu an tlaih hna thla 5 hnu 2021 October 12 ah an sual lo tiin an rak thlah hna nain October 13 ah Palik nih an rak tlaih than hna. 2022 April 5 ah upadi (505) ning in kum 2 thong thlak ding bia an ceih hna hnu ah Sittwe thong ah an thlak hna hi a si.
Khualtlawng Sinah Tangka Haltu SAC Ralhrang Drone Bomb Thlakhnawhnak In 6 An Thi; 7 Hliam An Tuar; Sagaing ramthen, Watlat peng Yua-tharkyi khua lam 4 aa tonnak hmun pakhat ah khualtlawng hna sin ah tangka hal lengmang tu SAC ralhrang hna cu PDF nih Drone Bomb an thlak hnawh hna caah ralhrang 6 an thi tiah kan theih. May 11 zing suimilam 9:45 ah SAC ralhrang 15 tluk cu khualtlawng hna sin ah tangka hal dingin a buin an i timhtuah lio ah Drone bomb an thlak hnawh hna hi a si.
“Tangka hal dingin ralhrang 15 hna cu a bu in an um lio ah bomb 2 kan thlak hnawh hna, cuchung ah 13 an i teng nain 6 cu an thi, 7 hliam an tuar”tiah Myingyan PDF Zero Battalion 7 an hruaitu pa nih a chim. “Ralhrang a thimi le hliam tuar hna cu a pawngkam tlakrawk inn ah an kal pi hna i inn ka zong hrenh, an aukhuan thawng zong theih an si i an thi chuak mi zong tampi hmuh khawh a si” tiah a cunglei upa nih a chim. Hi kahdohnak cu tualchung PDF tangti phu 6 an i bawm tiah kan theih.
AA Nih Paletwa Peng Mipi Thilri Duhpaoh In An Lakpiak Hna; Chin ramkulh, Paletwa peng chung ah umhmun a khuarmi Rakhine hriamtlai phu (AA) nih mipi hna zan an ih kar ah an inn chung ah lut in an thilri duhpaoh in an lakpiak hna, halnak zong a um lo, tiah tualchungmi hna sin in theih a si.
Paletwa peng, Thantaung khua zong SAC ralhrang sakhan hlunmi ah umhmun a khuarmi AA hriamtlai phu hna nih zan ah khuachung ah lut in mipi thilri hna cu an duhpaoh an laak piak hna nain mipi hna nih a ho sin ah dah report kan tuah lai ti kan thei kholo i a ngamh zong kan ngamh lo, tiah tualchungmi hna nih an chim. AA hriamtlai phu hna nih atu bantukin in mipi hna cung ah an tuahmi hi ṭuanvo ngeitu hna nih a herhning in tawlrel piak kan hau, tiah tualchung mipi hna nih an chim chih.
Thantaung khua ah hin cu hlan ah SAC ralhrang sakhan a rak umbel cang nain atu kum thokka ah Rakhine hriamtlai phu (AA) nih nih an kahdoh hna caah SAC nih zanṭim ah an sakhan an chuahtak. Cu hnu ah AA nih an hman, tiah theih a si. Credite; Lungmili Post