Saya Van Tum; Laimi caah cun USA le UK le UN zong Dalaan an si ko ne hi!

Laimi caah cun USA le UK le UN zong Dalaan an si ko ne hi!
==============
USA le UK le UN nih Kawlram mipi cu za ah za khan in an kan dirpi/an kan ttanh. Asinan ramchung i ral doh le ralthawh cu an duh bak lo/tha an pe bak lo. Cuti si ahcun Laimi caah cun USA le UK le UN zong “Dalaan nganpi” an si tinak si lai cu. Annih nih cun raldoh le ralthawh nih tthatlonak tampi a chuahpi kha an i fiang tuk cang.

Ralthawhnak nih ram a thleng kho taktak lo ti kha an i fiang tuk. Anmah nih an bawmhmi hna phu le ram, le Russia le Tuluk nih an bawmhmi hna karlak ah ral i dohnak faktuk a um len cang i san a tlai lo ti kha an i fiang tuk. Teinak zong um huaha loin a dih ko. Minung tamtuk an thi, mangttaam a tlung, ralzam an karh, inn le lo tamtuk a rawk, raldohnak ah phaisa tamtuk a dih fawn i sipuazi vialte zong a rawk dih fawn.

A phunphun in raldohnak le ralthawhnak nih tthatlonak a chuahpi kha an i fiang tuk, tamtuk hmuhtonnak an neih cang ruangah raldoh an duh ti lo/tha an pe lo. Pathian nih phubahlam cu keimah rian a si a ti. Laimi cu phubahlam kho ding kan si lo. Kan zeizong te nih a tlinh lo. Aluancia kum 60/70 lio in Karen le Kachin le Shan ram hna ah ral an do i phubahlam nak an tuah nan zeite santlaihnak a um lo/tthat lonak tuk tamdeuh a chuak.

Atu chan cu fimchan a si, social media chan a si i ahohmanh raldoh an duh ti hna lo. Khrihfa a simi nih cun Bible nih a kan cawnpiak ning in zulh le i nunpi khawh hi kan i zuam peng ding a si ko. Kawl ralkap ziaza tthalo nawl i cawnpeng ding kan si lo. Anmah tuahmi bantuk tuah ve ding kan si lo. Anmah bantuk si i zuam ding kan si lo.

Pathian kan lei ah a um peng ko/a kan dirpi peng ko. Ramhruaitu le miphun caah rian a ttuanmi nih cun Pathian a bochan bak a hau, a bik in Lai miphun caah. Pathian bochan loin mah duhnak lawng a zulmi ram hruaitu cu hlawhtlingnak a hmu lai lo/thluachuah a um lai lo. Raldoh le ralthawh tha a pe lomi cu Khrihfa cawnpiaknak an zulh i an i nunpi tikhawh a si.

Asinan a poi tukmi cu Laimi caah cun “Dalaan” kan ti hna. Dalaan sullam hmanh kan i fiang lo buin. Laimi caah cun USA le UK le UN zong Dalaan an si ko ne hi. Anmah raldoh bantuk le kanmah raldoh bantuk a khat lo. na theih lo ahcun dai ko. cauk uk zeizat dah na rel cang? khoika dah ral cu kan doh khawh? za ah za tei lo dingmi raldoh cu na chim e. degree pa zeizat dah na lak?

Thantlang ralkap 200 hmanh a tei lomi nih raldoh i timh cu zeidah sullam a neih? Pathian na bia lo maw? Ralkap cungah zei teirulchamnak dah kan tuah? van chim tuah? zeihuaha theih lo pawl nih CDF pawl nan forh lengmang hna ruangah lam a tluang lo. thantlang a kangh dihnak si khi. nanmah pawl pei dalaan siko cu.

Lairam tthatnak ding caah voi zeizat dah thla na cam? rawl-ulh in thlacam law mah kha na tuah bikmi cu a si ko lai. mah kha zapi zaran caah cun a tha bik si ko. Pathian nih khua a khan ko lai kan cahrang ah.