Salai Aung: Khuapau dohthlennak kan kal pi lioah dohthlennak thazaang a pe lomi Hruaitu nih !!

Lungler SAC Sakhan Kan Rak Kah Kha Kum Khat Tling: September ni 10 Ah Kan Rak Tehton Mi
============================
Zaan ah Lungler khua mi zong an umnak kan zoh I an him cang ko lai tiin ka ruah. Kan I kah tikah khuami zohkhenhtu ding zong timhcia an si. Kan I kah lio ah mah duhin tlikzam lo ding zong bia kan cah ta hna. CNA in kan hawi a ka zultu Ramte le ka naupa tiin Sakhan hmaitonh inn ah cun kan it. Mei a muih tuk caah SAC pawl an lunghring tuk sual la tiah Lungler Rungvengtu Phu kan information Pu Van Dawt Tling cu SAC Sakhan in a lang mi inn poh poh mei kan van ter.

Ka vun I hngilh maw hngilh lohme ka ti khin Sakhan cun Meithal an vun puah ka lau tuk nain an puah tawnmi si ko caah ka hngilh taak. Tlawmpal ka vun I hngilh ah phone call a ra I kan vun I thawh cang lai tiah CNA kan pu Sang Cem nih a ti. Nazi ka zoh I zinglei suimilam 1 long si rih. Kan nih pathum zong kan tho I kan I tawnnak ding hmun in kan rak hngah hna.

Minung kan tlin dihin kan hmunhma cioah kan kal hna. September ni 9 zing ah khan 06 Phu ah ka um nain September ni 10 zing cu 04 Phu ah kai tthial a ruang cu 04 umnak hmun hi SAC duty hngak mi kha hawihlan ah a kaptu ding kan si. Kan strategy (I timhmi) cu 06 le 04 nih duty a hngak mi kha kan kah ve ve hna lai i, Sakhan chungah Comando pawl an lut te lai ti si.

(SAC Sakhan ah hin duty hngahnak hmunhnih an ngei). Lam cu ka vun hruaihna I cheukhat kan hawile cu kan kal taak sual hna, lam an tlau. Lamtlau mi hi CNA an si caah lam tlau zong an thiam, an tlaunak hmun ah daitein an rak um I kan va lak khawh zau hna.

Kan nih Phu 04 cu kan hmunhma kan phanh kho dih cang caah a nung Pathian sinah bawmhnal in thla kan cam cio hna. Zinglei suimilam 5 ah kah hram kan thawk lai kan timi cu kan I relhlan ah SAC leinih menute 5 aa duh ah an kan kah hmasa. Kan I kah caan sau a rauh hlanah 02 Phu leiin kan I khong ee tiah thawng a vun kan thanh, rak kan bawm uh tiah an ti. Cu nih cun kan thi a linh ter chin chin I kan Meithal puah a ranh ngai ngai. Kha lio cun CDF nih Meithal ttha kan ngeih rih huaha lo caah duh ningin kan kap kho hna lo, lai Meithal rumro sihnakaw kan zenthong hna an I taap.

Ka pawngah hin a ka zultu pakhat Meithal ken loin a um ve. A min cu Za Hup Lian si. A lai Meithal kha 07 Phu I lamhruaitu ah ka chiahmi kan hmanter. Za Hup Lian cu Meithal loin ka pawng teah a um (khual ka tlawn zongah a ka zul pengtu a si). Cun kan farnu zong 07 ah um ding si ko nain an kal nak ding kha ahmunhna a chiat ngai ngai caah ka sinah ka um ter. Nu asinain a si khawh tawkin heh tiah a kah ve hna. Kan I kah kaa khan cun an mit au a phing ngai ngai hna.

CNA kan pu bik Pu Sang nih sakhan cun nan lut hnawh kho cang hna maw tiah kan Comando pawl cu RT in a vun hal hna. An lehmi cu kan lut kho lo e an kan kahtuk tiah an ti. Suimilam 2 chungah SAC Sakhan kan lak lai kan timi cu kan I timh btk in si kho ti lo, a luh zong kan luh hnawh kho bak hna lo an kan kah tuk. Cu chinchap ah CNA kan pu le a pawng ummi hriamngan in SAC pawl nih an vun khawn hna.

