Senthang le Senthang kongah thawngfiang theih a si cang!!

Tlaihkhih Nak Kong Fianhternak Ca Thanh-CDf-Hakha (B-2) Senthang!
======================
Senthang Council (SC) cu Senthang mipi nih dirh mi a si bantukin Senthang ramchung ahcun Senthang Council lawng hi Senthang peng ah dotla mi le mipi dirkmah tu bu a si. Cucaah Phaipha (B) ah a cang mi sianginn buaibai nak kong he pehtlain Senthang Council zung nih tawlrel piak dingin ca an rak tial.

Ca an rak tial bantukin Phaipha (B) ah a um mi sianginn cu Phaipha (B) Khua Council le Senthang Council nih 2022-2023 kum ah a tu lio caan karlak cozoh kan ngeih mi NUG, CNA/F le CIDC he pehtlaih nak a ngei mi Senthang Council tang um Education Department nih hman digin theihternak ca 9 October, 2022 ni ah tar a si.

1. Khua Council nih Sianginn ah ca tar mi cu voi khat an rak hrawh. Cun Senthang council nih a voi (2) nak catar than a si i mah zong cu hrawh plak than a si. Ca tar hrawh nak kong he pahtlaiin 10 October, 2022 ah Sang Hlei Hmung le Thang Lian Mang cu khuami sin in report a um caah Senthang Council zungah auh an si i upat nak he nawl ngai tein an ra.

2. 11 October, 2022 ah tonbiaruahnak ngeih a si tik ah Catar mi hrawhnak kong he pehtlai in sualnak zeihmanh an tuah l0 caah khua ah kir ter than an si.

3. Senthang Council le Khua Council ca tar mi hrawh tu hna cu Val Mang Hei Lian, Pu David le Pu Bawi Nawl hna hi an si tiah thawngfang theih than a si.

Cucaah Senthang Council phungphai ningin tuanvo ngeitu hna nih 11 October, 2022 ni ah tonbiaruahnak ngeih dingin a nem nak tein voi thum tiang auh an si i an rat duh lo caah a herh ning in Senthang Council nih tuavo lak an si

Cozah pakhat dirhmun in a dir mi nih phung ning in ca tarmi an hrawh ahcun Penal Code pohmah 173 ning in thong thlakhat tiang asiloah tangka 50000 MMK a siloah thong thlakhat tiang le tangka 50000MMK pahnih ning in dantat khawh a si.

Penal code pohmah 173 ning in tlaih mi minung pathum hna i an nu le pa hna cu 12 October 2022 1:00-3:00 PM ah Senthang Council zung rak phan dih ding in auh an si i tha tem ton biaruah le biaceihnak ngeth hnu ah tlaih mi minung pathum hna zong nih kan palh kan sual ko tiah an ti caah amahkhaannak in Zaniei 6:00 PM ah thlah than an si Senthang Council nih phung a buar lomi mipi tlahkhihnak zeihmanh a tuah lo.

Senthang Council rian tuan nak he pehtlain bia hmanlo chimrel lo ding le Media ah a dik lo mi thawng phozar lo dingin thawng kan in thanh hna. Senthang Council hi mipi nih dirh mi a si bantuk in mi pi ca rian a tuanmi le dirkamh tu bu a si caah Senthang Council riantuannak a hnuarrsuan tu le Senthang Council phungphai kalh in rian a tuantu bu siseh pumpak in siseh hhmai lei caan zong ah a herh ning in tuanvo lak an si zungzal lai. Executive Committee. Senthang Council.

CDf-Senthang Nih Cathanh An Chuah Mi, 1. Phaipha(B) khua cu mah le si khawh tawk in ralkap uknak thalo le hramhram uknak a doh ve mi khua pakhat asi, Cun Khuami hnatlaknak in 19 September 2021 ni ah khuabawi zong anmah te in an i thim. Phaipha (B) khua cu Senthang ram chung a ummi asi bantuk in 29 January 2022 ni ah Senthang Tribal Government he riantuan ti dingin khuami (86) percent hnatlaknak in aa pehtlai mi khua si.

2.Phaipha (B) khua Sianginn cu khua mi nih anmah te tawirelnak in 1 July 2022 ni ah tangriat ting on asi. Hi sianginn ah cachitu hna cu CDMers Saya/mah le Sianghleiruun a kai liomi volunteers saya/mah minung (9) hna un si.

