Salai Ngun San Aung; CDF cu dohthlennak caah hriamtlai mi kan si!

CDF cu Dohthlennak caah hriam a tlaimi (Armed Organization) a si.
==============================
CDF cu Dohthlennak caah hriam a tlaimi (Armed Organization) a si. YLA cu Community Based Organization a si. Hriamtlai nih case pakhat khat in kan tlaihmi kha midang kut ah fawite in va pek phung a silo. Kan tlaihmi case he pehtlai in kherhlai duhmi an ngeih ahcun anmah nih kan hrennak hmun ah an rat ding a si. Cu hmanh ah kanmah nih kan ngeihmi biaceih phung le lam lonh in tlerhkhonh le kherhhlai a ngah lo.

Cu kongah YLA nih an lung a tlin lo i ramri an phih ahcun cucu anmah nawl a si ve ko. Mawh kan phurh kho hna lo. Asinain kannih caah cun kan concern mi cu hitluk kan Miphun nih harnak kan ton lioah tu bantuk thil ruangah ramri tiang an kan phih cu a fak deuh lo maw tiah Unau sinak in bochannak he kan uhttanh hna khi a si ko tiah ka ruah.
Hi lam an phih zongah zoh te uh Riithaisii cu Mizo ram ahcun a lut peng ko lai.

Tuhlan zongah cun an kham bu ah a lut peng thiam ko. Mizo ram Police pawl khi Riithaisii le hriamnam ti bantukmi khammi thil a tuahmi chawlet he aa kom i a thli in Rian a ttuantti mi an tam tuk. Crd-Salai Aung

Pakokku Thonginn Ah Mindat Khua In Tlaih A Tongmi 70 Leng An Chiah Hna, Magway ramṭhen, Pakokku thonginn ah Mindat peng in tlaih a tongmi 70 leng cu an chiah hna, cu chung ah thih hlan lo thong tla ding zong an i tel, tiah theih a si. Mindat peng cu SAC ralkap nih martial law an chiahnak a si i, Pakokko thonginn ah an chiahmi hna cu Mindat SAC ralkap biaceih zung nih bia an khiah piak hna i Pokokku ah an kuat hna.

“Pakokku thonginn ah a ummi chung in Mindat peng in a rak phanmi hi 70 an si. A luancia zarh zong ah 10 an rak phan chap. Thong tlami hna chung ah kum upa hna zong an i tel. A tlawm bik dan an tatmi hna hi rianhrang ṭuan le thong kum 3 tla ding an si,” tiah thonginn he naihniam mi sin in theih a si. Ralkap uknak tang in biaceih khawhmi sualnak hna cu SAC nih nawlpeknak(order) No. 3/2021 in 2021 March 15 ah cathanh an rak chuah.

Cu cathanh an chuahmi chung ah rampi rawiphiarnak, dohnak, cozah hlimhang thlaknak, ralkap rianṭuan dohkalhnak, ralkap sin rianṭuantu thlauhnak, Yazatatkyi section 505, zung rianṭuantu pakhat khat cu sual tuah ding in lemnak, a dik lomi thawngzamhnak hna aa tel, tiah theih a si.

Sezin Khua Kahdohnak Ah Tualchung Mi 18 Cu KIA Le PDF Nih An Chanhchuah Khawh Hna, Kachin ramkulh, Hpakant peng, Sezin khuate ah SAC ralkap sakhan pakhat cu nizan August 8 ah KIA le PDF nih an laak khawh. Cu sakhan ah a ummi, SAC nih an tlaihmi minung 18 cu an chanhchuah khawh hna, tiah tualchung mi hna nih a chim. Sezin khuate um SAC ralkap sakhan pakhat le Humalin peng ramri um Shwepyimyint(ရွှေပြည်မြင့်) khuate pawng ummi, Shan tapung(SNA) sakhan pakhnih cu KIA le PDF nih an laak khawh, tiah theih a si.

Tualchung mi pakhat nih, “July 20 le 23 lio ah SAC ralkap le SNA ṭangrual phu hna nih an rak tlaihmi tualchung mi 18 cu an va khamh khawh hna. Cun, an sakhan zong an laak,” tiah a chim. Sezin khuate ahhin a luancia July 16 in kahdohnak a chuak i, July 21 ah tualchung mi ral an hrial khawh nakhnga kahdohnak an rak ngol chung. Kahdohnak ruang ah Sezin khuami 2000 leng cu Ṭamakhan, Moehngin le Humalin peng ah an zaam, tiah theih a si.

Monywa PDF Sakhan Pakhat Cu SAC Ralkap Nih An Laak, Khuami Pathum An Thah Hna!: Sagaing ramṭhen, Monywa peng Tapepin khuate komh PDF sakhan pakhat cu, SAC ralkap nih August 8 zinglei ah an laak, tiah tualchung mi hna sin in theih a si. Zing suimilam 6:00 hrawng ah Monywa Economics Sianghleirun ah umhmun khuarmi SAC ralkap 40 hrawng cu Kaingtaw(ကိုင်းတော) khua ah an kal i, lakphakti dawr ah lakphakti a ding lio mi pa pakhat cu an tlaih. Cu hnu ah Tapepin PDF sakhan cu an va laak.

Tualchung mi pakhat nih, “Kaingtaw in Tapepin khua lei ah SAC ralkap cu an ra i, PDF sakhan pakhat cu an khangh dih,” tiah a chim. SAC ralkap nih 40 mm lung thum in an kah hnu ah PDF sakhan cu mei in an khangh dih, tiah theih a si. Cu pinah an kut an ṭemmi pa pahnih le khual pa pakhat cu an lu ah an tuk chih hna i, an thah beh hna. An ruak cu an phum hna, tiah Monywa thawngpang fiantertu phu nih cathanh an chuah.

Institute of Chin Affairs(ICA) Nih Myanmar Ralzaam Thiamhlei Panga Cu Ca Cawng Ding In A Auh Hna, Tukum October 3 thawk in Aizawl khuapi, Mizoram Sianghleirun ah kherhhlainak Fellowship training kai ding in Mizoram ah a um mi, Myanmar ralzaam chung in cathiamhlei siangngakchia panga cu Institute of Chin Affairs (ICA) nih a thim hna, tiah theih a si.

Fellowship training cu 2022 October in 2023 October tiang cawn a si lai i, thla 18 chung tiang kai khawhnak lam a um. Siangngakchia hna an dih heumi, umṭhutnak le sianginn thilri hna cu an rin dih hna lai. Cu pinah siangngakchia hna cu ramkip thiam sang hna he pehtlaihnak an tuahpiak hna lai i, ramkip sianghleirun le fimcawnnak phu in thiam sang hna nih an hruai hna lai, tiah theih a si.

Israel Le Palestine Nih Kahdaihnak An Tuah, kahdaihnak an tuahmi cu lunglawm tein kan don hna, tiah UN nih August 8 ah an chim. Egypt cozah nih a karlak in remnak ser ding in a forhfial hna caah August 7 ah kahdaihnak an tuah, tiah theih a si.

Middle East kongkau i ṭuanvo ngeitu UN Coordinator, Tor Wennesland nih, “Kahdaih biakamnak le biahrennak cu a rawh a fawi. Kahdohnak a chuah ṭhan ahcun ramkhel ṭhanchonak a nuar tuk lai,” tiah a chim. Israel-Palestine kahdohnak ahhin Palestine lei in 44 an thi i, 360 hliamhma an pu. Israel lei in 70 hrawng hliamhma an pu ve, tiah UN nih an langhter.