Pakhat hi a paw ah khen I a chungril tiang a rawk, pakhat hi a phei ah an khawn I a fak tuk (an tan piak). Kan pu cem zong a taampawr ah a khen I ahma fak tuk. Kan I kah caan nih sau, kan khua nih sik tuk cang. Kan bawhnak hramh an sang i an cin fawn, cung leiin ruah nih a kan surh. Kan khua sih tuk hin kua thun zong a fawi lo, Meithal hmanh tthittha in kan load kho huaha lo.

Lai Meithal hmangmi an kuan nih dih ziahmah, cheukhat Meithal le zenthong aa taap. Awlawkchong le vansang in kan um hna. Khua a ceu tuk cang I SAC nih kan umnak an theih cang caah an nih nih rem tuk in an kan kah. An umnak a tthat hleiah an hriamnaam ttha kaw a kan thah dih deng. A bikin SAC Sakhan he hmaitonh ah a ummi Pura leiin a kap tu kan hawile CDF le CNA hi a den tuk hna.

CNA lei zong nih a si khawh chungin minung le zenkuan an vun kan chap ve. Pura I a ummi 06 Phu leiah I thial ding le zenthong va lak kan hau. CNA ka hawile pahnih cu nan nih rak umpi hna ulaw, kan nih 06 Phu leiah kan kal lai cun zenthong zong kan vun lak chap lai kan ti hna. Meithal aa ken lomi ka hawipa cu khah kan umnak kan I tthial lai tiah a liang ka muai I kei thlang leiah ka zuang.

Ram a buat tuk caah mawttaw lam chuah a fawi lo. Lam diltlang le pe 20 reng lo sang. Cu hmun in ttum ding cu a har tak tak. Kai hel cun caan sau tuk ka rauh fawn lai caah diltlang cun ka tolh chih. Lam ka phan I ka hna ngam, ka ttumnak khan vun ttum ko ka ti I cunglei ka zoh cu kanhawipa ra ti lo. RT in CNA ka hawipa ka chawn I ka hawipa cu ziah rat lo ka ti. Ai hngilh hi a ti. Cu ti cun 06 Phu ka hawi le sin ka panh. An nih zong an zenkuan an chanbau ngai cang.

SAC nih Lungler khua chungah hriamngan a thlak tuk caah khuami ka Sia an herh tuk. CNA Kachin ram in rak tlung mi kan hawipa sinah khua chung mi ka va zoh ta hna lai, zeidah an lawh hnga ka ti. Kan zul thiam la lo ralring tein cunglei hna zohpah hriamngan nih an tlak sual lai ti I khua chungah ka lut. Pathian nih Lungler khua cu a ven I minung an hin inn zong fak tukin a rawk hna lo. Raltuk ah a tel lomi sualnak ngei lomi mipi umnak hriamngan in an kah tuk caah kan thin linh a zual chin chin.

Lungler Rungvengtu Phu kan camp I zenthong lak dingah ka nau pakhat Thawng Tha Cung ka fial. Kan hawile cu an I kap cuahmah. suimilam paruk renglo kan I kah cang caah ruah lo piin Jet Fighter pi a vun phan. Sizung sang ka phak lio si I, khua mi pakhat he lungkhur ah kan I duup. Phone an vun call I Lungler chuahtak dingin zaam an fial.

Jet fighter nih cun SAC Sakhan pawngkam cu voi 4 a hel I CDF le CNA an umnak poh bomb a thlak. Kan hawile nih lungdongh tikah KA in an kah chih ve. Duh tawkin a kan den hnu ah a kir. (Micheukhat nih cun Jet fighter nih khan khen ding cun an kal hna hme maw an kan ti) Cu hnuah a kir tthan.

Asikhawh chungin tlik le zaam cio si. Minute 10 rauh hlanah kai tthan uh tiah order a chuak. Ram le miphun ca nun thaap mi nih cun kai tthan hau, ttih tuk buin ihnek chih si. Cu lio cun Jet fighter a dang a vun ra tthan. A duh tawkin bomb he Meithal he a kan kah. Ka pawng I ummi CNA pakhat hi a ttawk ah fak ngain a hliam. Lu le taw hngal loin tlik le zaam cio a si.

