Salai Ceu Bik Thawng; Lak ah Lungdiriamhnak: Thantlang Peng 99% CDF/CNA nin an Control Cang

Nganfahnak Lak ah Lungdiriamhnak: Thantlang Peng 99% CDF/CNA nin an Control Cang
========
CDF-Thantlang hruaitu pakhat nih, “SAC ralhrang nih Thantlang khuachung i Acre 10 hrawng lawng an control cang. A dang hmunhma vialte cu kanmah nih kan tlaih dih cang,” tiah nih pah buin a ka chimh.

Thantlang peng hi Acre 877,000 hrawng a kaumi a si i, CDF nih 99% an control cang tinak a si. Angaite tiah SAC ralhrang nih Thantlang khuachung i sang pahnih lawng an tlaih khawh cang. Khuapi chung hmun tam u cu CDF nih an control dih cang. Thantlang peng khuaute 85 hrawng zong luatnak hmun (CDF kuttang hmun) ah an cang dih cang. A rauh hlan ah Thantlang peng dihlak luatnak hmun ah a cang lai ti zong ka ruahchan.

(NUG vuanci pakhat nih, “Myanmar ram ah Thantlang hi a pakhatnak bik luatnak hmunram a can ahcun kanmah zong Thantlang ah zung on hna kan hau lai,” tiah capo biaktak in a chim bal). Atu zong ah CDF-Thantlang nih uknak lei he aa pehtlaimi palik, biaceihnak, ngunkhuai, fimcawnak le ngandamnak lei tibantuk riantuantu bu pawl ser hram an thawk cang.

Atutan Myanmar rampi dothlennak ah Thantlang hi a tuartem bikmi khua a si ko. Hi bantuk nganfanhnak lak ah a thlummi theipar zun hram u sih tiah thlacam buin.

ZRA Tapung nih Tedim Peng ah SAC Ralhrang Raldoh an Bawmh Hna. Nihin January 22 ah Kalay-Laitlang lampi Taingen khua ah kahdohnak chunnitlak a chuak i, cu kahdohnak ah cun Zomi Revolution Army (ZRA) nih SAC ralhrang lei ttang in an dohpi hna, tiah Tedim mipi runvengtu ralkap bu CDM-Siyin nih nihin zaanlei ah thawngpang an chuah.

“Nihin zinglei ah Tedim khua in ZRA le SAC ralhrang thazaang 100 hrawng Taingen lei ah an rak ttum i, Taingen ah hmun a khuarmk mipi ralkap pawl a kan doh,” tiah CDM-Siyin nih an langhter. Taingen ah a ummi mipi ralkap bu fonh (CNA, CDM Siyin, PDF Zoland, Kalay PDF 3 , Kalay PDF 8, Kalay PDF 9, PDA,Zongam Army, CDF KKG-2 ) hna le SAC ralhrang, ZRA karlak kahdohnak cu zinglei sml. 8:00 in zaanlei sml. 5:00 tiang hrawng a rau.

SAC ralhrang nih Kalay University in miakpi in an rak kah chih hna pin ah Helicopter pahnih nih a bawmh chap hna ca ah mipi ralkap bu pawl nih Taingen khua cu an chuahtak, tiah CDM-Siyin nih thawng an chuah. Credit: Salai Ceu Bik Thawng, The Chin Journal