Thantlang Kongah An Ramri!

THANTLANG KONG AH AN RAMRI
==========
Thantlang khua cu an khangh cuahmah ko! An ramri chung ahcun an duh paohin an cawl kho rih ko lai. Sihmanhselaw an lonh khawh lomi ramri a um ko mu. Thla kan cam i BAWIPA nih a hmuh ko. Nan khuaruahhar hlah u; atu i a kaangmi nak let tamin, PATHIAN zaangfahnak le a Thluachuah kan hmuh țhan hrimhrim lai. A hlannak dawh le țha-in, inn le lo zong rianh țhan an si lai.

Nihin, kan thinhunnak le kan lungfahnak hi, BAWIPA nih kan Miphun caah a țha lei in thluachuah a pek ko. Kan Ram le kan Miphun caah i biatak chinchin in kan țannak le tha zaang kan chuah chinchinnak ah hmang ko hna usih. U le nau hna, Miphun hawi hna, biațhalo le holh dawh lo chim kha i sum ko u. Kan thlacamnak hi zeihmanh nih dawn kho hlah seh. Kan ral an si ko zongah holh chia le holh dawh lo in va volhpamh theng an hau lo. Cuticun, kan thlacamnak hi dawntu a um lai lo i kan him lai, kan tei hna lai.

Thantlang i a ummi ral hna nih Khin, ramri an ngei i an lonh khawh lomi ramri a um ko. Inn le lo le kan thilri kan ven khawh lomi, PATHIAN zong nih a kan venpiak lomi kongah Lungrethei in kan um awk a si lo; Job bantukin, BAWIPA nih a kan pek i, BAWIPA nih a lak țhan, Sihmanhselaw Job bantukin a let in a kan peek țhan lai ti ko usih.

PATHIAN nih a pekmi hna ramri chung ahcun, țhua ve ko rih hna seh! An donghnak ramri an phan lai i an lo ko lai. Kan thinhunnak le lungfahnak hi a țhalei in mer hna usih. Fimhring te le ralțha takin um usih; Zeitluk indah pengkhat le pengkhat kan i lungrual i kan țanti a herh le kan Ram le Miphun caah țuan a herh ti kha ruat chinchin hna usih.

Satan nih, Job nih a ngeihmi vialte le a fa le vialte cu hrawkin that dih hna hmanhselaw, lonh khawh lomi ramri a ngei. Thantlang i a ummi ral hna zong hi ramri bite chungah a ummi an si ko. Thantlang khuami vialte le Miphun hawi vialte hna, kan khuapi hna le kan khuate hna an kan khanghpiak ruangah nan lungrawk in nan lungdong hrimhrim hlah u.

BAWIPA Vel le a Dawtnak, a Zaangfahnak le a Thluachuahnak a rat țhan lai kha philh hrimhrim hlah u. BAWIPA PATHIAN Vel nih lungțhawnnak in pe ko hna seh.

THANTLANG KHUA CIAM KO HMANHSE BAWIPA AHCUN KA LAWM THIAMTHIAM KO LAI! BAWIPA nih a kan pek i BAWIPA nih a lak țhan. BAWIPA nih let tampi Thluachuah he a kan pek țhan lai. Biakinn kan sung, Biakinn ngeitu BAWIPA kan sung lo. Inn kan sung, inn hmun cu kan sung lo. Kan chawva ngeih chiah kan sung, kanmah kan nun kan sung lo. BAWIPA ahcun ka lawm thiamthiam ko lai.

Abiapi cemmi pathum, BAWIPA, kan nunnak le kan inn hmun kan ngei ko rih. Hi pathum hmang hin, Thantlang khua cu dawh deuh le rem deuh le lam zong kau deuhin sak le remh a si țhan te lai. Kan ngaihchiatnak cu ngan ko hmanhse, BAWIPA nih a kan timhpiakmi a ngan deuh. BAWIPA cu ka lawmh thiamthiam ko lai.

BAWIPA nih Thantlang khuami vialte le Miphun dawtu vialte hna intuarthiamnak le lungțhawnnak in pe ko hna seh. Thantlang khua nih aman nan peekmi vialte hi, kan Ram le kan Miphun caah Thluachuahnak ah, BAWIPA nih a canter lai i, vantawng in, an sualnak ruangah khulrang in an rawk ko lai. Cucu khuadang tampi himnak a si ko lai.

Thantlang khuami vialte le Miphun dawtu vialte hna, “kan inn cu zat a kang cang e, Thantlang khua a ciam dih cang e,” tiin thinhung ngaihchia in um hram hlah u. Satan hi caanțha pe hlah usih. Kan Ram kan Miphun caah aman kan pek ti tuin i uang deuh hna usih.

BAWIPA cu ka zumh! Hi bantuk ruang ahhin dah kaw, PATHIAN bawmhnak Khuaruahhar cu kan hmuh tuannak a si lai cu! Faro le a ralkapbu hna rili sen ah an thih dihnak hnga, Faro lung a țhawntertu kha BAWIPA a si. BAWIPA nih a onh hna lo ahcun, thil țhalo hi an tuah kho lai lo. Kan Ram le kan Miphun kan luat khawhnak hnga, Thantlang khua nih aman nan pekmi hi a Ropui tuk! Tuh caan te i nan tuhmi hi, BAWIPA nih Thluachuah an pek hrimhrim hna lai i, khuadang tampi luatnak ah a cang fawn lai.