Khua mi zong Jet Fighter rat cun kan chiah hnanak hmun in an chuak, an tli an zaam. Khua akaang dih cang lai an ti I kham awk ttha loin khua an chuah taak hna. CDF le CNA zong Jet Fighter nih den tuk ruangah hmun kip ah nun himnak dingah zaam cio si. Kan minung kan vun I hlam hna I Bungkhua ah I tawn ding kan ti. CNA leiin minung pakhat le CDF in minung pakua an bau.

Keimah ka naule chungin minung Pali an bau. An thi cang ko lai kan ti I kan ngaihchia hringhran. Pehtlaihnak dingah le kan I kah lai ah an phone kan fim piak fawn hna. Suimilam pahnih hnu ah Ralpel khua kan nau pa pakhat phone aa ken mi cu kan farnu nih a pehtlaih khawh. An nung dam ko tiah an thawng kan theih I kan hna ngam tuk.
Bungkhua khua pawng ahcun kan I din hna.

Kan i kah a sau hleiah kan Meithal thawngpang le bomb thawngpang ruangah kan hna nih a theihmi zong hman ti lo. Phone call ra I ka vun tlaih. Aung Aung a thi an ti a si maw a ka ti, ka thi lo keimah ka si ko ka ti. Cu lioah forland mawttaw kha chuk ah gear 1 in a rak zuang I cuh Jet fighter ra cuh an ti le cheukhat cu lamtlaang ah an I hlonh manh!

A sau tuk cang caah hawi dang zanlei sang i an inn an panh ah kan nih inn ngei lo bang camp lawi hauhnak le sakhan kan lak ning kong cu hnu ah kan langhter te lai. Biakilh: Khuapau dohthlennak kan kal pi lioah dohthlennak thazaang a pe lomi Hruaitu nih a hruaimi Phu, khua, Peng le Tlang cu a dam kho bal lai loh! Crd-Salai Aung Aung (FB-Aung Aung)

Relchap, Moebyel Kahdohnak Ah SAC Ralkap 15 An Thi, Nithum Chung Kahdohnak ah SAC Ralkap 60 Hrawng An Thi, Shan le Karenni ramkulh aa tonnak Moebyel(မိုးဗွဲ) ah September 10 tiang ah khan kahdohnak voi thum a chuak. 10 Sept, a voi 3 nak kahdohnak ah SAC ralkap lei in ralkap 15 an thi ṭhan. September 8 in September 10 tiang nithum chung kahdohnak ah SAC ralkap 60 hrawng an thi i, an hriamnam tamlak kan lak khawh, tiah KNDF le Moebyel PDF nih an thanh.

September 10, zinglei suimilam 11:00 in zaanlei suimilam 6:30 tiang kahdohnak a chuak i, zaanlei suimilam 4:00 hrawng ah SAC ralkap nih raltuknak vanlawng hmang in voi 7 tiang vanlei kahdohnak an tuah. Kaphnih kar kahdohnak ah SAC ralkap 15 an thi, hliamhma tuar zong an tam, tiah Moebyel PDF nih an thanh.

Tualchung hriamtlai phu lei in minung 10 cu hliam hme an pu i, minung 3 hliam fak an pu, tiah theih a si. September 8 kahdohnak ah SAC ralkap 30 leng an thi, September 9 kahdohnak ah SAC ralkap 15 le September 10 kahdohnak ah SAC ralkap 15 leng an thi ṭhan. nithum chung kahdohnak ah SAC ralkap 60 hrawng an thi, tiah tualchung hriamtlai phu nih cathanh an chuah.

Thanlyin Pengah PDF Training A Dihmi 2 Cu SAC Ralkap Ah Lut In SAC Ralkap 9 An Thah Hna Hnu Ah An Zaam, Yangon ramṭhen, Thanlyin peng ah ti lei ralkap(Navy) pahnih nih anmah SAC ti lei ralkap 7 le a dang 2 cu August 31 ah khan an kah hna hnu ah an zaam, tiah theih a si. Anmah chungtel a kaptu SAC pahnih hna cu a luancia caan ah karenni ramṭhen in PDF training an rak dih hnu ah SAC ralkap sinah a lutmi an si, tiah tualchung media nih an thanh.

