Soe Win, Sawmnak kan tuah taktak cang lai!!!

Chawlehnak Rak Tuah Cio Dingin China le Russia Caa In Sawmnak Caa Kan Phozar Lai-Soe Win
======================
Thilawa Special Chawlehnak Zone (Thilawa Special Economic Zone) cu ramdang chawlehtu pawl an rak luh khawh nakhnga dingah sawmnak caa pawl cu China le Russia caa in kan tial lai i, kan phozar lai, tiah Soe Win nih a chim. Soe Win nih, ” FDI pawl tam deuh an rak luh khawh nakhnga ding ah Brochure pawl cu Russia, China le a dang hmunhma ram hna nih an duh mi caholh in phozar in theihternak tuah a herh cang, tiah Thilawa Special Economic Zone Management Committee in tuanvo ngeitu hna he tonbiaruahnak an ngeih lio ah a chim.

Kan ram ah rakrat in chawlehnak a rak tuah mi ram hna nih company hna i zumhnak ngah khawh nakhnga dingah tuanvo lak piak a herh i Kyauk Phyo (ကျောက်ဖြူ) le Dawei special chawlehnak Zone pawl cu a ran khawh chungin dihter dingin tuanvo lak a herh cang.

A um cia mi Company pawl riantuannak cu khar lo dingin le company thar zong an rak luh khawh nakhnga ding zongah tuanvo lak a herh, ti zongin a chim. A tu nihin tiangah Thilawa Special Chawlehnak Zone (Thilawa Special Economic Zone) ah ram fonh 21 in company 114 hna nih chawlhnak an rak tuah cang, tiahh theih a si.

Tamu Khua Ah Transportation and Communication Zung Cu Hriamtlai Phu Khat Nih An Khangh, Sagaing ramṭhen, Tamu khua Sawbua No.5 sang ummi Transportation and Communication(TC) zung cu, nizan October 28 zanlei ah min hngalh lomi hriamtlai phu khat nih an khangh, tiah tualchung mi nih an chim. TC zung a kangh hnu in kaphnih kar kahdohnak a chuak i, TC zung kam ah a ummi Tanyawsin(သံယောဇဉ်) dawr zong a kaang, tiah tualchung mi nih cun an chim.

“Zanlei sml 4:00 hrawng ah hriamtlai phu khat nih TC zung cu an khangh. Cu hnu caan tlawmpal ah SAC ralkap an ra i kahdohnak a chuak. TC zung kam ummi dawr pakhat zong a kaang,” tiah tualchung mi pakhat nih a chim. Min hngalh lomi hriamtlai phu khat nih TC zung an khangh lioah zung rianṭuantu aho hmanh an kai lo lio a si caah a thimi le aa hliammi an um lo, tiah theih a si.

Aizawl Khua Pawng Um Ralzam Mi cu MRRC -Mizoram Nih Eidin Cheukhat An Bawmh Hna, Myanmar ram in Mizoram ah ralzam in aa dormi Aizawl khua pawng Tuirial ralzam camp ah a ummi hna sinah MRRC -Mizoram phu nih, nizan October 28 ah eidin cheukhat an va pek chanh hna, tiah theih a si. MRRC -Mizoram nih ralzam mi an bawmhchanhmi thil hna cu Facang tun 20, a Taṭuh tun 3, chiti pung 5, alu tun 3, kalape tun 3 le piat tun 2 hna an si, tiah theih a si.

Passport Tuah Ding Ralhrang Nih An Rengh Caah Passport Ngahnak Ding Ah Sing 4 In Sing 6 Tiang SAC Ralhrang Kut-tang Rianṭuan Nih Ziknawh An Laak Hna!, Hramhram uknak latu ralhrang Min Aung Hlaing nih ramleng chuah a kham ruang ah Passport tuahnak zung nih passport chuahpiak ding an rengh tiah theih a si.

Nifatin Yangon passport zung hmai ah zing sml 6:00 in cun mipi an i tlang (တန်းစီ) dih cang hna. Uknak chuh hlan ah cun fawizaang tein kyats 30,000 in passport i ser khawh a si nain atu ah cun Kyats sing 4 in sing 6 tiang pek lawng ah passport ngah khawh a si cang tiah Khit Thit Media nih a langh ter. Passport tuah khawhnak ding ah har chin lengmang ding in a dotdot in an tuah.

Mipi i but lo ding in tiah online in booking tuah ter cia a si. Ralhrang nih tuahmi website, passport.gov.mm ah nifatin zung on caan zing sml 9:00 in QR Code laak a si. Website in zeitluk fel le ṭha in QR Code laak ko zong ah zung chung i palik le lahwahkah zung rianṭuantu hna ziknawh pek lo ah cun ngah khawh a si lo. QR Code laak har ding in an tuah, cun minutes 15 lawng hna an on tiah theih a si.

QR Code ngahnak ding ca ah a tlawm bik Kyats thong 50 in sing khat le cheu tiang pek an hau. A rang deuh duhmi nih tam deuh pek an hau tiah theih a si. A leeng puaisa sin in QR Code a la tu hna cheu khat cu a deu (အတု) a si tiah palik le zung rianṭuan hna nih ṭhawlmi zong an um tiah theih a si. QR Code ngah khawh hnu zong ah hmatpungṭin le takawngsazin an check hawi.

Hmatpungṭin le takawngsazin a chia tuk, ca a fiang ti lo tibantuk a phunphun in an kherh hawi hna, asinain tangka pek ah cun fawizaang tein an tuah piak hna. Passport tuah tik ah CDMer pawl tel lo ding, zung rianṭuan pawl tel lo ding, warrant chuahmi pawl tel lo ding le ramkhel he aa pehtlaimi pawl tel lo ding ti bantuk khamnak ruang ah Lahwahkah zungrianṭuan le palik hna caah caan ṭha tuk ah a cang.

Passport zung kutka cawng palik hmanh nih ting 300 leeng man motor hna an i ciit khawh ti a si. Zungrianṭuan pawl umnak inn chia tete ah an um nain sui le tangka ah an rum tiah KTM nih a langh ter. Cubantuk ṭhiamṭhiam in passport zung rianṭuantu hna zong an si ve. Chuncaw hmanh inn in i ken ti lo in rawl-dawr sangsang hna ah an i cah tiah theih a si. Ram leeng chuahding in mipi hna nih passport an i tuah i zungrianṭuan le palik hna nih an i rumnak!