Thantlang Chuah Taak Dih A Sinak Aruang?

Thantlang Chuah Taak Dih A Sinak Aruang? (Ka Hmuh Ning)
=========
CDF le CNA nih chuah uh kan kah lai kan kian uh an ti caah kan chuak tiah ti a si. A dik maw? A hrampi hawl usih. Thantlang cu saihphiozi sang ah pakhat pa a pawfaak tiin chim mi kha sianginn sang ahcun a ek ai thloh tiah bia a chuak kho, cu cu pheh thuh lo tein kan sining a si. Khuachuah taak ai thok hi a voikhatnak khuachung kahdohnak in ai thok mi a si.

Zeitindah ai thok hmasa tiah cun CDF le CNA nih an ti le timi um lo tein ai thok mi a si. A si kho deuh mi le ramdang um fanau a ngei deuh mi hna kha an fale cio nih humhimnak duh ah khuachung buai ahcun khuate lei tel ah rak i dor ko ulaw nan duh si le mizoram ah ram daih hlan tiang cu vai dor ko uh. Dam te um cun kan in cawm khawh ko hna tiin an van kan forhfial cio caah zaam hram ai thok hi a si.

Cu nih a van hrin mi pakhat cu inn pa an van zaam cio kha a si, cu tik ah mah lawng um ngam a si ve ti lo i a ttha na loin khuakhaan i zaam cio a hung si ve. Cupinah a cheu nih kan nau le nih zaam ko uh a kan ti tiah an chim nain dothlat tikah CDF le CNA min in zaam fialnak le thlauhnak a um hrimhrim lo ti hmuh khawh a si. A um mi pakhat tu cu mah fanau le a chung cawlcang mi sin ah khan mah pumpak nih an ruahnak hei hal a si.

Cutikah nan zaam zongah a ttha ve ko tiah an timi bia kha an chawh ter i hnu ahcun CDF le CNA nih chuak dih uh kan kah hna lai kan kian uh an kan ti tiah bia a chuak. Cucu Thantlang kan sining (khuapi tuk kan si lonak) nih a hrin mi a si. September 18 ni inn 18 a kangh i kan Pastor a kan thah piak lio ah khan Thantlang um cheuli ah cheu thum cu an zaam dih cang. (Hi ni tiang ka chungle an um ve) Sihmanhsehlaw inn pa ngeih lo si,

Meithal le bomb thawng si, inn kangh si, pastor te thahnawn piak a si tikah tuar khawhnak kan ngeih mi nih a celh lo i a zaat cio ti lo tikah september 19 ni in zaam dih a si. Hi zaam dih dingah a ho forhfialnak le hneknak le zaam ternak a um bak lo, ni 19 ni a zaam mi kha hal cio hna ulaw mah duh tein ral le sa lak ah inn pa chakthlang um loin khuasak khawh a si bak lo caah a si an ti cio lai ka zumh.

Cucaah Thantlang zaam taak dih a si nak hi a ho ruang hmanh ah a si hlei lo. Kan khua sining (khuapi lian ngaingai) kan si lonak nih a chuahpi mi a si. Curuang ah kanmah le kanmah cungah mawhchiat awk hohmanh kan um lo i thangtthat hlei awk hohmanh kan um lo. A hrihhrampi simi ralhrang kha an si bik ko. Mawhchiat le thinhaan hnawh ding mi i palh lo a herh. VK CDMers (MoE) Vuanthok 16.12.2021.credit-Salai Van Kung.