SAC ralkap 9 thihnak kong ah SAC ralkap nih hlathlainak an tuah i, SAC ralkap 9 a thattu SAC ti ralkap pahnih hna cu a luancia caan ah Karenni peng ah PDF training an dih hnu in SAC ralkap sin ah a lutmi an si, tiah Thanlyin ti ralkap in ṭuanvo ngeitu pakhat nih a chim.

Kalaymyo, Pyidawtha Khuami Hauh Khan Pau Cu Hriamtlai Phu Pakhat Nih SAC Ralkap Sin Ah An Kalpi!: Sagaing ramṭhen, Kalaymyo Pyidawtha khua nih khuanu khuapa can ah an hmanmi U Hauh Khan Pau(kum 45) cu aho si theih lo mi hriamtlai phu pakhat nih nizaan September 9 chunhnu suimilam 2:00 hrawng ah an tlaih i, SAC ralkap sin ah an kalpi tiah tualchung mi nih an chim.

Cun, SAC ralkap lei ah ṭang in thawngthanhnak a tuah tawntu telegram nih PDF chungtel Hauh Khan Pau cu pistol pakhat le kuan he kan tlaih, tiah an langhter. “September 9, chunhnu suimilam 2:00 hrawng ah U Hauh Khan Laung cu khuachung ah aa chawh lio ah, private motor pakhat in minung 5 hrawng nih biahalnak zong tuah hmasa loin, an tukvelh hnu ah an kalpi.

A tlaitu hna zong aho an si theih a si lo. U Pau cu khuachung ah i bochan mi upa pakhat a si leng ah ZYA-Zomi mi bawmchantu phu i hruaitu pakhat zong a si. A mah cu midai te a si, zei bantuk hriamtlai phu he hmanh pehtlaihnak a ngeimi a si lo. Atu bantuk a ruang um loin tukvelh le tlaihkhih a tonmi kong ah a chungkhar zong nih an cohlan khawh ding a si lo leng ah khuachung mipi kan ngaihchia tuk,” tiah U Pau tlaih a ton lio ah a hmutu tualchung mi pakhat nih a chim.

Pakokko Thonginn In Ramkhel Lei Thongtla Mi 5 Cu PDF Nih An Chanhchuah Hna, Magway ramṭhen, Pakokko pengkomh thonginn in a zaam mi ramkhel lei thongtlami 5 cu tualchung hriamtlai phu nih an chanhchuah hna i, a himnak ah chiah an si cang, tiah Young Force (UG) nih an thanh. Pakokko pengkomh thong inn in a zaammi hna cu dohthlennak a tuahtu ralkap chungtel 2 le ramkhel lei sualphawtnak in tlaih a tong mi 3 an si. September 10 ah khan chanhchuah an si i, a himnak hmun ah kalter an si cang, tiah theih a si.

Ramkhel lei thongtla minung 5 hna cu anmah te timhtuahnak in a zaammi an si i, Pakokko peng tualchung hriamtlai phu pah-kah-phah le Local PDF a si mi Pakokko peng tualchung hriamtlai phu PPDF, Young Force (UG), Pakokko pah-kah-phah phuhnih fonh, Pakokko Ranger, RSO(PKU) le tualchung hriamtlai phu dang hna he i bawm in thongtla a zaam mi pawl cu an va an bawmh hna, tiah theih a si.

Magway Ramṭhen, Yaw Hmunram PDF Sakhan Pakhat Cu SAC Ralkap Nih An Khangh! : “Hriamnam thazaang aa thlau tuk caah kan sakhan pakhat cu SAC ralkap pawl nih an kan hrawhpiak,” tiah Magway ramṭhen, Yaw hrambunh The Youth Force (Saw&Kyaukhtu) nih nihin September 11 ah cathanh an chuah.

“Nizaan September 10 ah ṭat-mah 77 in minung thazaang 90 he rallam sialtu SAC ralkap hna cu TYF hmunram chung ah an lut i, Kyaukhtu hrambunh in hriamngan an thlah, hmaitonh i kahdoh ding ah kan thazaang aa thlau tuk caah kan sakhan cu kan chuahtak,” tiah TYF in ṭuanvo ngeitu nih a chim.

