SAC ralhrang nih a hohmanh zaan ah chuah lo ding in ralring an peek!!

“Zaan A Chuak Lo Ding” Timi Nawl A Zul Duh Lo Mi, Minung Pa 7 SAC Ralhrang Nih Thongdan An Peek Hna!!
===========================
Irrawaday ramthen, Pathein pengkulh ah pohma-144, Nawl no. (5/2022) in July ni 26 ah SAC ralhrang nih cathanh an chuah mi, “zaan chuah lo ding” timi nawl an zulh lo caah thongdan thla 1 peek mi minung pa 7 an umnak kong cu, Pathien pengkulh uknak suaisamtu phu sinin kan theih.

May be an image of 3 people, monument, road and sky

Biaceihzung nih thongdan thla 1 a peek mi, minung pa 7 hna cu “Zaan chuah loding” timi SAC ralhrang nih nawl an chuah hnu July ni 26 in September ni 21 tiang chungah thongdan peek mi an si nak kong cu kan theih. Cu thongdan peek mi hna cu nawl an chuah mi zul duh loin zaan suimilam 12:00 lengah lam ah an i chawkvak caah upadi ning in dantatnak peek mi an si, tiah kan theih.

May be an image of 3 people, monument, road and sky

Pathein pengkulh chungah minung pa 5 a siloah minung pa 5 nakin tam deuh, motor lampi (lammahgyi), mipi Kalknak lam, Lam kual, Lam lai, lam kar, dum, mibuu tampi an umnak hmun, lam len (vah, veih), a buu le a tlang pi in lam len, Mipi sinah biachim (thawngtha chim), thang piin va au..etc..tibantuk in tuah lo dingin nawl an chuah, tiah kan theih.

May be an image of 3 people, monument, road and sky

Cu pinah zaan suimilam 12:00 in zinglei suimilam 4:00 tiang hohmnah na leng ah chuak lo dingin ralring an peek hna i, nawl zulh duh loin a leng a chuak mi paohpaoh danttaknak fakpiin peek an si lai tiah kan theih

Relchap, (Taze Ah Ni 6 Chungah Voi 15 Inn An Khangh Pinah Tualchungmi 10 Thah An Tong, Sagaing ramṭhen Taze peng chungah ni 6 chungah khuate 12 ah voi 15 tiang meikhangh piak kan ton pinah tualchungmi 10 meikhanghnak in an thah hna tiah mipi ukhruainak phu nih cathanh an chuah. SAC ralkap pawl cu September ni 17 in 22, ni 6 chungah Taze peng khuate hna ah lut in, inn khangh, tualchungmi tlaih i ralphaw ah kalpi le thah tihi nitin ngawt in an tuah theih a si.

SAC ralkap pawl cu Taze peng chungah hin a hlannak in rallam an sial caah khuate 30 in tualchungmi minung 17000 hrawng cu a himnak ah ral an zaam hna tiah theih a si.

Yards 1000 Tluk A Kap Khomi Hriamngan PDF Nih Tlamtling Tein An Serchuah, Yards 1000 tluk tiang a kap khomi 60 mm hriamngan cu tlamtling tein kan lim cang tiah Federal Revolution Force (F.R.F) nih cathanh an chuah tiah theih a si. Lamhla kahnak simi 60mm hriamngan le bomb hna cu tlamtling tein kan ser khawh cang tiah an cathanh ahcun an langhter.

Hriamnam sernak lei ah hin phaisa (budget) lei chanbaunak a um ruangah caan kan rau ngai. Mipi sinah bawmh kan hal bantukin nan kan bawmhmi cu man ngei tein ka hman tiah an cathanh ah cun an langhter chih. F.R.F tualchung hriamtlai lawng siloin tualchung hriamtlai phukip nih hriamthil an serchuah mi a phun a tam ngai cang tiah theih a si.

KhinOo dawr chungah palik nu pakhat kahthah a tong, zarhkhat chung ah palik 10 nak tlawmlo an thi, Sagaing ramṭhen, Shwebo pengkomh KhinOo khuachung dawr ah nihin September 22, zinglei suimilam 7:00 hrawngah dawr thil a cawtu palik nu pakhat cu meithal in kah a ton caah a thi tiah dawr thil zuartu hna nih an chim.

