Selena Sui Sui; A Leng zong kan chuak kho lo, ramtang ah an kan hren ko!!

Dubai le Oman Ah Chin Nungak Pali Cu Ramdang Kalnak A Tawlreltu Agent Nih An Zuar Hna!
================================
Dubai le Oman ah Chin nungak pali cu rianṭuan ding in ramdang kalnak a tawlreltu(agent) Ngun Cung Lian, Yangon ummi le Thiamte, Falam khua Oman ummi nih an zuar, tiah Oman ummi Chinnu pakhat nih The Chin Post ah a chim. Oman ah zuar a tongmi Chin nu pakhat nih a chim ning ah cun, “Yangon kan um lio ah cun nikhat ah suimilam rikhiah in rian nan ṭuan lai, a nuam tuk.

Sin-um nan ṭuannak hna nih anmah duh pohin in tuahto hna nak nawl an ngei lo, tiah a kan ti nain kan phak hnu ah cun a chim bantuk a si lo. Nikhat ah suimilam 20 reng lo rian an kan ṭuanter! Kan i dinh zong an duh lo i, kan phaisa in kan in cawk cang mi hna; kan sal nan si an kan ti. Rawl zong nikhat ah voikhat lawng an kan pek, cu hmanh cu an uico rawl nakin a chia deuh. Kan Agent kan chawnh ah le ‘kan in zuar hna lo’ a kan ti, tlun kan duh kan ti hna le ‘sing 100 nan liam hnu lawng ah nan tlung lai’ a kan ti! Sing 100 liam ding zong kan ngei fawn lo. kan celh bak ti lo, thih hmanh kan duh deuh cang,” tiah The Chin Post ah a chim.

“Anmah a zuartu Agent, Ngun Cung Lian (Yangon) a inn ah a kan umter i Oman ah cun a kan kalter. Oman kan phak hnu ah Thiamte, falam nu nih a rak kan don i sin-um kan ṭuannak ding inn ah cun a kan chiah. Kan passport zong a kan chuh, leng zong kan chuak kho lo. Kan umnak hna nih anmah Muslim bantuk in kan lu an ka tuamter i, a celh in kan celh ti lo. Kan tlun khawhnak ding ah bawmchantu kan herh ko, Embassy hna le bawmchantu phu hna nih kan ram kan kir khawhnak ding ah kan bawm hna seh law kan duh ko,” tiah a chim chap.

Oman i an zuar mi hna hi Ngun Sui, Hriangkhan khua le Ṭial Hlei Cuai, Dauchim khua hna an si i, pehtlaihnak tuah an fawi lo caah midang pahnih cu an min le khua fiang in theih a si lo. Ngun Cung Lian(Yangon um) le Thiamte(Oman um) Falam nu(A pasal Kalaymyo ah Pastor ṭuanmi) hi aa pehtlai mi an si i, Ngun Cung Lian nih hin a farnu Hakha ummi cu Dubai le Oman ah rianṭuan in kal a duhmi minung a kawlter, tiah theih a si. Crd-The Chin Post

Hi kong he pehtlai in Oman ah zuar a tong mi kan far nu Selena Sui Sui nih, “Kan chuak reng lo. Ram tang ah an ka chiah Zei hmanh na thei lo. Ph zong an ka ting Tah bu in ka hal hna ruangah an ka pek than mi si. ka chim te la cu Ka si ning cu. A fiang tik poh ah a fiang te ko la ok Lungsau in hngak rih. tiah Global Rawn Chin Media ah Love Queen nih comment biahal nak a tuah mi cu lehnak a va tuah.

Mah buhcak hmantkak hi sin-um nih an peek mi hna rawk a si. Kawlram ah an rak kir kho i chungkhar he hmun tein khua an sak ti kho hna hnga ding caah thla caam bom hram ko hna usih.

Cu pinah KC MC Lian nih Love Queen cu “na zuar hna nak tette kan piah lai, nan minung hna nih “harnak” an
Tawn tikah Egent sinah rawlzam cio a si. A sinain a min cu ka chim rih lai lo, Pa pakhat nih fa pawi mi nu a velh tiah ka sin ah a phan. Cun nangmah zong hi Oman ah hlawhfa ding in a kal mi na rak si ve.

A tu zong hi Oman ah Umnak nawl ngei lo in [ hmawngkhu] in a um ti zong an ka chimh. Na zuar mi hna hrimhrim an sinak cu Kawlram lei in na ttuan tti hawi nih nangmah nih na zuar hna nak kongkha na zuarmi nu pakhat sin ah ca in a kuat. Tette ka ngei. Cun na zuar mi hna an rian an tuan piak mi hna nih, kan in cawk mihna nan si na duh paoh in na um kho lo tiah an ti chapchap rih hna.