TYF phu hna cu an him dih nain, an kaltakmi sakhan le thlam hna cu SAC ralkap nih an khangh dih. Cun, cu sakhan pawng ah a ummi tualchung mi hna thlaam le leeng zong an khangh dih hna, tiah TYF nih an langhter.
Sagaing Ramṭhen, Butalin Peng Palik Sakhan In Ralkap 2 Nih An Hriamnam He CDM An Tuah! Sagaing ramṭhen, Butalin peng, Kutaw(ကူတော်) palik sakhan in SAC ralkap 2 nih September 5 ah khan Donepian(ဒုံးပျံ) Local PDF sin ah meithal 2 he CDM an tuah, tiah theih a si.

CDM a tuahtu SAC ralkap 2 nih cun MA2, MA1 meithal 2, kuan 400, kutcheh bomb lung 5 le bomb hmanh phun lung khat an i put caah Donepian(ဒုံးပျံ) Local PDF nih minung pakhat ah sing 50 veve laksawng an pek hna i, a himnak hmun ah an kalter hna, tiah theih a si.

Chin Relief Committe Mizoram(CRCM), Aizawl Nih CJDC Chungtel Hruaitu Hna Ngeih Awk Ah An Phone Number An Taar, Chin Relief Committe Mizoram(CRCM) Aizawl nih cun, dohthlennak ah aa khawngdeng sual mi le sii-inn kalpi a hau mi hna cu Aizawl khuapi ah an si khawh chung in an rak bawmh tawn hna i,

fawi deuh tein JCDC chungtel(CNA/CDF) hna he pehtlaihnak an ngeih khawh nakhnga CRCM hruaitu hna pehtlaihnak number cu Chin ralkap hruaitu vialte nih ngeih cio ding in an duh i, an tanglei bantuk hin theihternakle nawlnak an tuah.

“Bawikhrih ah Hawidawt Unau hna Bawikhirh min in CRCM nih nan kut kan in tlaih hna. Kan ram dohthlennak ca ah a kaakip in rianṭuan cio a si lio ah kan unau hna nunthap in rian a ṭuan mi kan ralkap khawnden kan ton sual tikah, Aizawl CRCM Le VAURAWNG ZUUNTHIL i bawm in a si khawh chung in bawmh le tawlrel kan i zuam.

Cucaah ramri tiang CDF/CNA, CJDC tang ah a um mi paoh cu papek in don khawh hi kan rianngan pakhat ah kan chiah i kan ṭuan cuahmah. Aizawl ah an Umnak le Sii-inn kal tiang bawmh le tawlrel piak an si. Cucaah CJDC tang ah a um mi ralkap hruaitu le CDF/CNA hruaitu nih cun hi Number pawl hi ngeih khawh i zuam usihlaw harnak kan ton tikah thawng kan i thanh colh le rianrang in rian kan ṭuanṭi khawhnak ding ah kan hun tar ṭhan.”

Kan Lai Thilthuan He Aa Dawh Taktak Mi Kan Unau Mizo Model Muidawh Suzane Jaishi (Photo Tampi), Suzane Jaishi hi Chin mi kan thisa unau Mizo a si i, Lainu tiah kawh khawh a si ko hih Femina Miss India 2022 zuamnak ah Mizoram aiawh in aa zuam mi a si tiah kan theih. A kum hi kum 19 lawng a si rih mino te a si rih. A tungsan hi 5’6 a sang. A Zuam bik mi hi rawlchuan a si.A rawl chuannak zong social media ah a phozar lengmang mi a si. Inn zuat saram zong a daw i a tlaih chan taktak mi a si. A photo hi rak zoh ve aa dawh kho takatk. Comment te zongah thazaang rak pee ve.

Relcih,Monywa Thonginn Zohkhenhtu Phu In Officer Pakhat Cu PDF Nih An Tlaih, Sagaing ramṭhen, Monywa thonginn in palik bawi(officer) pakhat kan tlaih, tiah Fight For People F.F.P nih cathanh an chuah. Nizan September 9 ah Monywa thonginn zohkhenhtu phu in bohnih pa Myo Ngunt Aung, pumpak No. A-3386 cu Tharse(သာစည်) khua thonginn thar sakmi in a chuak i, Tharse lam ah Monywa pengkomh Battalion 2, Company(4) Fight For People F.F.P nih kan tlaih, tiah an langhter.