Thantlang khua nih kan Ram le Miphun caah aman tamcem nan pekmi hi ka uang tuk ko. Ahohmanh mawh chiat ding an um lo. Thantlang khua remh țhannak caah a sing 5 ka thawh. BAWIPA ahcun ka lawm thiamthiam ko lai, BAWIPA cu ka lawmh thiamthiam ko lai.

AN LONH KHAWH LO MI RAMRI CHIAHPIAK AN SI KO! Job 14:5, NANGMAH nih a lonh khawh lomi ramri kha na serpiak. BAWIPA kan PATHIAN nihhin a sermi thil hna hi, ri, ramri, hi vial hi na tuah khawh, hi vial hi na phan kho, hi vial hi na nawl ngeihnak a si lai, ti bantuk in ramri a chiahpiak tawn hna. Rili zong an lonh khawh lomi ramri kha a ser piak hna (Job 38:9-10; Salm 104:6-9). Khuachia hna zong an nawlngeihnak ramri a chiah piak hna i an lonh ahcun, vawlei tang muilak ah Khin cikcin in an hren hna (Jude 6).

PATHIAN nih a bawmhmi a dohtu hna, mithalo hna zong hi ramri an ngei i an lonh khawh lomi ramri PATHIAN nih a chiahpiak tawn hna. An donghnak ramri an phak hlan cu an duhduh in an sual kho ko. Sihmanhselaw an donghnak ramri an phak tikcun, chikhat ah an rawk i an lo tawn ko. An fimthiamnak, an rak tamnak le an rak țhawnnak te hna nihkhan a khamh kho hna lo.

Faro lung a țhawnter tu cu BAWIPA a si i, a lonh khawh lomi ramri a serpiaktu zong BAWIPA thiamthiam si. Faro ramri cu rili sen kha a si i a ramri rili sen a phak hlan kha cu rawhnak le sunghnak tong cuahmah ko hmanhse, a lung a țhawng; sal i a chiahmi hna Israel mi hna cungah țhatlonak tuah kha aa tim thiamthiam peng ko. Sihmanhselaw, BAWIPA nih ramri a chiahpiakmi rilisen a phak tikcun, minthang Faro le a Ralkapbu hna cu chikhat ah an lo ko.

Mițhalo, Absolom nih David bawi țhutdan cu a cuh caah David le a mi hna cu an rak zaam. PATHIAN nih ramri a chiahpiakmi a phak hlan cu Absalom cu a lam a tluang ko. Sihmanhselaw a a donghnak ramri a phak cun, zohchia ngaiin thingkar ah a lu a tenh i cuka ahcun an thah! Ruahnak a cheutu mifim Ahithophel zong hri in a awk that. Kan Bible ah hri in aa awk thatmi pahnih a țial i Ahithophel le Juda Iskariot an si. An pahnih tein, PATHIAN chiti thuhmi an thihnak hnga khuakhaangtu veve an si.

PATHIAN umnak Samaria khua cu Siria siangpahrang Benhadad nih a dum i Samaria khuachung ah Mangțaam faakpi in a rak um. Misual Benhadad nih a donghnak ramri a phak hlan cu, Samaria khua cung ah fahnak harnak a tlun ter khawh ngaingai ko. Sihmanhselaw, a donghnak ramri, “Thaizing,” a hung phak cun, BAWIPA nih asal Elisha ka in a chim bantukin Siria ralkapbu cu an lo dih i Samaria khuachung ah ei cawk lo rawl an ngei țhan.

Juda siangpahrang Hezekiah le a umnak Jerusalem cu Assiria siangpahrang Sennakherib nih a hun hnawh i tluang a hun khawnhnawh len ko. “Aho PATHIAN nih ka kut chunghin an khamh kho hna lai maw,” a ti. Profet Isaiah le siangpahrang Hezekiah nih thla an cam. BAWIPA nih an thlacamnak cu a ngaih i, Sennakherib cu ramri a hun serpiak. Assiria siangpahrang Sennakherib a ramri cu BAWIPA vancungmi kha a si. BAWIPA vancungmi nih 185,000 a va thah hna. Nineveh ah a tlung i a pathian a biak lioah a mah a fa pa le bak nih an thah ko.

Nihin, kannih kan ram zong hi a cunglei i ka rak langhter cang bantuk khin, BAWIPA PATHIAN nih an donghnak ramri a chiahpiak ko hna ti hi zumtu unau hna, nan sinah chim ka duh hringhran ko. An donghnak ramri an phak hlan chungte hi cu an țhalo in an sual kho ko rih lai.

Sihmanhselaw, BAWIPA nih Izipt siangpahrang Faro bantukin an donghnak ramri a chiahpiak ko hna; i, an ramri cu an phan zau ko lai. Cu ramri an phak tik ahcun, kum 60/70 an rak i renh cangmi an hriamnam le an țhawnnak hna nih sullam a ngei kho hrimhrim lai lo. An nih an ramri cu, Chin Miphun kan PATHIAN, BAWIPA kan PATHIAN hi a si. Hngak ko u, zoh ko u, BAWIPA cu a tlai bal lo.

BAWIPA Țhawnnak nih, mipi vialte cungah thla zar selaw, Khuaruahhar a Vel le a Dawtnak nih hnangam Daihnak in pe ko hna seh. KHRIH Lamkaltu, Tluang Lian (Martar).