Monywa Khuapi GTC Sianginn Ah Umhmun Khuami SAC Ralhrang An Kah Hna, 3 An Thi
================
Sagaing ramṭhen, Monywa khuapi um GTC sianginn ah umhmun a khuarmi SAC ralhrang le Pyusawhti ralhrang luhhnawh in an kah hna caah ralhrang 3 an thi, tiah Monywa Fighter Group nih thawng an thanh.
May 15, zing suimilam 9:00 tluk ah GTC sianginn kulhchung ah umhmun a khuarmi SAC ralhrang le pyusawhti pawl cu a bu in an um lio ah mipi hriamtlai phu hna nih a thli thop in an luhhnawh hna hnu ah an kah hna i ralhrang 3 an thi, tiah theih a si.
Cu kahdohnak cu Monywa Fighter Group, Bo Tathaung People’s Defense Force.BTT PDF le Monywa PDF Intelligence Corps hna fonh in kan si. Mipi ralkap hliamhma tuarmi umlo in hnulei kan tolh ṭhan kho, tiah an langhter chih.
Monywa PDF Sakhan Pakhat SAC Ralhrang Nih An Luhhnawh Caah Sing 400 Leng Man Hriamthil An Laak; Sagaing ramṭhen, Monywa pengkomh Battalion 4 chungtel Monywa Night King Ṭet-khuai(3) sakhan cu SAC ralhrang nih luhhnawh in an kah hna caah mahte serchuahmi meithal zun 21, anmah serchuahmi RPG 8, bomb 8, 60MM bomb kuan 5, RPG kuan 3, an serchuahmi bomb pawl lung 246 le hriamthil dang hna thangka in sing 400 leng man cu SAC ralhrang nih an lakpiak hna, tiah May 16 ah Khit Thit nih a langhter.
SAC ralhrang nih Monywa mipi ralkap umnak an luhhnawh hna lio ah PDF nih bomb puahhnawh an timh hna nain Cyclone thlichia ruang a zaammi mipi hna hnursuan lai an phan caah bomb cu an puahhnawh ṭhan hna lo, tiah theih a si. “SAC ralhrang nih Monywa Night King hriamtlai phu hriamthil an lakpiak dih hna caah mipi hna nih a lamkip in nan kan bawmhchanhnak lai” tiah thawngthanhnak an tuah.
Mocha Thlichia Ruangah Sagaing le Magway ah Cinthlaknak Hmun Tam Ngai A Rawk! Mocha thlichia ruangah Magway ramṭhen le Sagaing ramṭhen ah ruahpi fak ngai in a sur ruangah cinthlaknak hmun tam deuh cu ti nih a phum dih, tiah RFA nih a ṭial.
May 14 ah Magway ramṭhen Gangaw peng le Hnankha khua pawng cinthlaknak hmun acre 40 hrawng cu ti nih a phum dih, tiah Hnankha khua mi pakhat nih a chim.
“Cinthlakmi tisik anhnah zong ti nih a phum i, Chihria keo hna zong ti nih a phum. Hnankha khua pawng cinthlaknak hmun acre 40 hrawng cu ti nih a phum,” tiah Hnankha khuami pakhat nih cun a chim. Cu pin ah Yesagyo peng, Yelaykyun hmunhma ah cinthlaknak acre 4 hrawng zong ti nih a phum dih ve, tiah theih a si.
Sagaing ramṭhen, Khin U peng khua 10 leng ah cinthlaknak hmun acre thonghra(10,000) renglo cu ti nih a phum ruangah tisik anhnah an rawkral dih, tiah tualchung mi hna nih an chim. Cu pin ah Yinmapin peng Myaukyama tidil ti cu a liam i, khuate 10 in tualchung mi hna umnak inn cu ti nih a phum dih lengah cinthlaknak hmun zong an rawk, tiah theih a si.
SAC nih thawngthanhnak a tuahning ah Myanmar ram pumpi huap in tualchung mi hna umnak inn 846, phungki biaknak hmun le phungki sianginn 27, sianginn 64, sii-inn le sii-khaan 14, tower 7 lengah cozah he aa pehtlaimi inn 38 an rawk i minung 3 nunnak a liam, tiah May 15 ah cathanh an chuah. Credite; Lungmili Post