“KhinOo peng, pengkulh palik zungah rian ṭuanmi palik Ma Cho kahthah a tong, dawr thil a cawk lio ah a ho si theih lomi hriamtlai pahnih nih an kahthah” tiah palik chungtel hna nih an chim. Sagaing ramṭhen, palik phu hna he naihniam in a ummi pakhat nih ” tutan zarhchung, zarhkhat chungah palik chungtel a thimi hi, nihin zinglei ah khahthah a tongmi palik nu pakhat telhin minung 10 nak tlawmlo an si cang” tiah a chim.

Khuapau dohthlennak caan chungah tualchung minung 2300 leng an nunnak a liam cang tiah AAPP nih thanh, Khuapau dohthlennak caan chungah nunnak liammi tualchung mipi 2303 an si cang tiah ramkhel lei thongtla bawmchantu phu AAPP nih September 21 ah cathanh an chuah. SAC ralkap hna nih hramhram uknak an lak 2021, February thla in 2022, September 21 tiang ah tlaihkhih a tongmi dihlak hi 12,455 an si, cu chung ah thongthlak dingin biakhiah piak a tongmi hi minung 1485 an si.

Thih-dan tiang pek a si i thongah khumhmi dihlak hi minung 84 an si tiah AAPP nih cazin khomhsuatnak an tuahmi cu an langhter. Aa-mah-khan in luatnak a hmutu minung 22 an si i, luatnak a hmutu dihlak in 3114 an si tiah an langhter chih.

SAC ralkap hna nih phungning loin an phihkharmi inn dihlak hi SAC nih uknak an lak thawk in 2022, August thladih tiang ah inn 760 nak tlawmlo a si. A tu ah langhtermi cazin hi AAPP nih an khomhsuatmi cazin a si i, a tak le a leng ah a tu i langhtermi nak in a tamdeuh kho tiah an langhter chih.

Russia Sinah Hriamnam Bawmhnak Ka Pe Lo – North Korea, Russia sin ah zeibantuk hriamnam bawmhnak hmanh kan pe lo, hi pin zongah kan pe lai lo tiah, North Korea nih cun a chim tiin KCNA media nih a thanh.

Kan ral si a duhmi US nih N.Korea ram nih Russia hriamnam a bawmh UN phung a buar a kan timi cu a dik lo mi a si, Russia cu bawmhnak kan pe bel lo, hi pin zongah pek kan tim hrim lo tiah, N. Korea Ministry of Defense tang um hriamnam sernak in tuanvo ngeitu pakhat nih a chim.

Ukraine tuknak ah hman dingin Russia nih N.Korea sinah Missile le hriamnam tamlak cawk a tim tiah, US nih cun a rak chim. Cu kongah mi ramdang kongah holh lo tein um ding in le mi ramdang kongah a dik lomi chimrel lo ding in N.Korea nih cun US cu ralrin a pek.

Trump le A Fale Pathum Thil Dik Lo Tuah Ruangah Taza An Cuai Hna! US President hlun Trump i ngeihmi Trump Organization cu tuanvo ngeitu pawl nih checkhlatnak an tuah dih hnu in Trump le a fa le pathum cu thil diklo/dehhlennak tuah ruangah September 21 ah tazacuai an si, tiah theih a si.

Trump le a fale pathum cu ngunkhuai tlawm deuhnak dingah tiin inn hmun zuarzamhnak an tuahmi he pehtlai in billion tampi dehhlennak an tuah tiah, tuanvo ngeitu hna nih cun sual an phawt hna. Trump Organization cu 2011-21 tiang ah a dik lo mi thil tampi an tuah tiah sihni hna nih cun an chim, cu kong he pehtlaiin Trump nih cun a cohlang lo. Donald Trump Jr, Ivanka Trump, Eric Trump le Trump Organization in tuanvo ngeitu pahnih hna cu bia-ingtu ah (တရားခံ) an chiah hna.

Trump Organization kong he pehtlaiin kumthum chung checkhlat an si hnu in NewYork ramkulh Attorney General Letitia James nih atu bantukin taza a cuai hna hi a si.