3.9 October 2022 ni ah CDF-Hakha nih NUG, CJDC, CNF/A min hmang in Phaipha(B) khua Sianginn cu hramhram in kan hmang cang lai tiah ralin peknak cahanh chuah in sianginn vanpung ah an tar.

4.10 October 2022 ni ah CDF-Hakha nih hramhram in Salai Sang Hiei le Pu Thang Lian Mang hna cu zanlei suimilam (03:00) pm hrawngah hi kong be pehtlai in an tlaih hna. A cung lei pahnih hna cu 11 October 2022 ni chun suimilam (12:20) pm ah an rak thlah than hna.

5. 11 October 2022 ni zanlei suimilam (12:30) pm in Siangngakchia cachim CDM saya asi mi Pu Bawi Nawl (Khaabung) le Salai David (Hakha) le Sianghleiruun a kai liomi volunteer saya Mang Hei Lian (Phaipha-B) hna cu tlaih ding in Phaipha (B) khua ah an rak phan than. Hi kong he pehtlai in CDF-Senthang le Senthang Tribal Government hruaitu upa hna nih kaphnih rualrem tein tawirelnak ngeih ti ding ah kan sawm ko hna nain CDF-Hakha nih an cohlang duh lo

6.Cun Siangngakchia cachitu CDM saya Pu Bawi Nawl le Salai David le Sianghleiruun a kai liomi volunteer saya Mang Hei Lian hna cu zanlei suimilam (03:57) pm ah CDF-Hakha nih a konglam zeihmanh laughter to in khua nupa le mipi hmai ah thithreng khimh in hramhram in an tlaih hna.

7. Hi tluak in ralkap uknak tha lo le hramhram uknak kan doh lioah hramhram uknak hmangin khuami nih mah tein tuahmi sianginn cu hramhram in hman ding caah cathanh chuahmi siseh. NUG Fimchimnak zung CDM saya le volunteer saya pahnih hramhram in an tlaih hna nak cungah siseh Pau dothlennak a tuahmi CDF-Senthang le Senthang Tribal Government nih kan cohlan khawh lo caah a herh ningin tuanvo kan lak lai. Crd-Chinland Defense Force-Senthang.

MAH nih uknak a lak ruang ah uk nak tha lo hramhram uk nak a la tu MAH cu CDF, PDF ti ban tuk in dir le doh cio a si. Cucaah Hakha peng Senthang nih kan doh ve. News ah kan hmuh lengmang bang in ruahnak i khat lo ruang ah CDF Senthang a duh mi le Hakha CDF No. 2 tin Senthang mi ve ve CDF phu hnih ah kan i then.

CDF phu hnih i thennak ruangah Phaipha B khua mi zong ruah nak aa then ve. Cucaah Khua chung um mi dihlak general meeting tuah a si general meeting a kai mi tam deuh hna tlaknak in CDF Senthang ah um ding biafun a si. Cu Meeting lio ah Hakha CDF No. 2 a duh tu cu minung tlawmte lawng an si. Cu ve bantukin ramleng um Phaipha B khua mi hna zong Meeting tuah a si ve i CDF Senthang ah um ding in tam deuh hna tlaknak in bia khiah a si fon.

Phaipha khua mi ramchung/ ramleng meeting ah mi tam deuh nih duh mi le biachah mi kha cohlang lo in mi tlawm deuh hna nih kan khua chung ah buaibainak an chuah pi lengmang. Kan nih cu CNA/F/CJDC/NUG le Hakha CDF nih cohlang mi kan si tin khua mi kha a phun phun in an thih phaih lengmang hna caah khua chungah i hmuh thiam lo nak a karh chin chin. CNA ralbawi zong an auh in khua mi an chingchoh ter hna. No. 2 nan um lo ah cun action kan in lak hna lai tiah a phun phun in an hro hna an ching choh hna.

Kan khua mi dihlak i bawm in kan fa le Sianginn kai nak kan tuah piak hna Sianginn ah ca kan cawn ter mi hna zong hna hnawhnak an kan pek caah No. 2 lei tang nih Sianginn zong kan mah nih kan control cang lai nan hman kho ti lai lo tiah an ti hna.