Fight For People F.F.P nih an tlaihmi Monywa thonginn zohkhenhtu phu in palik officer pa hi, zei tin dah dantatnak an tuah lai ti cu an cathanh ah an langhter lo. Khuapau dohthlennak, April 3 lio ah Monywa thonginn chung in thongtla mi nih, hramhram uknak duhlonak an rak langhter caah palik nih an rak kham hna i a thimi zong an rak um, tiah theih a si.

Bomb Fimhlawm Ding In A Kalmi SAC Ralkap Cu Bomb Puahhnawh An Ton Caah Ralkap 3 An Thi, 2 Hliamhma An Pu: Monywa-Chaung U lampi ah bomb hmanhmi fimhlawm ding in a kalmi SAC ralkap motor Jammer pakhat le ralkap 5 cu bomb kan puahhnawh hna, tiah Brave Heart Army – BHA in Bo Saney Maung Maung nih a chim.

“Monywa lei in a rami SAC ralkap pawl cu bomb lung 3 in kan puahhnawh caah 3 an thi i, 2 cu hliamhma faak ngai an pu. An motor zong a rawh dih caah thil cawinak seh(Crane) in an cawi i, motor nganmi cung ah an khin i an kalpi,” tiah Bo Saney Maung Maung nih cun a chim. September 4 lio zong ah Monywa in Sagaing lei ah a kalmi SAC ralkap motor Jammer pakhat le ke ralkap hna cu, Brave Heart Army – BHA nih bomb an rak puahhnawh hna caah ralkap 2 an thi i, 1 hliamhma a rak pu cang.

India-Japan Kar Pehtlaihnak A Ṭhat Deuh Khawh Nakhnga Raltuk Cawntinak Tam Deuh Kan Ngei Lai, Tiah Ramhnih Nih An Thanh, India Defense Minister le Japan Defense Minister tonnak an ngeih hnu in ramhnih kar runvennak lei ah pehtlaihnak ṭha kan ngeih khawh nakhnga raltuk cawntinak tam deuh in kan ngei lai tiah, september ni 8 ah ramhnih nih an thanh.

India Defense Minister Rajnath Singh le Japan Defense Minister Yasukazu Hamada Tokyo tonnak an ngeih hnu ah tu bantuk in ramhnih kar pehtlaihnak ṭha ser ding in cathanh an vun chuah. India runvennak ramchung ah rian rak tuan cio ding in Japanese industries pawl cu kan sawm hna, tiah India Defense Minister nih a cathanh chung ah cun a langhter.

India le Japan cu China tlerhkhonhnak kan ton cuahmah lio a si bantuk in ralkap thazang kan ṭhawnter zong a herh i runvennak budget zong kan kaiter deuh a herh, tiah an cathanh chung ah cun an langhter.

Sagaing Ramṭhen, Gangaw Peng, Myinza Khua Cu SAC Ralkap Nih An Khangh!. Sagaing ramthen, Gangaw khua chaklei ah ummi inn 350 hrawng umnak Myinza(မြင်းဇာ) khua cu SAC ralkap nih nizaan September 9 zinglei sml 7 hrawng ah an khangh, tiah theih a si. SAC ralkap 150 hrawng nih Myinza khua ah hriamngan an thlak i cu hnu ah khuachung ah cun lut in, Khua cu an khangh tiah khuami pakhat nih a chim.

Khuachung ummi mizapi cu khuachung ah um ngam loin, a himnak ah kan zaam hna. Inn an khanghnak mei cu atu tiang a mit rih lo meikhu a tam tuk rih, tiah khuami hna nih an chim. Gangaw peng ahhin SAC ralkap nih rallam an sial caah Myinza, Lapu(လာပို့), Kyaw (ကျော်) Mauk(မောက်), Mauklin(မောက်လင်း) Laypan(လက်ပံ), Muzu, (မိုးဇို), Htehlaw(ထယ်လှော်) Kyuntat(ကျွန်းတပ်), Shwebo, Yuahaung(ရွာဟောင်း), Tintaw(သင်တော) le San(ဆန်း) khua in minung 8,000 hrawng cu a himnak hmun ah an zaam hna, tiah theih a si.

Chaung-U ah Copper Phurmi SAC Motor Cu
Myaung T.G.R Nih Bomb An Thlak Hna i, SAC Ralkap 8 An Thi, Sagaing ramthen, Chaung-U peng, Natyekan(နတ်ရေကန်) khua pawng ah copper a phurmi SAC ralkap motor pakhat cu a rawk i an remh lio ah, Myaung T.G.R drone tlaitu phu nih drone in bomb an thlak hna i SAC ralkap 8 an thi, tiah theih a si.