Cun Oman Ummi hi an zapi tluk an si, a din deuh le a fak deuh tu in an um i a si. A kan zuar an i tidih, thlaruk tlinhlan ah nan tlun a si ah cun[ tingzakhat ] 100000000 nan chuah lai a kan ti an ti. Na vapa zong pastor a si na ti i, na va rian tuan mi pathian rian hi na upat ding a si. Kei mah bang in misifak taktak na rak si ve khah, cu ruangah Oman na phan.

Mirang holh na ti kho i kan lomhpi taktak a si nain, na hnulei [ tabukkhor ] naa philh nan sin zongah zam chung khawh nan sianh hna lo, zam cia le fa pawi hmanh felh an si. Na zuar mi hna kha minung an si kha zeidah [Human dignity ] a suallam hi na zuar mi hna caah a tthathnemnak a um? [ human rights ] nuhrin covo an ngeih mi na buar. [ discriminated against ] a si. Na duh ah cun Media sin in na tuah to mi.” tiah a vun ti ve.

RELCHAP, Sagaing Peng Nyaungpinwon (ညောင်ပင်ဝန်း) Palik Sakhan Drone in Bomb Thlah Hnawh An Tong, Pathum An Thi, Pahnih Hliam An Tuar, Sagaing ramṭhen Sagaing peng Nyaungpinwon khua palik sakhan cu tualchung hriamtlaiphu hna nih drone in bomb an thlak hnawh hna i sakhan hmai thingkung tang i aa dormi SAC ralkap pakhat le palik 2 nih hliam an tuar tiah kan theih.

Hliamtuarmi hna Sii-inn kalpi dingin mawtaw cungah an hawi le palik 2 nih an khin hna lio ah bomb puah hnawh an tongṭhan i hliamtuar ṭhingmi SAC ralkap pakhat le palik 2 cu a hmunah an thi i sii-inn kalpi dingin a bawmtu palik 2 zong hliam an tuar ve tiah tualchung hriamtlaiphu pakhat si mi Knight Commanders in BeThanKyi (ဘယ်သန်ကြီး) nih a chim.

Nyaungpinwon palik sakhan ah hin SAC ralkap le palik 20 hrawng an um i khua luhchuahnak in mipi khualtlawngmi hna cu phaisa an hal tawn hna tiah tualchungmi hna sin in theih a si. Tutan kahdohnak cu Knight Commanders , Black Dragon (Special Tesk Force) le tualchung PDF phufonh hna i bawm in an tuahmi si tiah theih a si.

Takaung peng ah SAC ralkap motor 2 bomb puahhnawh in doh an tong, pahnih an thi, Mandalay ramṭhen, Takaung(တကောင်း) peng ah SAC ralkap motor 2 cu bomb puahhnawh le kahdoh an ton caah SAC ralkap 2 an thi tiah Takaung PDF nih an chim.

“Takaung in SAC ralkap motor pakhat in ralkap 10 hrawng le hriamthil a phortu motor pakhat cu September 11 chun suimilam 12:30 hrawngah Takaung in meng 4 hrawng ai hlatnak SinHngiatkone (ဆင်ညှပ်ကုန်း) khua luhnak ah pa-de-ta bomb lung 6 an hmanh mi in kan doh hna tiah” Takaung PDF lei nih an chim.

Bomb cu timhcia tein hmanh a si, kan hmanhnak hmun SAC ralkap motor 2 an phak lio belte ah an kar ah tualchung mi nih an i citmi motor pakhat karlak thlak in a kal caah, motor pakhat lawng bomb kan puahhnawh khawh hna, cu caah SAC ralkap lei a thimi le hlianhma tuar an tlawmnak hi a si tiah tuanvo ngeitu nih an chim chap.

Mizapi nih SAC ralkap hna he neihniam in um le, an motor he neih tein kal tibantuk tuahlo dingin le tualchung hriamtlai phu hna nih cathanh chuahmi zulhawk thil hna kha felfai tein zulhding, rikhiahmi caan a lonh hnu ah motor lampi hman tibantuk tuahlo ding in theihternak an langhter chih.