Khua pakhat le a buu rian tuan nak ah mibu tam deuh duh nak si lo in mi tlawm deuh duh nak in mah ti an cawlcangh mi hi kan khuaruah a har tuk kan duh mi nan duh ve lo tiah hram hram in an um i Phaipha B khua nih ngeih mi Sianginn le Lopil hna an mah nih uh le control an duh mi kan hmu tikah a hnu a phen ah zei ban tuk buu le hriam tlai nih dah an tuah ter hna hnga ti hi kan khuaruah a har ngai ngai.

Nai te ah Senthang Council tiah Hakha CDF No. 2 a duh tu hna nih buu an rak ser i Hakha CDF No. 2 hna he rian an tuan ti hna. Cu hna nih cu a tang i hmanthlak ah kan hmuh mi catar hi Phaipha B khua mi dihlak hmuh ding in khua chung ah mah ca hi an rak tar. Mah ca an tar hnu tlawmpal October 10, 2022 ah Hakha CDF No. 2 lei i Ngun Hram Ling le Bawi Tha Ling Thang nih an rak thlah hna i Phaipha B khua mi minung pahnih an tliah hna I an kal pi hna.

An tliah mi hna Sang Hlei Hmung le Thang Lian Mang cu zahan ah an rak thlah than hna. A si nain nihin October 11, 2022 ah Hakha CDF No.2 lei Ngun Hram Ling le Bawi Tha Ling Thang an rak ra than i Phaipha B Khua mi nih Sianginn cachim tu kan hman mi hna minung pathum Bawi Nawl, Mang Hei Lian, David an tlaih than hna. An kut ah ah Handcuff an khih hna i an kal pi hna.

Zei ruang ah nan tlaih hna zei sual nak dah an tuah tiah an hal hna tik ah a cung lei order in kan tlaih mi hna si an ti. Cucaah Hakha CDF, CNA/F le CJDC he rian a tuan ti mi kan si tiah a hlan in mipi an hro an chingchoh lengmang hna caah mah hi zei ruang ah dah nan tlaih ter hna timi Phaipha B khua nih kan theih lo caah kan lung a fak kan ngeih a chia hringhran.

MAH nih hram hram a kan uk a uk nak kan duh lo caah MAH kan doh kan ti lio ah mah ti in mipi mi sasawh a mah um in a um ko mi na kan tanh lo na kan duh lo tiah hro le ching choh hnu ah mah ti Handcuff tiang in tlaih kan ton hi cu Phaiphai B khua mi pakhat ka dir hmun in ka ngei a chia ko. Lai mi kan pa le vial te hna Lai tlang i sualnak ngei lo mipi mah ti tlaih le chingchoh hna hi kan theih pah lengmang caah kan zawh sawh piak hrim hlah uh tiah nawl kan duh ko hna. Credit: Phaipha B, Than Ngio

Relchap,Paletwa Ah Sipin Nih Facang Cawhnuk Hrai (Pawng) 16 Ah 6700ks In An Zuar, Facang a donghcatnak Chin ramkulh Paletwa ah nihin October 12 chunhnu suimilam 2:00 ah sipin nih facang pawng (16) ah 6700Ks in facang an zuar tiah tualchung mi nih an chim.

A tubantuk in Paletwa khuachung ah sipin nih facang an zuar hi a voi hnihnak a si. “Nihin October 12, zinglei ah kan zuar lai tiah an chim, khuapi chung ah facang a dongcat cang caah khuapi tein facang cawk dingah an kal cio. Facang a dih ruang ah maw a si hnga, chun ah kan in zuarpuak hna lai tiah an ti ṭhan caah sipin pawl le tualchung mi kar i siknak zong a chuak deng,” tiah tualchung mi pakhat nih a chim.

A tubantuk in SAC ralkap nih anmah nih lam an phih caah facang a dongcat ko mi kongah anmah lila nih mipi hna caah facang kan zuar an timi hi mipi eidin pawcawmnak hi anmah duh ning lentecelhnak ding men ah an kan hman tiah khuami pakhat nih a chim.

Nihin zaanlei cu Paletwa khuachung mei a ra lo, cu hlan zong ah cun khuachung hi hmunhnih ah ṭhen in, ni khat dan in mei an kan pek i, mei rat caan cu nikhat ah suimilam 6 a si tawn, a tu ah cun nikhat dan an kan pek hlei ah mei pek caan hi suimilam 4 chung lawng a si dang tiah khuami pakhat nih a chim.