SAC ralkap 20 hrawng cu nizaan September 9 zinglei sml 10 hrawng ah copper an phur. Cu copper phurmi motor cu a rawh caah an remh i, cu lio ah cun drone in bomb kan thlakhnawh hna, ralkap 6 cu kan mithmuh ah an thi i, minung 7 cu hliam an tuar. A thimi 6 ruak le hliamtuarmi 7 hna cu, Myinmu sii-inn ah an kalpi hna i, sii-inn ah ralkap 2 cu an thi ṭhan, tiah T.G.R hruaitu Bo Teih ka(ဗိုလ်တိုက်ဂါး) nih a chim.

Myaung T.G.R drone tlaitu phu nih cun September 8 lio zong ah khan Chaung U le Guaipintaw(ဂွေးပင်တော) khua kar ah drone in SAC ralkap bomb an rak puah cang hna. Atu bomb an puahhnawh mi hna he cun a voi 4 nak a si cang, tiah Bo Teik Ka nih cun a chim chap.

Myawaddy Ah Rallam Sialmi SAC Ralkap 2 Cu KNU Sinah CDM An Tuah: KNU Bataillon 6 nih an uknak Myawaddy peng, Tungthatguih(သုံထပ်ကွေ့) pawng ah rallam a sialmi Tat-Mah 44, Khah-Lah-Yah 8 in SAC ralkap 2 cu nizaan September 9 ah KNU sinah CDM an tuah, tiah theih a si.

SAC kuttang um, Tat-Mah 44, Khah-Lah-Yah 8, Tat-Khuai 1 in ralkap So Aung le Zaw Htun hna cu Myawaddy-Waylay lampi i rallam an sial lio ah kanmah sinah an rak zaam, tiah KNU in hruaitu pakhat nih a chim.

SAC ralkap nih myawaddy-Waylay lampi cu uk khawh an i zuam peng caah ralkap thazaang tampi hmang in thlathum chung an kan doh cang, sinain atu tiang a la kho rih lo. SAC ralkap hna cu cuka hmun ah cun a thimi an tam ngai cang i KNLA sinah CDM tuah in aa fonhmi zong an tam pinah, nizaan September 9 zong ah khan Tat-Mah 44, Khah-Lah-Yah 102 in ralkap pakhat zong KNLA nih an tlaih, tiah theih a si.

Uknak Lak Hnu In SAC Ralkap le KNU Kar Kahdohnak Ruangah Tualchungmi 130 Leng Nunnak A Liam, SAC ralkap nih uknak an lak hnu ah SAC ralkap le KNU kar kahdohnak ruangah tualchung minung 131 nunnak a liam i, minung 283 hliamhma an tuar, tiah KNU nih an thanh. SAC ralkap nih uknak an lak thla 19 chung ah SAC ralkap le KNU kar kahdohnak voi 6,359 a chuak. Cu kahdohnak chung ah cun KNU lei in minung 142 nunnak a liam i, 329 hliamhma an tuar, tiah KNU nih cun an langhter.

A liamcia thla 19 chung kahdohnak ah SAC ralkap 5,117 an thi i, minung 4,134 cu hliamhma an tuar, tiah KNU nih cun an langhter chih. SAC ralkap lei ralbawi hlun U Thein Htun nih cun KNU nih SAC ralkap lei an thihnak kong he pehtlai in cathanh an chuahmi cu a dik lo, tiah a chim. UNOCHA nih cathanh an chuahning ah SAC ralkap nih nawlngeihnak an lak hnu in SAC ralkap le KNU kar kahdohnak ruang ah tualchung mi 86,800 hrawng cu umnak hmun ngei lo in ralzaam dirhmun an phan, tiah September 5 ah cathanh an rak chuah.

LCMC(Siizung) Lawngtlai Nih Kahdohnak Ruangah Hliamtuarmi Hna Cu Dawtnak He Zohkhenh An Si Lai, Tiah Cathanh An Chuah, Myanmar ramchung buainak ruangah Mizoram, LADC (Lawngtlai District) chung ah nunhimnak kawl in aa dor hna nih damlo zawtfahnak an ton le dohthlennak ah hliamhma tuarmi hna an um i Lairam Christian Medical Center & Hospital, Lawngtlai an phanh tikah harsatnak nan ngeih ahcun kan in tuaktan piak hna lai, tiah Medical Superintendent nih cathanh an chuah.