Rakhine ramkulh chung kahdohnak ruangah Maungdaw khuachung ah ralzaam 800 leng an karh, Rakhine ramkulh, Maungdaw peng chaklei ah SAC ralkap le AA kar kahdohnak a fah caah, tualchung mipi 800 renglo cu Maungdaw khuachung ah an i dor tiah mi bawmchantu phu hna nih media ah an chim. Hkamaungsait(ခမောင်းဆိပ်), Yanaungpin(ရန်အောင်ပြင်), Mitait(မီးတိုက်) telh in khua 10 leng in khuami hna cu ralzaam dirhmun an phan i, Maungdaw khuachung phungki sianginn hna le ralzaam sakhan ah dorter an si tiah an chim chap.

“Tukar hrawng cu SAC ralkap le AA kar i kahdohnak cu a fak ngai, SAC ralkap lei nih hriamngan an hman leng ah raltuknak vanlawng hmang in kahdohnak an tuah caah atu bantuk ralzaam dirhmun kan phanh hi a si” tiah tualchung mi pakhat nih a chim.

“A liamcia thla chung ah khan a zaam mi cu an um pah cang hna, tukar hrawng cu kahdohnak a fak i SAC ralkap nih hriamngan le raltuknak vanlawng hna an hman caah khua kiangkap ah hriamngan an tla, khuachung ah kan um ngam ti lo caah Maungdaw khuachung ah kan i dornak hi a si. Hmundang ah a zaam mi zong an um ṭhiam, Maungdaw khuachung ah ralzaam dirhmun in a ummi 800 renglo kan si cang” tiah a chim chap tiah theih a si.

Maungdaw peng chaklei ah a luancia July 18 thok in SAC ralkap le AA kar fakngai in kahdohnak a chuak. September 10 ah, Maungdaw peng thlanglei ah ummi SAC ralkap khah-mah-yiah 352 sakhan pakhat cu lakpiak an tong i, ralkap 4 le hriamthil tampi kan lakkhawh tiah AA nih cathanh an rak chuah.

Myanmar Ramchung Ah Covid-19 Zawtnak A Karh Than, Myanmar ram chungah Covid-19 zawtnak a thar in a karh ṭhan i nizaan September 11 ni, nikhat chung ah Covid zawtnak minung 189 an hmuh than tiah SAC ralkap kuttang um ngandamnak lei vuanci zung nih a thanh. SAC tangum Ngandamnak lei vuanci zung nih September 11, zaan suimilam 8:00 tiang cathanh an langhter ning ah chekhlatnak tuahmi 9,378 chung ah Covid-19 zawtnak a ngei tiah zawtnak hrik hmuhmi zatuak 2.01 an si tiah an langhter.

Covid -19 zawtnak aa chawnhmi minung 189 chung ah minung 173 hi ramchung in aa chawnhmi an si i, minung 16 hi ramleng in aa chawnhmi an si tiah ngandamnak zunglei nih an thanhmi ah cun an langhter. ” A tutan Covid zawtnak hi, raikhamsii aa chun mi hna cung zongah hmuh a si caah mah tein leng chuahlo in i runven a hau.

Covid zawtnak ruangah nunnak liammi an tlawm tilo caah mah tein i runven a herh. Leng chuahtik zongah mask hruk philhlo ding le, mask aa huplo mi kan hmuh hna zongah mask i huh ding in kan theihter ṭhan hna a hau” tiah Yangon khuachung ummi pakhat nih a chim.

Mipi ngandamnak kong he pehtlai in lakhruak i zohkhenh a herh caan ah, mi bawmchanhnak a tuahtu Yangon um volunteers hna zong nih Covid-19 zawtnak kong he pehtlai in zulhphung hna cu felfai tein mipi lei nih zulh ding ah theihternak an tuah ṭhan.

Myanmar ram pumpi huap Covid-19 zawtnak ai thok kum, 2020 kum in 2022 September tiang ah Covid zawtnak aa chawnhmi 616,663 an si i, minung 19,442 cu Covid zawtnak in an nunnak a liam tiah SAC ralkap kuttang um ngandamnak lei vuanci zung nih an cathanh chuahmi ah an langhter.

CDM ralkap minung 17 cu, Ministry Of Defense nih conglomhnak puai an tuah piak hna! National Unity Government (NUG), Ministry Of Defence, People Defence Force(PDF) nih kahdohnak an tuah kum 1 tlin camtuak lawmhnak ah tiin Gangaw pengkomh No. 3 Bataillon le No. 5 Bataillon in, CDM a tuah i PDF chungah a lutmi SAC ralkap 17 hna cu September 11 ni ah conglomhnak puai a tuahpiak tiah theih a si. Cu puai ah cun, Ministry of defence, vuanci U Ye Mon(ဦးရည်မွန်) nih conglomhnak roca a kuat hna tiah theih a si. Roca an kuatmi hna chung ah a tanglei bantuk in an tial;

CDM tuahmi ralkap le palik vialte nan dihlak upat awk a tlakmi NUG ralkap le palik ah kan in ruah hna. Mipi zawnruahnak le ram dawtnak thinlung he mipi lei ah dirin, SAC ralkap a dohtu nan dihlak upat kan in pek hna. Hi kong hi kan mipi nih an theih ahcun lawmhnak he an khat ve ko lai. SAC ralkap cu kan tei hrimhrim hna lai i, teinak THANTAR he lunglawm tein kan i tong than hna lai tiah an tial.

