Saya U Zaw Mya Lin An Thah Ning Cu A Fak Tuk E, A Fak Tuk E

Saya U Zaw Mya Lin cu misual le lainawng thah bantuk bak in ralhrang phu nih an thah hoi cang. Kawlram kong buainak kong le Kawl ralkap ralhrang phu pawl an cawlcangh ning zoh le ngaitthai tikah tihnung tuk an si. Hi bantuk tuahsernak hi vawleicung minthang misual phu hmanh nih an tuah bal tluk lomi a si. Vawleicung ramkip nih hmuh hna sehlaw, lam dangdang in mipi humhimnak tuanvo an kan lakpiak lo ahcun hi nak in kan zual deuh chinchin te lai. CRPH buu nih ralhrang phu tiin min an pekmi hna le vawleipi theih an zamhmi zong hi zamh phu le taza cuai phu an si hrimhrim ko.

Zantim ah midingfel le cathiamsang pawl an huatmi hna an tlaih hna i, an duh paoh in an tuahto ning hna hi khuaruahhar misual phu cu an si hrimhrim ko. Tutan Saya U Zan Mya Lin an thah ning zong hi a fak tuk hringhran ko. Aho minung nih dah a ingtuar khawh khun lai mu. Saya U Zaw Mya Lin cingla rualchan vialte Bawipa tu nih hnem hna sehlaw, ingtuar khawhnak pe hram ko hna seh.

Atang pakhat zong hi ningcang loin an thahmi kong relchap khawh a si. Kawl ralkap le palik an sual ning hi cu chimh ngam hmanh a si ti lo. Kawlram buaibainak kong ah mipi an temtuar cang ning hi hmanthlak le video zohnak in theih khawh a si. Hi bantuk tuahsernak hi vawleicung upadi zong nih a on hnga maw? Mipi sawhsawh an tlaih lawng hmanh si loin an thah ning a fakning cu chungkhar cingla rualchan cu chimh loin aho fa hmanh nih an celh lai lo. Kan Kawlram buainak le uknak kong ruah lengmang tikah zan zong hngilhkhawh a si ti lo.

Kawl ralkap le palik nih zaan ah an rak tlaih i, zinglei ah a ruak lawng si loin a chungril tiang an rak phorh dih hnu ah mak tluk in a thi. Ralkap pawl nih mipi pawl social Punishment tlawmpal te kan tuah hmanh misual zoh in an zoh cang. Kan nih mipi pawltu mi sual le mi tha lo ah an kan can ter. Annah ralkap le palik pawl vialte cu mitha le midingfel ah an i ruah i, thil kan ti khawh tiah an i ruah.

A tanglei hi nizan an tlaihnak kong thawngpang a si. Pebedan Sang Um NLD Chairman U Khin Maung Lat Cu Ralkap Nih An Thah. Pebbedan sang (7) um NLD Chairman U Khin Maung Lat cu ralkap le palik nih March 6, 2021 ni zan ah an tlaih i, an kalpi hnu ah chihkhat thong chiah chunnak hmun ah an thah tiah Pebedan NLD palai pakhat a simi Si Tu Maung nih a social media cahmai ah tuzing ah a va langhtermi thawng theih a si.

Pebedan sang um NLD party committe member inn kip ah an kal hnawh hna hnu ah an kawl hna tiah theih a si. Cun, U Khin Maung Lat hi an tlaihmi ah a tel ve mi a si. Ralkap le palik nih an tlaih lio ah a phunphun in an hrem pah cang tiah Ko Si Tu Maung nih a langhter chap. U Khin Maung Lat a ruak cu Mingkalardo siizung ah an chiah tiah thawng theih a si. A ruak kong he pehtlai in an chiahnak sizung sang um Palik sakhaan ah nawl hal dingin le laak an i timhnak kong a langhter.

Ko Si Tu Maung nih thah a tongmi U Khin Maung Lat hi 2020 thimnak aa cuh lio ah a bawmhchantu le a hnuzulhtu ka si tiah a langhter. Tutan thil cangning kong he pehtlai in ralkap le palik lei nih atu tiang zeihmanh thawng fiangternak le thawngthanhnak an tuah rih lo tiah thawng theih a si.