Thawngpang Update; Nihin zong PDF nih Palek Pawl An Phomh Than hna!

Thawngpang Update; Nihin zong PDF nih Palek Pawl An Phomh Than hna!
===========
Yangon, Htan-Ta-Pin Palek buk cu PDF nih kah nak ah Palek bawi Aung Thu Lwin tel in Palek Pathum an thi. Yangon Ram, Htan-ta-pin i kah nak ah Palek 10 tluk a um mi Palek buk cu PDF nih Nihin zing 11:30 AM ah an kah hna i Palek pathum an thi. A thi mi pathum hna cu Palek bawi Aung Thu Lwin, Palek Naing Naing Latt le Palek Lwin Moe Naing an si.

Atu tiang a thi mi Palek ruak lak rih loin Sakhan ah an chiah rih hna. An i kap lio ah hngakchia pakhat ruah lo piin i kah nak chung ah a rak lut i duh tawk in kan kah khawh hna lo caah pathum lawng an thih hi asi tiin PDF nih thawng an thanh.

Yangon Tanlin hleidonh ralhrang gate sakhan le Tai-yin-ta(တိုင်းရင်းသားကျေးရွာ) pawng traffic light cu PDF nih an kah hna caah ralhrang 3 an thi. Yangon Tanlin hleidonh ralhrang phu hna, sakhan an hngahtawn nak hmun cu nihin November 15, zinglei suimilam 11:00 hrawngah mizapi vengtu ralkap phu nih an doh hna caah ralhrang phu lei minung 10 hrawng cu kuan nih a hliamh hna.

Cu chung ah cun minung 3 cu cuka hmunhma ah an thi colh tiah Yangon ramthen hmunhma zohfeltu phu nih cathanh an chuah. Cun Tai-yin-ta pawng traffic light ah phaisa kholh in mipi hnahnawhnak pe tu motor pi-ke hna cu kahdoh an ton caah motor pi-ke minung 3 kuan nih a hliamhhna, minung 2 cu an thi lai tiah zumh a si.

Kahdohnak a um lengmang caah ralhrang phu hna nih an duhnak hmunpoh kah in le an ruahdamh in an kah hna, mi an tlaih hna cun an hrem hna caah mipi hna nih ralringten um kal ding in Yangon ramthen hmunhma zohfeltu phu nih ralrin peknak cathanh an chuah.

Ralhrang phu nih hramhram sianginn an kaiter mi hna tanghra exam result hna cu kan cohlang lai lo tiah NUG nih a thanh. Hramhram nawlngeihnak la tu ralhrang phu hna nih fialchom mi tanghra exam result hna cu federal fimcawnnak nih tuah timhmi university, college le science lei sianginn nih theihpinak le cohlannak kan tuah lai lo tiah NUG cozah in Ministry of Education nih nihin November 15 ah cathanh a chuah.

“Ramchung ramleng le ramkip nih theihpi lo mi phungninglo ralhrang phu kuttang fimcawnnak le riantuannak dihlak cu phungninglo tiah thanh cang mi a si caah, ralhrang phu nih a tuahmi tanghra exam result hna cu federal system in tuah timhmi university, college le science lei sianginn nih theihpinak le cohlannak a um lai lo” tiah an cathanh chungah cun an langhter.

NUG cozah, ministry of education department in mizapi nih telkhawhnak tanghra exam system cu mizapi lungtlinnak he ceihhmai in khuakhan a si lai. Siangngakchia le nu le pa hna lungtlinnak um lo in tanghra exam tuahding, tukum exam tuahkhawh nak ding ah min i pek le, min pek lo ah cun hi hnu kum hmailei caan zong ah exam tuahkhawnak nawl pek nan si lai lo tiah ralhrang phu nih stress peknak le tlerhkhonh nak an tuahmi cung ah thinphan ding a um lo tiah an cathanh chungah an langhter chih.

Tayatchawng peng ah inn za uktu thah a tong. Taningtari ramthen Tayatchawng peng Sawphia khuakomh inn za uktu hlun simi pakhat cu ni zaan ah meithal kah in thah a tong tiah khuami hna sinin theih a si. November 14, suimilam 1:30 hrawngah Kyauthleika khua ruber dum tuahnak hmun a kal lioah meithal kah in thah a ton hi a si tiah khuami pakhat nih a chim.

“Zinglei ruber dum a kal lei ah meithal kah a tong, a lu ah an hliamh caah cuka hmun ah cun a thi colh. A hlan ah a mah cu inn za uktu a si na in a tu ah cun a tuan tilo mi a si” tiah a chim. Meithal kah in thah a tongmi Soe Naing cu ralhrang phu hna sin ah thawngpe tu a si, ralhrang sin thawngpeknak tuah ti lo ding in ralrin pek a rak sicang nain, ralhrang sin thawngpek a ngol lo caah mizapi vengtu ralkap phu hna nih meithal kah in an thah nak hi a si. Credit: The Chin Post