Thantlang Caah A Thlum Kho Hnga Maw?

Thantlang Caah A Thlum Kho Hnga Maw?
==========
A Thlum mi Thla le A Sunglawi mi Nisunglawi Christmas ni cu Thantlang Khuami nih cun tukum ahcun a thlum nak le a Sunlawi nak, A thlum nak kan tep kho lai lo hi teh mu.

Kan Khuapi Aciam, Achung ummi minung kan riangvai dih. Ti Chung, Ti ral, Mi Khual khua le Mi innlo tangah Khua kan sa. Ramchung ramleng Khuahngal dawtu hna Pek thenh to in kan tthu kan dir kan ei kan ding. Dawtu hna Hmai khah lo nih dangkhat Cu lak ahcun zeitin dah kan caah cun a thlum khawh hnga mu.

Kan fa le nih kumdang bang Christmas Angki, Bawngbi, Thil zalh hau hna Cheukhat nulepa caah Fale zoh ah mitthli a luang hnar no a tam. A cheukhat chungkhar caah chungkhar kan tling ti lo. A Cheu ramtang ah, A cheu Thlanmual ah. Nu le Va cheukhat hmunkhat ah kan um kho ti lo.

Cu lawng hlah Kum (60) leng Kan Nu le kan pa hna nih anrak Siamremh mi le kan rianh mi khua Kan Thantlang, kan inn lo 600 deng a ciam. Ralhrang kut in kandawt mi minung (7) nih an kan liam tak. Minung (27) nih hliam hma kan tuar mah bu cun kan caah a thlum kho hnga maw?

Cu lawng hlah, Arbang kan vaih nak ah mah le inn le lo ngei lo bang Mi khual Khua, mi inn lo tang thutdir lio caan ah Zawt le fah ruangah Kan dawt tuk mi hna, kan nu le kan pa, Pi le pu, kan U nau, Kan fale minung (21) nih Thlapa thla (3) chungah an kan thih tak. Zeitin dah kan caah cun a thlum khawh hnga mu.

(Thantlang Khua le Thantlang Mipi caah “A Thlum lo mi 2021, Christmas” A kan hrawmpi tu Hakha mipi nan cungah kan i lawm tuk). Credit: Pu Ram Khar

Maw Hakha Na Hme Nai Sai Lo! Bawi Jesuh a chuah lainak kong kha Jerusalem i a ummi Baibal lei thiamsang hna nih Herod an chimh ning ahcun Bethlehem khua ah Messiah cu a chuak lai an ti. Biakam Hlun profet chimchung mi bia kha an char:

“Maw Bethlehem, nangmah cu Judea ram khuapi hna lak ah a hme bik na si nai sai lo, nangmah chung in Israel mi tukhal a chuak lai,” (Matthai 2:6; Mik. 5:2) a timi kha chirhchan in an chimh. Salm 89 kan rel ahcun David ciruang in Israel hruaitu pek a si lainak kha fiang chinchin in rel khawh a si: “A tefa pakhat cu siangpa-hrang a si zungzal lai; a bawi ṭhutdan cu van a hmunh chung paoh a hmun ve lai,” a ti (Salm 89:29). Kan Bawipa Jesuh Khrih, kan tukhal ṭha dawtnak cu a hmun zungzal ko ee.

Ka thlacamnak: “Maw, Hakha, nangmah cu Kawlram chung khuapi hna lak ah a hme bik na si nai sai lo; nangmah hmang in Khrih ceunak cu ram chungah thanh a si lai, tlangcung i tlakmi khua, zeihmanh nih a phenh khawh lomi bantukin miphun hna lak ah Khrih ceunak tehte na si ve lai,” ti hi a si.

Hakha khualipi pakhat te lawnglawng hi Kawlram chungah khrihfa khualipi a si. Augustine nih “Pathian khualipi” timi ca a ṭial bang, Hakha hi Kawlram caah Pathian khualipi si ve hram seh! A chung ummi khrihfa kan dihlak ṭuanvo nganpi kan ngei, cucu Hakha a rak phanmi, a rak pemmi, khua a sami, miphun vialte, palik, ralkap le cozah rian ṭuan vialte huap in mi vialte kha Khrih ceunak chungah le khamhnak chungah kan luhpi ve hna ding a si.

Hakha khualipi hi Pathian dawtnak tehte ṭha dirhmun ah dir ter ve usih. Hakha khualipi chungin dinnak ti-hna chuak sehlaw Kawlram dihlak ah luanter hna usih. Hakha khualipi cu Jerusalem thar bantuk ah sersiam hna usih law, Pathian khualipi siter hna usih. Sifak rethei nih rawl an hmuhnak, mizaw le hlawtmi hna nih damnak le dawtnak an hmuhnak khualipi ah sersiam ve hna usih.

