Thantlang Thluachuah Peknak!

THANTLANG THLUACHUAH PEKNAK
=========
Mizei maw nih, diriamhnak in an au hnawhmi Thantlang khua, thla kan campiak. Na cungah țhatlonak a tuahtu hna cu khulrang in BAWIPA nih phu in hlampiak selaw, na chungin thianh si cang ko hna seh. Zeitikhmanh ah na cungah țhatlonak tuahin tluang khawng kho ti hna hlah seh.

An in diriamhnak aw vialte cu Thluachuah ah i cang dih selaw, BAWIPA PATHIAN ngaihthiam nak le Zaangfahnak Khuaruahhar cu na cungah um ko seh. Na thangchiatnak le an inthangchiatnak lonhin BAWIPA Khuaruahhat a Vel nih in tuam selaw, BAWIPA Dawtnak kut nih zohchunhtlak khua țha le dawhah in sersiam ko seh.

Thantlang khuami vialte cungah, BAWIPA PATHIAN Vel ngeihnak Khuaruahhar le a Zaangfahnak Khuaruahhar le a Dawtnak Khuaruahhar cu um selaw, inhnem hna selaw, indam ter hna selaw, in tungmer in, in sersiam ko hna seh. Thantlang, BAWIPA JESUH KHRIH MIN in Thluachuah kan pek. Amen.

ZUMTU KAN MAN TAHNAK LE KAN MAN TAKTAK; Laimi nih, a thlum le thlum lo, a thawt le thawtlo tahchunhnak ah kan hman ngaimi cu, ‘khuaihliti’ hi a si. Khuaihliti bantuk in a thaw, khuaihliti bantukin a tlum, khuaihliti nakin a thlum deuh, tibantuk in kan hman tawn! Khua pakhatkhat a kih a lum tahnak ah, Hakha hi kan hman ngai ve! Hakha nak in a kik deuh, Hakha tluk in a kik ve, Hakha nakin a lum deuh, tibantuk in kan hman ngai. Kannih PATHIAN Fa le siseh, PATHIAN rianțuantu si hna seh, kan man tahnak cu KHRIH hi a si ve.

Zumtu, PATHIAN Fa le ‘kan man (Value) hi,’ kan i dawhnak, kan pumrua țhatnak, kan rumnak, kan fimthiamnak hna le kan degree sannak hna ah an um lo. Cun, THLARAU laksawng kan tincomi zongah aa hngat lo. Kan rianțuan khawhnak le hlawhtlinnak hna ah, ‘kan man (Value) cu a um lo.

Kan fimthiamnak te hna, minthannak te hna, THLARAU laksawng kan hmuhmi te hna, PATHIAN nih a kan hman i kan hlawhtlinnak te hna ahhin, ‘kan man (Value)’ taktak cu a rak um lo. Zumtu, PATHIAN Fa le pumpak cio ‘kan man’ taktak cu, KHRIH a si i, cu KHRIH he cun, zeitluk thuk le tam indah kan i pehtlaih cang!

Zeitluk indah KHRIH cu kan sinah aa phuan i kan hngalh ti ahhin, ‘kan man taktak ( Value) cu’ a rak um! Khuaruahhar in PATHIAN nih a kan hmannak hi kan man taktak a si lo. A zawt ruang i ihkhun cungah a it peng mi nih KHRIH hngalhnak ah a kan tei ahcun, BAWIPA PATHIAN Hmai ahcun tei kan rak si diam!

SUAL NGAIHCHIHNAK LE LUNG LAWMHNAK; Lian Ngan Bik BAWIPA PATHIAN Vel ngeihnak Khuaruahhar le a Zaangfahnak Khuaruahhar le a Dawtnak Khuaruahhar cu, misual, sual ngaihchih awk a hngal lo mi hna le sual ngaichih a thiam lomi hna le sual aa ngaichih kho lomi, Laimi/Chin Miphun dihlak cungah phanin khat ko seh.

Khuaruahhar a Vel nih in zel hna selaw, Khuaruahhar a Zaangfahnak cu nan cungah um selaw, a Dawtnak Khuaruahhar in intawng hna selaw, indam ter ko hna seh. Cuticun, Sual i ngaihchihnak le KHRIH ah i dinhnak le thlarau thar le thinlung thar, THIANG THLARAU tinco nak le khahnak hna cu nan cungah um ko seh. Cuticun, Kan PA kan PATHIAN aa lawmhnak le a vancungmi hna an i lawmhnak cu vancung khua khi khat ko seh. Amen. BAWIPA ka PATHIAN ka lawm tuk!

THLACAMNAK; Lian Ngan Bik BAWIPA PATHIAN Dawtnak Khuaruahhar le Khuaruahhar a Zaangfahnak le Khuaruahhar a Vel ngeihnak cu, thlarau, taksa in bawmh a herh tukmi Laimi/Chinmi nan dihlak cungah, ni bangin tlang selaw, thli bangin in hranh hna selaw, ruah bantukin in surh hna selaw, chum bantukin in zelh ko hna seh. Khuaruahhar sual i ngaihchihnak le KHRIH JESUH he i lawmh ți nak cu um ko seh!

Cuticun, BAWIPA PATHIAN Vel ngeihnak Khuaruahhar le a Zaangfahnak Khuaruahhar le a Dawtnak Khuaruahhar cu, tlangcung mi hna le kawlmi hna le vawlei cung mi hna cungah karh selaw, khat dih selaw, thlarau khamhnak Khuaruahhar cu hmu cio ko hna seh! BAWIPA JESUH KHRIH MIN in, amen. KHRIH Lamkaltu, Tluang Lian (pMartar)