CDM ralkap hna cu, Gangaw pengkomh No. 3 le No. 5 Bataillon ah kumkhat dengmang ralkap rian a tuan cang mi an si tiah theih a si. Cu puai ah cun, pengkomh tuanvo ngeitu hna, Tat-Yin-Hmu, Duh-Tat-Yin-Hmu, Pah-Khah-Phah, Pah-Ah-Phah hna an i tel i cu hna nih cun, biaherh chimnak an ngeih hnu ah, CDM ralkap hna nih an i kenmi hriamthil peknak, CDM ralkap hna laksawng peknak hna tuah a si dih hnu ah, kan caanhmannak tlamtling tein kan donghter khawh tiah Ministry Of Defense nih cathanh an chuah.

SAC ralkap le Pyosawhti nih Tamu Pengkomh Jangnom Pastor le Khuami An Hrem Hna , Sagaing ramthen, Tamu pengkomh, Myothit ah umhmun a khuarmi SAC ralkap hna le Phyosawhti hna nih Myothit khua nitlaklei ah a ummi Jangnom khuachungah September 11 zaanlei sml 2 hrawng ah an lut i Pastor le khuami cheukhat cu a ruang um loin an tlaih hna hnu ah an hrem hna tiah theih a si.

Pastor pa cu kuak mei in voi tampi a cal ah an duah, khua upa pakhat cu a liangah meithal an khin i, cu a liang khin mi ichirhchan in meithal in voi 4 hrawng an kaah tiah khuami hna sinin theih a si.

KyaukHtu Ah Umhmun Khuarmi PDF Sakhan Cu SAC Ralkap Nih An Khangh, Magway ramṭhen, Kyaukhtu peng ah umhmun khuarmi The Youth Force -Saw & Kyaukhtu sakhan cu September 10 ah SAC ralkap nih an khangh, tiah theih a si.Kyaukhtu ah umhmun khuarmi miakpi kaptu phu in SAC ralkap 90 hrawng nih zaanlei sml 3:00 hrawng ah an khangh, tiah The Youth Force -Saw & Kyaukhtu phu in ṭuanvo ngeitu nih a chim.

“Kanmah lei in a thimi le aa hliammi cu kan um lo. Thilri kan sunghmi zat tu cu fiang in kan hngal ri lo, meithal le hriamnam thilri zong kan chuahpi khawh dih,” tiah a chim chap. PDF lei in hriamnam, zen-kuan le anmah an him ko nain an sakhan caah an hmanmi thlam(inn) pathum cutu SAC ralkap nih an khangh piak dih tiah theih a si.

AA le SAC Ralkap Kar Kahdohnak Ruangah, Paletwa Peng Khuami Facang Tuan Kho Loin An Um!, Chin ramkulh, Paletwa peng ah, Arakan Army (AA) le SAC ralkap kar kahdohnak ruangah, kahdohnak pawng hrawng ah a ummi khua cheukhat hna facang tuannak kongah harsatnak an tong tiah theih a si.

2022 August thla thokin Paletwa peng chung kahdohnak ruangah Abawngthar(အဘောင်သား), Yeemawah(ရဲမ၀), Kyiatyatkaing(ကြက်ယက်ကိုင်း), Leikkung, (လိပ်ကုန်း), Namada,(နမဒါ), Singsan(စိမ့်စန်း) khua hna telhin Khua 10 hrawng i a um mi mipi hna cu ralzaam dirhmun in an um tiah theih asi.

KaukOo (ကောက်ဦး) timi facang hi September thla thok cun, tuan an cu cang, asinain ralzaam dirhmun kan phak tikah facang tuan khawh a si ti lo. Facang tuan caan i kan tuan lo ahcun facang hi a rawk dih khomi an si. Cun kan nih khua lei cu lo tuahin a paw a cawmmi kan si fawn caah eiding kong ah lungrethei in kan um ko, zeidah kan eidin te lai ti ruah ah lung a dong ko” tiah Namada khuami pakhat nih cun a chim.