SAC Van Lei Ralkap Ṭat-Kyat-Kyi Pakhat Nih KDF Sin Ah CDM A Tuah, SAC ralkap nah-pah-ṭah(နပတ) 2030 in van lei ralkap ṭat-kyat-kyi pakhat cu nihin October 12 ah CDM cawlcanghnak a tuah tiah KDF nih cathanh an chuah.

Kum 24 tluk a si mi, ṭat-kyat-kyi pakhat cu mipi lei ah ṭangin mipi lei i dor ding ah KDF sinah theihternak a tuah caah KDF nih lunglawm tein donnak an tuah hi a si tiah theih a si. Karenni kahdohnak chungah SAC ralkap nih van lei kahdohnak le bomb thlak in dohnak an tuahtuk mi kongah a lungthat lonak kong zong a chim tiah theih a si.

SAC ralkap nih ramchung hmunkip um mipi hna cungah thilsual tamtuk an tuahmi ruang ah, mipi lei ah dir ka duhnak caan a sau cang na in, caan rem a umlo caah atu lawng mipi lei ka ra kho, cu caah ka ngaithiam hram uh tiah mipi sinah nawlnak bia zong a chim chih.

Pathein Thonginn Ah Ramkhel Lei Thongtla An Damlo Caan Ah Sii Thlopnak A Har, Ayeyarwaddy ramṭhen, Pathein thonginn ah ummi ramkhel lei thongtla damlo mi hna caah sii lei i thlop a har tiah thongtla chungkhar he naihniam in ummi nih an chim. Pathein thonginn ah ek inn le ti a thian lo caah pawfah zawtnak a ngeimi hna le zawtnak dang a rak ngei ciami hna cu a hleiin Kal fah zawtnak nih a phak colh hna tiah theih a si.

Ramkhel lei thongtla chungkhar pakhat nih “sii ai kongah harsatnak a um, thonginn chung ah sii hi fawi tein pek chanh khawh a si fawn lo” tiah a chim. Cu thonginn ah cun ramkhel lei thongtla 100 hrawngah ekinn 2 pek an si, anmah le caan te lawngah kal khawh a si caah harsatnak tampi a um tiah luatnak a hmu cangmi thongtla hna nih an chim.

SAC ralkap nih hramhram uknak an lak hnu in Pathein thonginn ah ramkhel lei thongtla 400 hrawng an um i, biaceihzung nih biakhiahnak tuahpiak cangmi hi minung 100 hrawng an si tiah theih a si.

Ye Peng Ah SAC Ralkap Motor Ruun Kahdoh An Tong, 12 An Thi, Mon ramkulh, Ye peng Sanpiah khuapawng Ye-Htawai motor lampi cung ah Htawai lei in a rami SAC ralkap motor ruun cu October 11, chunhnu suimilam 2:00 hrawng ah a thli in kan kahdoh hna tiah Ye Special Task Forces nih cathanh an chuah.

Mi sawhsawh bantuk in motor chung ah a cuangmi SAC ralkap hna le chungkhar nih zulhmi motor pakhat telh in SAC ralkap motor 12 cu YSTF le KNU brigade 6 battalion 16 nih Ye peng ah kahdoh an si caah SAC ralkap 12 nak tam an thi i 15 leng nih hliamhma an tuar tiah cathanh ahcun an langhter.

Kahdohnak ruang ah SAC ralkap motor anmah le mah kar i pahnak a cang i, motor khaltu zong an thi, SAC ralkap lei a thimi hna ruak cu an motor in an thiar lio kan hmuh hna tiah YSTF nih an chim. Kaphnih kar kahdohnak a chuah ruang ah SAC ralkap kah mi kuan nih tualchung mi minung 7 nak tlawmlo a hliamh hna, 3 cu an hliamhma a fah ngai caah sizung ah an kalpi hna tiah theih a si.

SAC Nih Minkin PDF Sakhan Pakhat An Khangh, Tualchungmi Pakhat An Thah, Minkin peng Chindwin tiva chaklei um mi PDF sakhan pakhat cu nizan October ni 11 zing suimilam 9 hrawngah SAC ralkap nih an khangh i tualchungmi pakhat zong an thah tiah theih a si. Htamaung (ထမောင်း) khua lei ah hmunhma kan thianh tiin a kal mi SAC ralkap, pyusawhti hna le Minkin PDF kar kahdohnak a chuak hnu ah SAC ralkap nih Chindwin tiva chaklei Udaung PDF sakhan pakhat cu an khangh tiah PDF chungtel pakhat nih a chim.