Pago ramthen, Paungde ah SAC ralkap minung palhin anmah le anmah an i kap, Pago ramthen, Pyi pengkomh, Paungde peng khua pakhat ah, nizaan September 21 zaanlei ah, Paungde(ပေါင်းတည်) SAC ralkap le Patikung(ပုတီးကုန်း) SAC ralkap hna cu, PDF ah an i ruah veve caah anmah le anmah an i kap i SAC ralkap 1 cu faak ngaiin hliam a tuar tiah theih a si.

Tharhlapyinsi(သာလှပင်စည်) phungki sianginn ah PDF 15 an phan tiin thawng kan theih caah, Padekung ralkap hna cu kan kal i, cu hnu tlawmpal ah Paungde ralkap 5 cu an rak phan ve, PDF an si tiin kanmah le kanmah kan i kap tiah SAC ralkap pakhat nih a chim tiah theih a si.

Cu an i kahnak ahcun, Padekung SAC ralkap pakhat a taang ah faak ngaiin hliam a tuar, Patekung ralbawi pakhat nih kanmah le kanmah kan si a theih i , cu hnu lawng ah kahdohnak cu kan ngol, cu kan i kahdohnak ruangah phungki sianginn cheukhat cu an rawk tiah SAC ralkap pakhat nih cun a chim chap.

Myanmar Rammi 5 Le India Rammi 2 Cu Hriamnam He Aa Pehtlaimi Thilri He Assam Rifle Nih An Tlaih Hna, India ram, Mizoram ramkulh Saiha pengkomh ah Myanmar rammi 5 le India rammi 2 cu rupees sing 16 man, hriamnam he aa pehtlaimi thilri he Assam Rifle nih nizaan September 21 ah an tlaih hna, tiah theih a si.

Runvennak zungin chimphuannak nawlngeitu palik Lieutenant Colonel Mahendra Rawat nih, “Kan tlaihmi hna cu airgun le a kuan, ralthuam, radio thil, raltuknak thuam angki banian, kuthrolh le kedan telh in rupees sing 16 man a si,” tiah a chim. Kan tlaihmi thilri hna hi Myanmar ram ah kalpi dingin an i timh pinah ralkap le raltuknak he aa pehtlaimi a si i, Myanmar ram chungah hnahnawhnak a pe khotu thilri an si caah kan tlaihnak a si, tiah a chim chap.

“Hi thilri kan tlaihmi thawngin Indo-Myanmar ramri ah daihnak, hnangamnak le rualremnak sernak caah a biapi ngaingaimi a si,” tiah India cozah nih cathanh an chuah.

Kyauktaw Peng Nagaya Khua Ah SAC Ralkap Nih Hriamngan An Kah Caah Khuami 4 Hliamhma An Pu, Kahdohnak zeihmanh um loin Kyauktaw pawng Nagaya khua ah SAC ralkap Kyauktaw No.9 Operations Command Headquarters nih September 20 zaanlei sml 4:30 hrawng ah hriamngan an kah caah Nagaya khuami 4 hliamhma an pu, tiah theih a si.

SAC ralkap No. 9 Operations Command Headquarters in hriamngan an kah caah Nagaya khuami U Yin Than(40) a inn hmaiah hriamngan kuan a tla i, amah U Yin Than telh in a fapa Myo Hlaing Win(17), Min Aye Soe(13) le U Yin Than a nu Mya Yin U(65) hliamhma an pu.

“Inn chung kan um lioah hriamngan kuan cu kan inn hmaiah a rak tla. Ka fapa cu inn cungah ca a ciah lio a si i a lu, a kut le a keng ah aa hliam. Ka fapa hniang cu a phei le a kut ah aa hliam, kei cu ka kutdong le ka kiu ah kaa khawng,” tiah U Yin Than nih a chim.

SAC ralkap nih tilam an phih caah Kyauktaw sii-inn kal khawh a si lo. An lu ah hliamhma pumi hna cu Kyauktaw sii-inn ah va zohter cu kan duh tuk ko nain kal khawh a si lo,” tiah hliamhma pumi chungkhar Aung Kyaw Min nih a chim. Kyauktaw ah umhmun khuarmi SAC ralkap No.9 Operations Command Headquarters in hriamngan an kah ruangah Hkawngtauk(ခေါင်းတုတ်) khuami nu pakhat zong hriamngan thawngpang ruang ah a nunnak a rak liam.

