Mindat Peng Ah SAC Ralhrang Nih Bomb 2 A Thlak
=========
Chin ramkulh, Mindat peng, Lokeshel khua pawng ah SAC ralhrang nih June 28, zinglei suimilam 10:50 tluk ah jet vanlawng pakhat in bomb 2 a thlak, tiah theih a si.
SAC ralhrang nih atu bantuk in bomb a thlakmi ruang ah mipi inn pakhat le nga zuatnak hmun tiang a rawk. Cunglei in a kah tlawmpal ah mahka khua cu Mindat hrambunh SAC ralhrang 274 Battalion nih 120MM hriamngan in voi 10 hrawng an kah chih hna caah phungki sianginn zong a rawk, tiah theih a si.
Chun suimilam 1:00 tluk zong ah Mindat peng chung hmun pakhat cu SAC ralhrang 274 Battalion nih a ruang umlo in 120MM hriamngan in voi 3 tiang an kah ṭhan caah mipi inn a rawkmi an um nain mipi nunnak liammi le hliam a tuarmi an um lo, tiah theihchih a si.
American hlasak thiam Madonna cu a zawtnak ruah lo pi in a puan caah Intensive Care Unite (ICU) ah rianrang in an luhpi hlasak puai (concert) a tuah ding mi dih lak zong ṭhulh piak asi tiah an langhter.
Kum 65 mi Madonna zawtnak hi a fak ngai mi a si caah caan zeimawzah chung cu ICU ah zohkhenh a si lai. Hi kong he pehtlai in, a manager ṭuan mi Guy Oseary nih Madonna dir hmun hi a ṭha lei panh ding ah si-bawi te nih an i ruahchan ko sinain, tu ahcun amah taksa hi ṭha te in zohkhenh a hau rih lai tiah an chim.
‘Queen of Pop’ ti tiang in kawh mi Madonna nih a hla thar a chuah mi hi hlasak puai (concert) tuahnak ah a sak ding mi a si. A siinain, a ngamdamnak nih a tlinh lo caah zeitin a kalpi lai ti theihkhawh a si rih lo.
France ram pumpi ah zaankhat chung in buainak fakpi a chuak, a ruang cu lam hngak tu (Traffic) Palik hna nih African mi phun tleirawl pakhat an kahthahnak ruang ah a si. Hi kong he pehtlai in, President Emmanuel Macron nih a tu bantuk in tonpumhnak a khawh hi asi.
A zaan hnihnak ah tualchung mi duhlonak langhter in lam a zawh mi, minung 150 tluk cu Palik nih an tlaih hna tiah Interior Minister Gerald Darmanin nih a chim. Mipi thinhunnak cu zalampi ah a karh chin lengmang a bik in France khuapi ah a zual tiah theih asi.
Buainak a hrampi aa thok ning cu, Paris nitlak lei khuapi leng Nanterre ah African tleirawl kum 17 Nahel tiah kawh mi cu Palik nih an kahthah tiah theih asi. Social media tampi nih an langhter ning cun, Palik officer pa hnih lak i pakhat nih African tleirawl motor in zaam aa tim mi cu lam neih te in a kah tiah an langhter. Palik cheukhat nih an chim ning cun, African tleirawl hi a motor cung in chuak ding ah nawl kan pek a sinain a zaam chih caah a tu bantuk in kan kah hi a si tiah an chim ve.