Dalaan lamhruainak in PDF sakhan pakhat cu mei in an khangh, cun tualchungmi pakhat zong tiva kam ah a kut hnulei leh in hriṭem bu he an thah tiah a chim chap. Thah a tongmi hi Bayonkar khuami a si, cun a dang nu pakhat le pa pathum zong an tlau tiah theih a si. Minkin peng ah hin 2014 milurelnak ning in khuakomh (ohsuh) 62 a um i minung singkhat hrawng an um tiah theih a si.

Monywa Ah SAC Ralkap Motor Bomb Puahhnawh An Tong, 10 An Thi, Sagaing ramṭhen, Monywa peng Ma Oo khua in a chuakmi SAC ralkap motor ruun cu October 11 chun suimilam 12:00 hrawng ah bomb puahhnawh an ton caah SAC ralkap 10 an thi tiah theih a si. Minung thazaang 70 hrawng nih zulhmi SAC ralkap motor 3 cu Monywa in Sethmuhzung sang Pan Ta Khun private sianginn pawng ah padeta bomb lung 4 puahhnawh in kan doh hna tiah Farmers Revolution Force in ṭuanvo ngeitu pakhat nih a chim.

“Nizaan ah Ma Oo khuachung ah checkhlatnak an tuah, khua luh chuahnak lam an phih hnu ah Monywa lei ah a kalmi SAC ralkap motor 3 cu bomb puahhnawh in kan doh hna, kan mit hmuh ah 10 an thi, cu nak tam zong an thi kho, kut kee bul zong an tam” tiah a chim chap. SAC ralkap hna cu Bravel Heart Army le Farmers Revolution Force ( Monywa pengkomh battalion 8,9,10) phufonh nih an kahdoh hna tiah theih a si.

Momywa-Chaung U Lampi Ah Hliamtuar Phurtu SAC Mawtaw Bomb Puahhnawh An Ton Caah 5 An Thi, Sagaing ramṭhen Monywa-Chaung U lampi SAC ralkap hliamtuarmi phurtu mawtaw pakhat cu bomb kan puahhnawh i SAC ralkap 5 an thi tiah PDF-South Monywa nih cathanh an chuah.

Hliamhma tuarmi SAC ralkap phurtu mawtaw pakhat cu October ni 11 zaan suimilam 7 hrawngah Monywa-Mandalay lampi Monywa le Chaung U kar ah padeta bomb lungthum kan puahhnawh hna i hliamhma tuarmi chungin SAC ralkap 5 cu Monywa an phak hnu ah an thi tiah an langhter.

Daw Aung San Suu Kyi Kum 3 Thong An Chap Caah Thongthlakding Biakhiahpiakmi Kum 26 Tiang A Phan, Myanmar rampi ruahnak petu le hruaitu Daw Aung San Suu Kyi cu SAC ralkap nih sualpuhnak a-hmuh 2 caah kum 3 chung thong thlak dingin October 12 ah biakhiahnak an tuahpiak chap ṭhan caah, thong a tlak ding kum dihlak hi kum 26 tiang a phan cang tiah theih a si.

Rampi ruahnak petu le hruaitu Daw Aung Dan Suu Kyi cu businessman U Maung Wat sin in American dollar sing 5 le cheu a lak tiah sualpuhnak an tuahmi ca ah le poh-mah 55 ca sualpuhnak an tuahmi ca ah, kum 3 thongthlak ding an chap piak hi a si.

SAC ralkap nih Daw Aung San Suu Kyi cu sualpuhnak phun 12 an tuah i kum 23 thong thlak ding in biakhiahnak an tuahpiak cangmi a um ca ah thong a tlakding kum dihlak hi kum 26 tiang a phancang. Cun SAC ralkap nih Daw Aung San Suu Kyi cung ah sualpuhnak an tuahmi phun 5 ca ah biaceihpiak ding a tang rih tiah theih a si.