Pakokku Peng Ah SAC Ralkap Nih Khuate An Khangh Caah A Tlawm Bik Inn 10 A Ciam, Khuami 2,000 Leng An Zam, Magway ramṭhen, Pakokku peng Kawunlay(ဂဝံလေး) khua ah SAC ralkap pawl rallam an sial i, inn an khangh tiah theih a si. SAC ralkap 90 hrawng cu nizaan September 21 chun ah Kawunlay khua ah rallam an sial i, nihin September 22 zinglei ah Kawunlay khua cu an khangh caah inn 10 a ciam, tiah Pakokku peng mizapi uknak phu in ṭuanvo ngeitu nih a chim.

“Pauk peng leiin rallam a sialtu SAC ralkap 91 nih nihin zing sml 6:00 hrawngah Kawunlay khua cu an khangh. Khua khat hnu khuakhat an luh paoh ah meithal an puah,” tiah a chim chap. SAC ralkap nih rallam an sial caah Kawunlay le Myinthpia khuami 2,000 leng cu a himnak hmun ah an zam, tiah theih a si.

Myanmar Rammi 3 Sinah Mizoram Palik Nih Bing Rang An Tlaih, India ram, Mizoram ramkulh, Aizawl peng chungah nihnih chungah Myanmar rammi 3 hna sinah bing kan tlaih, tiah Mizoram palik nih cathanh an chuah tiah theih a si. Aizawl peng Tuirial khua ah September 20 lioah Van Cung Bia(32) cu gram 202 a ritmi bing he kan tlaih. Anih hi Sagaing ramṭhen, Kalay peng Haikhawl-Tuingo khua ah a ummi a si, tiah an langhter.

Nizan September 21 ah Tuirial khua ah Tha Sui(32) le Duh Nei Mawi(25) cu gram 147 a ritmi bing he Mizoram palik nih an tlaih than hna. Annih hi Kalaymyo Tahan(C,B) sang ah a ummi an si i, ralhrial in aa dormi kan si, tiah Tha Sui le Duh Nei Mawi nih cun an chim. Mizoram ramkulh ah rithaisii dohtu phu le Mizo mino phu hna nih an dirhmi Central Anti-Drugs Squad (CADS) nih rithaisii fak piin an doh cuahmah i, September 10-21 tiang ah bing kilo 1 leng an tlaih cang, tiah theih a si.

Ukraine Tuk Dingin Reserve Ralkap Kawhmi Duh Lo Ruangah Russia Ah Dulonak An Langhter! Ukraine ram do ding in Russia President Putin nih reserve ralkap a kawhmi ruangah ramchung hmun tampi ah duhlonak an langhter i minung 1300 renglo palik nih an tlaih hna, tiah a ngiathlaitu OVD phu nih an chim.

President Putin nih bia a chim dihin Russia ram khuapi 38 ah mipi nih duhlonak an langhter colh i a tlawmbik minung 1332 an tlaih hna, Russia nih Ukraine a tuk hnu in a ngan bikmi duh lo langhternak a chuah a si, Palik nih cun an tuk velh leen hna tiah, Interfax media nih cun a tarlangh.

Ukraine tuknak ah a lamkip kan hman lai tiah Putin nih a chim hnuin Russia Defense Minister Sergei Shoigu nih Ukraine tu dingin Reserve ralkap Sing thum kan kawh lai tiah, nizaan september 21 ah a chim ve. Ralkap singthum lak chap ding thawngthanh a si hnu in a ralaimi caan chung Russia ram in ramleng a chuak ding vanlawng ticket cu an i cawk cia dih hna i cawk awk a um ti lo tiah, theih a si.

Tonzang Peng Cheuthum Cheuhnih Cu CDF Tonzang Nih An Uk Cang, Chin ramkulh, Tonzang peng cheuthum cheuhnih cu CDF Tonzang nih kan uk cang. Tonzang peng dihlak in uk khawh ding zong kan i zuam cuahmah, tiah Tonzang peng mizapi uk hruainak phu nih an thanh tiah theih a si. A luancia April 23 ah Tonzang peng Lungtat(လုံတပ်) khua ah Tonzang-CDF he i bawmin minung 11 in mizapi uk hruainak phu an rak ser i, Tonzang peng ah an cawlcangh hi a si.

