Gangaw Khua Ah SAC Ralhrang Nih Khua Upa Pakhat An Kahthah
=========
Magway ramthen Gangaw peng, Min-yua (မင်းရွာ) khua lei a kal mi SAC ralhrang pawl cu May 7 ah Bomb puah hnawh an ton hnu ah lam aa chok mi khua upa pakhat cu an kahthah pin ah a phone zong an chuh tiah kan theih. “Kum 60 tluk a si cang mi upa cu thah a tong, a thimi pa a fa le zong SAC ralhrang chung ah an um hna, ralhrang nih zeitin dah an thah timi tu cu kan hngal lo” tiah Gangaw khua mi pakhat nih a chim.
Yaw-Alin-Tan nih a langhter ning ah “Bomb puah hnawh nak ah SAC ralhrang pawl a thi le hliamtuar an tam caah ralzam a si mi pakhat an thah. Ralhrang pawl cu May 8 ah Min-yua khua in an chuak i Gangaw lei ah an kir i Paw-lay khua an phan” tiah a langh ter. Aluan cia May 3 zanlei sangah Mit-thar tiva ah takkholh dingin a kal mi SAC ralhrang kuttang riantuan Palik 2 thah an ton hnu, May ni 4 ah Min-yua khua ah umhmun khuar ding in SAC ralhrang an rat hi a si. “Hi hna pawl cu Min-yua an phak hlan lam pi ah Bomb kan puah hnawh hna i ralhrang pakhat a thi” tiah tualchung PDF pakhat nih a chim.
Manipur Ram Buainak Ruangah Mizoram Siangngakchia 34 MZP Nih An Lak Hna; Manipur ram Miphun kong buaibainak ruangah Mizoram mi Manipur ah sianginn kai minung 34 hna cu Mizo Zirlai Pawl-MZP nih kan lak hna tiah May 7 ah thanhca an chuah.
Tutan ah siangngakchia 34 an lak mi hna cu 𝐁𝐞𝐭𝐡𝐞𝐬𝐝𝐚 𝐒𝐜𝐡𝐨𝐨𝐥 𝐨𝐟 𝐍𝐮𝐫𝐬𝐢𝐧𝐠, 𝐂𝐡𝐮𝐫𝐚𝐜𝐡𝐚𝐧𝐝𝐩𝐮𝐫 ah sianginn kai mi an si. Manipur ram buainak ruangah khua dang cio zong an mah le Miphun pawl an lak cio hna bantuk in MZP zong nih Mizoram mi an lak ve hna hi a si. Mizoram Siangngakchia an lak mi hna chungah Aizawl, Lunglei, Lawngtlai, Mamit le Kolaship District mi deuh an si hna pin ah Assam le Meghalaya khua ah a um mi zong an tel hna. Mizoram siangngak chia tlunkalnak kongah bawmchan tu Siamsinpawlpi (SSPP) le ZRA hna cung ah lunglawmhnak kan nei tiah MZP nih an langhter chih.
Htilin Peng Inn 200 Leng Umnak Khua SAC Ralhrang Nih An Khangh, Miruak 3 Hmuh A Si; Magway ramṭhen, Htilin peng, Ahkyiban (အကြည်ဘန်း) khua cu SAC ralhrang thazaang 150 hrawng nih May 6 zing ah an khangh i, miruak 3 zong hmuh an si, tiah tualchung mipi nih an chim. Htilin khuapi le Kyaukhtu khuapi in rallam a rak sialmi SAC ralhrang cu May ni ah Ahkyiban khua lut in zan an riak hnu, May ni 6 zing ah atu bantuk in khua an khanghpiak hna hi a si.
“SAC ralhrang nih inn 200 leng a umnak Ahkyiban khia an khangh caah a ciam dih nawn i, inn 10 hrawng lawng a taang. Kahdohnak zong a umlo, khua an luhhnawh i mipi inn an khanghpiak hna pin ah mipi tlaihkhih in an thah hna hnu ah mei in an khangh chih hna” tiah tualchungmi pakhat nih Khit Thit Ah a chim.
SAC ralhrang pawl cu May ni 7 ah khan Ahkyiban khua pawng Ahnyarban (အညာဘန်း) khua an luhhnawh ṭhan i, Ahkyiban khua zong ah a zam manh lo mi mipi hna an tlaihkhih hna, tiah theih a si. Ahkyiban khua pawng tualchung hriamtlai phu hna nih checkhlatnak le thianhhlimhnak an va tuah i, SAC ralhrang nih mipi an khanghmi hna ruak 3 an hmuh. SAC ralhrang nih hriamngan in an kah hna caah hnulei an tolh ṭhan, tiah theih a si. Credite; Lungmili Post.