Kyaik Htee Yoe Pawng Kahdohnak Ah SAC Ralkap 15 Hrawng Nih Hliam An Tuar, Tualchung Mi Nu 3 Nunnak Liam, Mon ramkulh, Kyaik Htee Yoe(ကျိုက်ထီးရိုး) Kinmonchaung(ကင်မွန်းချောင်း) Kinmon sakhan pawng Kyaik Htee Yoe(ကျိုက်ထီးရိုး) pura umnak tlang kainak gate ah October 12, chun suimilam 12:15 hrawng ah a ummi SAC ralkap le a hosi theilomi phu karah kahdohnak a chuak i SAC ralkap 15 hrawng hliam an tuar tiah theih a si.

Kahdohnak a chuah lio ah SAC ralkap lei nih hriamngan, hriamhme in an duhnak hmun paoh an kah caah an Kyaik Htee Yoe ah a kalmi nu 3 an nunnak a liam tiah theih a si. Nunnak liammi nu 3 lak ah pakhat cu mino te a si tiah mi bawmchantu phu nih cun an chim.

“Kaphnih kar ah kahdohnak a chuak in SAC ralkap lei nih an hmanmi hriamngan kahnak ruang ah tualchung mi 3 nunnak a liam, SAC ralkap nih an duhnak hmun poh an kah, kanmah hmanh hi kan i thus manh i kan him” tiah Kyaik Htee Yoe(ကျိုက်ထီးရိုး) tlang kainak gate ah thil zuartu pakhat nih a chim. Kaphnih kar i kahdohnak ah hliamtuar mi SAC ralkap chungtel 15 cu Kyaukhtu sizung ah an kalpi hna tiah theih a si.

Tatmah 66 In SAC Ralkap Pakhat Meithal He CDM A Tuah, Phaisa Sing 60 An Pek, SAC Ralkap tatmah 66 kuttang khah-mah-yah 4 in ralkap pakhat cu a meithal he Karenni hriamtlaiphu sin ah CDM a tuah tiah Karenni hriamtlaiphu nih cathanh an chuah. Tatmah 66 kuttang khah-mah-yah 4 in ralkap Lwin Moe Thu cu MA meithal zuunkhat he Karenni hriamtlaiphu sin ah CDM a tuah caah Karenni hriamtlaiphu nih laksawng ah phaisa kyat sing 60 an pek tiah theih a si.

Karen Ramkulh Chung Kahdohnak Ruangah Ralhrial Ngakchia Sing Khat Le A Cheu An Phan, Karen ramkulh chung kahdohnak ruangah an umnak inn le lo a chuahtak i ralhrial in ai dormi sing thum le a cheu leng an phan cang, tiah Karen Nuhrin Covo Phu(KHRG) nih cathanh an chuah. An cathanh chungah, Karen rammi ralhrial sing thum le a cheu leng chungah singkhat le a cheu nak tam deuh hi ngakchia le mino an si i, cu chungah nu an tam bik, tiah nizan October 11 ah an langhter.

October 11 cu Vawleicung Nu Hna Ni a si bantukin nawlngeihnak latu SAC nih Myanmar rammi nu hna cu hranhram in an hrem hna, ralphaw ah an hman hna, an cawk zuar hna pinah an tlaihhrem hna, tiah an langhter. “Bawhkeuh te le kum 10 in kum 18 kar ngakchia le mino zong ralhrial in ai dormi an tam. Bawhkeuh tete hna cu an ngandamnak hrang eidin sii-ai zeihmanh a um lo caah bawhkeuh ngakchia le hringtu an nu le hna ca ah a har ngaingai,” tiah KHRG in ṭuanvo ngeitu Saw Nanda Htu nih a chim.

Myawaddy Khua Ah SAC Ralkap Thawng Petu Dawr Pakhat Bomb In An Cheh Caah Dawr Ngeitu Nu A Nunnak A Liam, Karen ramkulh, Myawaddy khua No. 1 hlei pawng ah a ummi Soe Naung nih a ngeihmi Japan Gyi dawr cu, min hngalh lomi phu nih nizan October 11 zanlei sml 6:00 hrawngah kutcheh bomb in an puahhnawh i Soe Naung a nupi a thi, hliamhma pumi zong an um, tiah tualchung mi hna nih an chim.

“Soe Naung le a nupi hi ralkap thawng petu an si caah a tu bantukin bomb in an cheh hnawh hnanak hi a si. A pawngkam lam vialte cu ralkap nih an kham dih caah kal khawh a si rih lo. A hlan zong ah Soe Naung a dawr cu bomb in an rak cheh bal cang,” tiah min langhter a duh lomi pakhat nih a chim. Soe Naung le a chungkhar cu SAC ralkap a dirpitu an si pinah Soe Naung a nupi a ṭapa hi Myawaddy ah pyusawhti hruaitu pakhat a si, tiah theih a si.