“Tonzang peng nichuah lei khua cheuthum cheuhnih cu kan uk khawh cang. Khuate hna cu mizapi uk hruainak phu chung in khuabawi hna nih an uk hna. Sianginn zong kan hun i, ca an cawng kho cang. Tonzang peng ah SAC kuttang khuate 16 hi kan uk kho rih lo, cu hna zong uk khawh dingin kan i zuam cuahmah ko,” tiah Tonzang peng mizapi uk hruainak phu hruaitu nih a chim.

CDF Tonzang le mizapi uk hruainak phu i bawm in SAC kuttang rianṭuantu hna cu atu le atu ralrin kan pek hna caah zung rianṭuantu cheuthum cheuhnih cu mizapi lei an ṭang cang. SAC kuttang ah rianṭuantu hna zong a ra laimi November thla thok in dantatnak kan tuah cang hna lai, tiah mizapi uknak nih an thanh.

Kawtaung In Thailand Ram A Kalmi Myanmar Mi 20 An Tlaih Hna, Thailand ram thlanglei Yanaung(ရနောင်း) pengkomh ah Kawtaung(ကော့သောင်း) in phungning loin a kalmi Myanmar rammi 20 cu, September 20 ah Thai palik nih kan tlaih hna, tiah cathanh an chuah.

Yanaung pengkomh Nakha khua pawngah Myanmar rammi 20 a phortu motor pakhat a kal thawngpang cu Thai palik nih an theih i, zaan sml 10:00 ah Sauksaram( စုက်စာရမ်) check gate in an bawh hna. Myanmar rammi 20 a phortu motor cu deilei sml 2:00 hrawngah Hpannga(ဖန်င) pengkomh Khuyaburi( ခူရာဘူရီ) lei a kal lioah nawlngeitu hna nih an check i, Myanmar rammi 20 cu an tlaih hna tiah theih a si.

Kawthaung in aa thawhmi Myanmar rammi 20 cu Thailand ram ah rianṭuan ding in a kalmi an si i, minung pakhat ah Baht 22,000 an liam. An tlaihmi hna chungah nu 7, pa 10 le kum tling lo pa 3 hna an si, tiah theih a si. Ram chung buainak ruangah thilman a kai, rianṭuan awk a har chin lengmang caah Myanmar rammi hna cu tangka kyats sing 40 hrawng dihin Malaysia le Thailand ram ah an kal. Thailand ram ah a luancia August thla lioah motor pahsualnak voihnih a chuak i, Myanmar rammi a tlawm bik minung 8 an nunnak a rak liam.

Myinkin Peng Kahdohnak Ah PDF Nih SAC Ralkap 10 An Thah Hna, Sagaing ramṭhen, Myinkin pwng ah SAC ralkap pawl cu PDF nih an kah hna caah ralkap 10 an thi, tiah theih a si. Nizan September 21 zaanlei sml 2:45 ah Myinkin peng Taungyataw(တောင်ယာတော) khua um SAC ralkap gate pakhat cu, PDF nih an kah hna caah SAC ralkap 4 an thi i, 5 sii-inn an phan.

“Tualchung mi pakhat nih, “Motor cu Chin Dwin tiva chaklei in a rak ṭum i, cu hnuah an kah hna. SAC lei in a thimi zong an tam. Kahdohnak a dih in PDF pawl cu Chin Dwin tiva chaklei ah teinak hla sak pah in an kai,” tiah a chim. SAC ralkap a thimi le hliamhma pumi hna cu kethum ngei cycle 2 nih Myinkin sii-inn ah an kalpi hna. PDF lei in a thimi le hliamhma pumi kan um lo, tiah Chin Dwin Naga Myinkin nih cathanh an chuah.

Cu bantukin nizan September 21 ah Myinkin peng Lapu khuain a chuakmi SAC ralkap pawl cu, PDF nih bomb an puahhnawh hna caah SAC ralkap 6 a hnun ah an thi colh. Tam ngai hliamhma an pu, tiah Myinkin Spring Revolution nih an thanh. ) Crd-The Chin Post