A luancia September 9 lio ah khan kum 23 hrawng a simi U Thein Aung cu facang zuun dingin lo ah a kal pah ah bomb aa lamh sual caah a ke a rak bul. “Atubantukin facang tuan caan ah tuan khawh a si lo tikah phaisa lut a um ti lo, cu nih a van hrin mi cu fale ca cawnnak le ngandamnak kongkau ah a chialei kan panh ko lai, kahdohnak a um chung paoh cu facang cu kan tuan ngam/kho bal lai lo” tiah ralzaam bawmhnak tuanvo ngeitu pakhat nih a chim.

Mizoram Cozah Nih Ralzam Bawmhnak Ah Rupees Sing 380 An An Hman Cang, Mizoram ramkulh ah ralhrial in aa dormi Myanmar rammi hna ca ah rupees sing 380 kan hman cang, tiah Home Minister, Government of Mizoram Pu Lalchamliana nih a chim.

A luancia September 6 in 8 tiang tuahmi Mizoram ramkulh Hluttaw ton pumhnak ah Myanmar ralhrial mi hna kong ah biahalnak an tuah i, atu bantuk in a leh hna hi a si, tiah theih a si. 2021 Febuary 1 in SAC nih nawlngeihnak an lak hnu in Myanmar rammi cheukhat cu Mizoram ah an zaam i, 2022 August 20 tiang ah ralhrial Myanmar rammi hna hi 29,253 an phan i, anmah bawmhchanhnak caah rupees sing 380, kawlram tangka in kyats sing thong hleithum kan hman cang, tiah a chim.

“Ralzam cheukhat cu an chungkhat cingla sin ah a ummi zong an um i, cheukhat cu inn hlang in khua a sa mi zong an um. Atu dirhmun hoihin relief camp 156 sak a si i, Home department nih nawlpeknak a rak tuah cang bantuk in pengdang le tlangdang i an i chawhvahnak kongkau zongah District Commissioner(DC) nih an ngiatthlai hna. Upadi zulh ding ning kongkau le an cawlcangh ning kong zong cawnpiak cuahmah an si,” tiah Pu Lalchamliana nih cun a chim.

May be an image of 3 people, tree and outdoorsMizoram Home minister nih cun ralzam bawmhnak ah Rupess sing 380 an hman cang kong a langhter i, a tanglei bantuk hin ralzam bawmhnak ah Mizoram cozah nih a hmannak a langhter. 1. Power (Electric mei) laknak 2. Ti laknak, ti chiahnak 3. Nu thilpuan hruk-aih. 4. Sii-ai le mizaw zohkhenhnak 5. Eidin le Ralzam MP pawl bawmhnak 6. DC lei hman dingmi hna hi an si. CHRO le zatlang bu cheukhat nih Mizoram ah ralhrial in aa dormi Myanmar rammi hna hi 40,000 hrawng an si lai, tiah an ruahdamh.

Chin Ramkulh, Mindat Peng Hlawwa(လျှော်၀) Khua Ah Umhmun A khuarmi SAC Ralkap Nih Khuami An Tlaih Hna! Chin ramkulh, Mindat peng, Hlawwa khuaah umhmun a khuarmi SAC ralkap hna nih Hlawwa khua phungki le khuami hna cu hmunkhat an pumh hna i an hren hna, an phone zong an chuh hna tiah khuami hna sinin kan theih. SAC ralkap hna cu a luancia mi September 9 ni ah Hlawwa khua ah umhmun an khuar i CDF-Mindat he zong kahdohnak a rak chuak bal tiah theih a si.

“SAC ralkap hna nih Mindat peng khua cheukhat ah hriamngan an thlak caah Khuaring,(ခွါရိန်း) khua inn cheukhat hna cu an rawk. Zaan caan zongah hin tlai hnu ah ruah lo piin hriamngan an thlak tawn i ruahsur lak le muipadap ah tlikzaam a si tawn” tiah khuami hna nih an chim.

SAC ralkap hna nih Mindat khuapi chung zongah chekhlatnak an tuah lengmang i a hleiin mino hna hi faak ngaiin chekhlatnak an tuah tawn hna. Cu kong pehtlaiin khuami pakhat nih “An kan chek caan hi suimilam pakhat hna a rau tawn, a hleiin mino hi an ral rih fawn hna. Cun an sinah hin Power Bank bantuk pakhat a um i cu seh in kan phone an chek ahcun kan rak delete mi zong a lang dih” tiah a chim tiah theih a si. Crd-The Chin Post