SAC Nih Thimnak A Tuah Dingmi Cu Kan Hrawh Hrimhrim Lai – NUG Acting President Duwa Lashi La, A ra laimi 2023 ah SAC nih a tuah dingmi thimnak cu a si khawh chungin kan hrawh hrimhrim lai, tiah NUG caan kar lak President Duwa Lashi La nih a chim. Nizan October 11 zinglei ah a voi 71 nak NUG cozah tonpumhnak meeting ah a tu bantukin a chim hi a si.

Cu pinah SAC nih thimnak an tuah dingmi hi anmah le anmah an luat khawhnak hnga ca ah an tuahmi a si. An kuttang USDP party zong hruaitu thlen nawnnak an ngei i, thimnak tuah khawh dingin an i zuam cuahmah, tiah NUG President nih cun a chim. SAC nih nawlngeihnak an lak hnu in rampi a sifak chinchin i, harnak le thinphan thlalaunak a tam chinchin. Rammi hna cu zawnruahnak ngei loin an thahnawn hna, tiah a chim.

Myanmar rammi hna cu vawleicung ramkip nih bawmhnak a pek ko hna nain SAC nih a cohlan lo caah NUG cozah chungtel dihlak nih fak piin tawrel khawhnak dingah kan i zuam a hau, tiah a chim. NUG cozah nih SAC cu kumkhat chungah kan doh lai i, a hram in kan phawi dih lai, tiah cathanh an chuah.

Mon Peace Defense Force(MPDF) Cu SAC Kuttang Hriamtlai Ah An Cang, New Mon State Party(NMSP) in a chuakmi Mon Peace Defense Force(MPDF) cu SAC ralkap he kan ṭangṭi lai, tiah October 10 ah cathanh an chuah. MPDF nih rampi daihnak hmaithlak in rian kan ṭuan lai i, mizapi harnak petu kan doh hna lai. SAC kuttang rianṭuantu pyituhsit kan si lai, tiah an langhter. An ralkap bawizik General Naing Shaung ai ah Brigadier General Naing Aung zong an thim, tiah theih a si.

MPDF ralkap cheukhat cu a luancia kum 2019 ah phung ning loin hriamnam le rithaisii an cawk zuar caah an rak tlaih hna. 2017 lio zongah Paung peng Teykone(သဲကုန်း) khua vawlei hmun zong phung ning loin an rak zuar, tiah Media cheukhat nih an rak langhter. MPDF cu NMSP in a luancia kum 2010 lioah a rak chuakmi an si.

Myingyan(မြင်းခြံ) Ah Ṭhial Dingin A Kalmi SAC Ralkap Motor Cu PDF Nih Bomb An Puahhnawh Caah Ralkap 9 An Thi, Mandalay ramṭhen, Myingyan pengkomh Ngazun peng Natgyi(နတ်ကြီး) khua le Konelay(ကုန်းလည်) khua karah umhmun ṭhial dingin a kalmi SAC ralkap motor cu, bomb in kan puahhnawh, tiah Naung Yoe Special Guerrilla Force (NYSGF) nih an langhter.

October 10 zinglei sml 9:30 ah Simikhyun(ဆီမီးခုံ) khua in a chuakmi SAC ralkap motor 5 cu bomb in kan puahhnawh hna caah SAC ralkap 9 an thi, tiah NYSGF nih cun an langhter. “Simikhyun in a chuakmi SAC ralkap motor 5 cu, bomb in kan puahhnawh caah motor 1 cu a rawk dih i a kal kho ti lo. Ralkap an ruak cu zan ah motor in an thiar hna,” tiah NYSGF phu in ralkap pakhat nih a chim.

SAC ralkap motor 5 cu bomb lung 7 in an puahhnawh caah motor 2 an rawk i, ralkap 9 an thi. Ngazun khua lei ah kal aa timi an si i, hmai ah an kal khawh ti lo caah a pawngkam khua sianginn ah SAC ralkap pawl cu umhmun an khuar, tiah theih a si. Cu bomb puahhnawh nak cu Naung Yoe Special Guerrilla Force le 27 Revolution Force hna i bawm in an tuah mi a si, tiah theih a si. Crd-The Chin Post