lungkhar, Timit ral dohnak ah, Ralhrang lei in ral atu ve mi laimi an i tel!
=======================
Tutan lungkhar, Timit ral dohnak ah, Ralhrang lei in ral atu ve mi laimi minung paruk an i tel ve tiah mi langhter a duh lo mi nih a chim an ti. Hakha holh a hman mi minung pa hnih zong an min le an khua an theih ko hna nain an chim duh lo ti asi. Palik maw an si. Ralhrang atuan mi maw ti cu an theih lo. Lungrawk taktak khi asi. Crd-The Chin New
Chin ramkulh, Hakha peng chung, Lungkhar tlang ah CDF nih hmunhma an khuarnak sakhaan cu a luancia June 12 ah SAC ralkap pawl nih an lak khawh cang tiah SAC leiṭang thawngzamh pawl nih an Telegram Channel ah an langhter. SAC pawl nih sakhaan lak lio ah hriamngan bawm in le a naih tein an doh hna caah CNA ralkap 2 nih sakhaan an khamnak ah an nunnak an pek tiah theih a si.
Sakhaan chung in M-22 zuun 2, AK 47 zuun 1, 12 Volt meithal zuun 1, M4 zuun 1, kuanbawm 12 le kuan 215 hna an lak khawh tiah SAC leiṭhang thawngzamh pawl nih cun an langhter.
Timit i Lungkhar tlang cu June 12 zinglei ah SAC ralkap nih an lak khawh tiah theih a si. Kan Chin ralkap hna nih a si khawh chungin an ven ve ko nain SAC ralkap hi minung thazang an tam pin ah Hakha lei nih hriamngan in an bawmh fawn hna caah kan Chin ralkap hna cu Lungkhar tlang in hnu an tolhnak a si.
Lungkhar tlang an lak caah khuate lei hna cu an thinphang ngai tiah theih a si. A bik in Zophei tlang khua hna an lungre a thei. Hi kong he pehtlai in The Chin Post nih CNF/A chimnak nawlngeitu Pu Htet Ni kan hal tikah a tanglei bantukin a chim.
“Lungkhar tlang an lak ruangah khuate lei caah thinphan tuk ding a si lo. Lungkhar tlang in Zophei lei ah an lut kho hrimhrim lai lo. SAC nih an i timhmi cu Hakha-Timit lampi hi tlaih (control) i Thantlang ah thazang chap kha a si. Hakha-Thantlang lampi an tlaih khawh lonak dingah kan i zuam lai.
Cuti ka ti tikah daithlang um khawh a si ko ka ti duhnak a si lo. SAC zia cu nan theih cio bang Vanlawng in khuate zong a kah khawh ko. Cucaah ralring tein um cio ding a si ko. Lungkhar tlang ah SAC ralkap nih saupi hmunhma an la kho lai lo. Lak than dingin kan i zuam lai”.
Lungkhar tlang hi SAC caah siseh kan Chin ralkap hna caah siseh a biapi ngai mi hmunhma a si. Asinain Lungkhar tlang an lak ruangah khuate lei fawi tein an lut kho lai tinak a si lo. Ralring tein um cio hna usihlaw thinphang thlalau tuk cun um ding a si lo.