“Kan theih cio bantukin Myanmar ram buainak ruangah Mizoram hmunkip ah ralzaam in an hawng phan hna i, Lawngtlai District chung zongah tampi an um. Cu lio ahcun ralzaam hna lakah zawtfahnak ngeimi sii-inn i zohter hau mi hna le sii-inn chung um ( Admit hau) mi hna, tangka lei harnak ngeimi tampi an um ti theih a si hi poi kan ti ngai.

Ralzaam hi lei i harnak ngeimi siizung ah i zohter man le siizung umnak man (Medical bill) pek ding ngeilo mi hna le siizung an um chung i harnak ngeimi (sii cawknak ngeilo mi tbk..) kan um ahcun a tang i min tialtu hna sinah hin i theihter(report) ding a si lai. Anmah le an dirhmun cio zoh in bawmhnak (Poor Fund) pek pinah siizung um man tiang zong dawt khawh an si lai.

“Hi pin ahhin kahdohnak ruang i hliamhma pumi, siizung a rak lutmi hna an um ahcun dawtnak in zohkhenh ding an si lai.” tiah Medical Superintendent Dr. B. Zonunsanga nih September 5 ah khan cathanh a chuah. Hi kong he pehtlai in LCMC rianṭuantu pakhat nih cun LCMC, Lawngtlai Siizing hi Lawngtlai peng chung mizaw hna nih an fuhpanh bikmi siizung a si i, atu lio ah cun ralzam tam lio a si caah ralzam mizaw zong nih an fuhpanh tawn, tiah a chim. LCMC ahhin Doctor 5 an um i, nurse 34 lengah rianṭuantu dangdang he an dihlak in rianṭuantu 97 an um, tiah The Chin Post ah a chim.

Monywa Thonginn Zohkhenhtu Phu In Officer Pakhat Cu PDF Nih An Tlaih, Sagaing ramṭhen, Monywa thonginn in palik bawi(officer) pakhat kan tlaih, tiah Fight For People F.F.P nih cathanh an chuah. Nizan September 9 ah Monywa thonginn zohkhenhtu phu in bohnih pa Myo Ngunt Aung, pumpak No. A-3386 cu Tharse(သာစည်) khua thonginn thar sakmi in a chuak i, Tharse lam ah Monywa pengkomh Battalion 2, Company(4) Fight For People F.F.P nih kan tlaih, tiah an langhter.

Fight For People F.F.P nih an tlaihmi Monywa thonginn zohkhenhtu phu in palik officer pa hi, zei tin dah dantatnak an tuah lai ti cu an cathanh ah an langhter lo. Khuapau dohthlennak, April 3 lio ah Monywa thonginn chung in thongtla mi nih, hramhram uknak duhlonak an rak langhter caah palik nih an rak kham hna i a thimi zong an rak um, tiah theih a si.

Bomb Fimhlawm Ding In A Kalmi SAC Ralkap Cu Bomb Puahhnawh An Ton Caah Ralkap 3 An Thi, 2 Hliamhma An Pu: Monywa-Chaung U lampi ah bomb hmanhmi fimhlawm ding in a kalmi SAC ralkap motor Jammer pakhat le ralkap 5 cu bomb kan puahhnawh hna, tiah Brave Heart Army – BHA in Bo Saney Maung Maung nih a chim.

“Monywa lei in a rami SAC ralkap pawl cu bomb lung 3 in kan puahhnawh caah 3 an thi i, 2 cu hliamhma faak ngai an pu. An motor zong a rawh dih caah thil cawinak seh(Crane) in an cawi i, motor nganmi cung ah an khin i an kalpi,” tiah Bo Saney Maung Maung nih cun a chim.

September 4 lio zong ah Monywa in Sagaing lei ah a kalmi SAC ralkap motor Jammer pakhat le ke ralkap hna cu, Brave Heart Army – BHA nih bomb an rak puahhnawh hna caah ralkap 2 an thi i, 1 hliamhma a rak pu cang. Crd-The Chin Post