Nihin May 11 zan suimilam 7:00 in Hakha ah fak ngai in ruah a sur. Khuadawm cu a tam lo nain a sur ning hi a fah ngai caah Mocha Cyclone thlichia le ruah hruaitu a si kho, tiah tualchung mi cheukhat nih an zumh.
Nihin zing suimilam 10:00 hrawng ah Yangon peng cheukhat zong ah ruah fak ngai in a sur, tiah Yangon ummi hna nih an chim. Myanmar ramchung le Mizoram lei ah May 13 in Mocha cyclone a hrang kho tiin khuacaan tuaktantu hna nih thawng an thanh i, cozah le zatlangbu hruaitu hna zong nih mipi sin ralrinpeknak an thanh cio hna.
Chinram Ah Ni 5 Chung Faak Ngai In Ruah A Sur Kho! Chin ramkulh ah May 13-17 tiang ni 5 chung faak ngai in ruah a sur kho. Mincimhnak zong a chuak khomi a si pinah a dangdang harnak tampi zong a chuahpi khomi a si caah biatak tein ralrin cio a herh, tiah khuacaan tuaktantu hna nih an chim.
Mocha Thlichia Le Ruah Faak Ton Sual Tikah Hakha Khua Um Mizapi Nih Zulh Ding Thawngthanhnak An Tuah; Mocha thlichia le ruah fak cu May 8 zan in kawlram hmun cheukhat ah a phan cang i Lairam le Hakha lei zong a phan kho mi a si. Cu thlichia le ruah a sur sual tikah i dornak kong he pehtlai in Main Committee Meeting(BCM) nih, May 9 ah Hakha mizapi nih zulh cio ding biachahnak an tuah.
Mocha thlichia le ruah fak kan ton sual ahcun mincimhnak a chuak khomi a si. Cu ruangah mahle inn pawngkam luti luannak siamremh ding, electric mei a rawk khomi a si caah innchung mei ṭha tein chekhlat ding, dahmei a ṭhami i chiah cio ding le khualtlawn le lengchuah hrial rih dingin nawlngeitu hna nih theihternak an tuah.
Thlichia le ruah fak nih a kan phak sual ahcun HBC, Zion, Agape le Bethel nih mahle darkhing cio tum ding a si lai. Darkhing an tum ahcun mahle umnak sang le veng in aa naihnak bik Biakinn ah i dor dingin BCM nih ralrin peknak an tuah.
Biakinn ah i dor dingin timhtuahnak a ngeimi vialte ca ah Khrihfabu kip motor hmang cio ding in le motor ngei hna nih zanghlei cawi i chuah cio ding in theihternak an tuah.
Mocha thlichia cu Cyclone ah aa thleng khomi dirhmun a si caah mizapi cu ralring tein um cio ding in khuacaan tuaktantu hna nih an thanh.
SAC Ralkap Nih Nyaungpinthar Khuami 17 Cu A Bu In An Khangh Hna! Bago ramṭhen, Htantapin peng Nyaungpinthar khuami ngakchia 7 telh in tualchung mi 17 cu SAC ralkap nih mei in an khangh hna, tiah PDF in ralkap pakhat nih a chim.
May 10 zinglei suimilam 10:00 in zanlei suimilam 5:00 tiang Nyaungpinthar khua pawng ah SAC ralkap le KNU, PDF kar kahdohnak a chuak i SAC ralkap 20 an thi, ralbawi pakhat telh in ralkap 3 an tlaih hna. SAC ralkap lei a thimi an tam caah ngakchia 7 telh in tualchung mi 17 cu mei in an khangh hna, tiah theih a si.
“May 10 zing suimilam 10:00 in zanlei suimilam 5:00 tiang kahdohnak voi 5 a chuak i SAC ralkap 20 nak tlawm lo an thi, 10 hliamhma an tuar. A thimi an tam caah tualchung mi 17 cu a bu in mei in an khangh hna,” tiah PDF in ralkap pakhat nih a chim.
KNU Hmunram in Thla 4 Chung Kahdohnak Ah SAC Ralkap 1,600 Leng An Thi; KNU ramchung, Kawthulay hmunram in thla 4 chung ah kahdohnak voi 1,642 a chuak i, SAC ralkap 1,736 leng an thi, tiah KNU nih nihin May 11 ah cathanh an chuah.
Thla 4 chung kahdohnak ah SAC ralkap 1,188 hliam an tuar i KNLA le KNDO lei in ralkap 59 nih ram le miphun ca ah an nunnak an pek. Minung 196 hliamhma an pu i PDF zong tam ngai hliamhma an pu ve, tiah KNU nih an langhter. KNU hmunram kahdohnak ah SAC ralkap nih nuhrin covo an buar ruangah Karen ramchung um minung sing 4 leng cu ralhrial in an zam, tiah theih a si.
Ralhrial mi an tam ruangah 2023 January thawk in KNU nih Karen ramchung ummi minung 85,000 ca ah thla fatin eidin facang an bawmh hna, tiah theih a si. Ralhrial mi hna eidin tirawl an chambau pinah umnak inn le lo, ngandamnak le sii-ai an zong an chambau. Kawthulay hmunram kahdohnak ruangah ralhrial in a zammi tualchung mi hna bawmchantu poh cu lunglawm tein kan in kan cohlan ko hna, tiah KNU nih an langhter. Credite; The Chin Post