Kan mino hna cu an fim i nunzia dawh a ngeih i tlawm a ngaimi, US le Japan mino pawl bang nunthaap a ngamhmi ah sersiam hna usih. Singapore cu mi vialte nih tlawn an duh dih bantukin, Hakha cu mi vialte khualipi ah sersiam ve hna usih, Pathian nih a thuamh piak ciami kan zilthli le Hakha khuati caan zong hi mi vialte hrawmh ve hna usih. Maw, Hakha, nangmah cu Kawlram chung khualipi hna lak ah a hme bik na si naisai lo! Credit: 𝗥𝗲𝘃 𝗗𝗿 𝗟𝗮𝗹 𝗣𝗲𝗸 𝗟𝗶𝗮𝗻

Rungtlang; Rungtlang cu Halkha tiah auh khawh ding a si i, Halkha zong Rungtlang tiah auh khawh ding a si ve. Zeicahtiah, Halkha cu Rungtlang ah ai benhmi le hram a thlami Rung toi ah a um mi khuapi a si.

Rungtlang hi khuaruahhar in a ttha mi le man a ngei mi tlang a si. Rungtlang hi ti tampi a chuahnak hmun le cerh tiput in a khahnak tlang a si. Rungtlang bantuk in ti hmunkip ah a chuak mi tlang a tutiang ka hmu rih hna lo. Nihin ni tiang Halkha khuasa hna nih cu ti cu kan din i cu ti in an toih mi cinthlak cu kan to.

Bisakut, Antam, Kawpi, Alu, Bailep, Apple, Satchuma, Pear, Thawhpat, Cherry, Stawberry Fungvai le thlaithei phun zakip nih an duh mi vulei le khuacaan a ngeimi tlang a si. Halkha khua in a chuak mi thlai le thlak hna cu khuadang thlai le thlak hna nakin an thaw khun fawn.

Halkha khua hi kokek pangpar le theitlai hrimhrim in a khahnak tlang a si. Cu hna cu; Tummatil, Hru, Mohteng, Dongkuar, Tialbawp, Ramanfangkha, Tlangpurun, Memu, Kuhchuk, Theihmung, Cawkpaek, Chawkhleipar rang, Chawkhleipar sen, Phaizawng, Seripar, Dingdipar, Thingkepar phungtling le Thingkung phuntling in a khahnak/ a rak khahnak tlang a si.

Rungtlang hi, zu le va phunphun le saram phunphun an rak khahnak a si. Atu hmanh ah khin va phun a tangmi an tamtuk rih. Kan mah hna kan hngakchiat lio 1980 hrawng hmanhah Halkha khua Forest Department umnak hna ah khin Sakhi le Sachia phun kan hmuh len rih hna.

Voikhat hna cu ka upa nih vavu chai bak in a rak cheih. Cu ka upa cu Dawrthar tlangval pawl nih an zulh i ni nikhat ah zubui bui 16 hrawng an rak tleih bal. Zubui cal de hna an rak um. Zuco le zufi kua cawh ko kha a rak nuam. Zankhat cu kan upa nih RCM chak ah zuco awnh ka theih a rak ti i a thaizing ah a kua kan va kawl i Halkha Viewpoint thlang ah khin a kua kan va hmuh hna. Zuco kua kan rak co i tamngai kan rak tleih.

Halkha khuasa vialte cu; Rungtlang in a hung hrang mi thlizil a dawp i, Rungtlang in a put mi ti a dingmi le Rungtlang vulei in a chuak mi thlaithar le sattil ar le va in a tthang mi le a nungmi lawngte kan si. Vulei cungah ka duhbik mi rawl le ngandamnak ca zongah a ttha bik lai tiah ka ruah mi cu, Halkha bisakut le anttam tlah mi chi phulh kha a si:)

Culawnghlah, Rungtlang kai i picnic tuah le khua cuanh hrim hrim kha cu a rak nuam law law ko. Atu ahcun, kawhlo sahrawng ui fir pawl nih tlumh hna kaw a poi lawlaw khi a si. Dawi zawkzawk hna an hau!

Rungtlang ti a si i supporting sentences pawl ah khin Rungtlang/Halkha kha kan caah zeitluk in dah san a tleih ti kha langhter ka duh mi a si. Cu bantuk khua ttha cu ui fir pawl ruangah a rawktuk cang ti zong kha ka langhter duhmi a si. Zei poh hi Pathian thawng lawng lte a si ko e, na hman ko e. Credit: Sui Bik Thang