Mocha Thlichia Ruang ah A Thimi Cazin Dik Tein A Thanh Lotu Poh Tazacuai An Si Lai – SAC Ralhrang
==================
Mocha thlichia ruang ah inn rawkral le nunnak liam kong ah lih le hrokhrol in a thimi cazin a thanhtu poh tazacuai le dantat an si lai, tiah SAC nih tlerhkhawnnak cathanh a chuah i, thlichia ruang ah a thimi minung 400 leng an si cang timi zong thawng dik lo a si, tiah an thanh.
Cathanh an chuah mi chung ah, “A thi mi hi an dihlak cu minung 145 an si. A thimi hi a tam deuh cu Rakhine ram in an si i a thimi chung ah Rohinjia ralzam camp chung in minung 91 an i tel,” tiah an langhter. Hi cathanh hi thlichia a hran ni 5 a rauh hnu ah SAC nih a voi khatnak cathanh an chuahmi a si.
Thlichia ruangah hartongmi Rakhine rammi hna ca ah Ta’ang National Liberation Army(TNLA) nih Rakhine hriamtlai Arakan Army(AA) sinah Kyats sing 500 an pek i, bawmhnak an pekmi cungah AA hruaitu Htun Myat Naing nih lawmhnak bia a chim.
A luancia ni tlawmpal ah khan NUG nih kyats sing 1,000, KIO nih kyats sing 3,000 le Kokant hriamtlai MNDAA nih kyats sing 1,000 bawmhnak an pek cang hna, tiah theih a si. Rakhine ram cu thlichia nih fak tuk in a den ruangah inn le lo tampi a rawk i, harnak nganpi an ton caah bawmhchanhnak rian hma a kal khawh deuh nakding ah bawmhnak kan pek hna hi a si, tiah TNLA nih nihin May 20 ah cathanh an chuah.
“Mocha thlichia ruangah Rakhine mizapi harnak kan ton lio ah atu bantukin kanmah he ṭangṭi phu tlangcung hriamtlai hna nih an kan bawmhchanh cio caah lunglawmhnak tampi kan ngei,” tiah General Htun Myat Naing nih cun a chim.
Rakhine ramchung ah thlichia nih a hrawhmi inn le lo hna cu AA hruainak in an remh cuahmah hna i, lam le thingkung a purmi hna zong thianhhlimhnak an tuah, tiah theih a si.