SAC Nih Thimnak A Tuah Dingmi Ah Russia Nih A Bawmh Lai
===========
SAC nih a tuah dingmi thimnak(election) cu tlukruannak a ngeimi a si khawh nakding ah Russia nih kan bawmh lai, tiah Russia Duma Hluttaw Deputy Chairman Sholban Kara-ool nih a chim. May 30 ah Sholban Kara-ool le Min Aung Hlaing cu Shan ramkulh, Taunggyi khuapi ah tonnak an ngei i, atu bantukin Mr.Sholban Kara-Ool nih Myanmar cu thimnak ah a bawmh naklai kong a chim nain zeitindah a bawmh lai ti cu fianghlang tein a chim lo.
Russia Duma Hluttaw Deputy Chairman le SAC kuttang Union Election Commission Chairman Thein Soe nih a hruaimi aiawhtu phu he zong May 30 zinglei ah tonnak an ngei. Sholban Kara-ool nih cun Myanmar ram i ukhruainak a upatnak kong a chim pinah SAC kuttang Union Election Commission Chairman Thein Soe zong nih tlukruannak a ngeimi si ding in thimnak kan tuah lai i vote firnak a um lonak ding zong upadi kan ser, tiah Myanmar Alin ah a chim.
SAC nih zeitik ah dah thimnak kan tuah lai ti cu biafiang a thanh rih lo nain SAC hruaitu hna he tonnak an ngeih lio atu bantuk in Myanmar ram thimnak kong he pehtlaih in Russia Hlttaw palai Sholban Kara-ool nih cun a chim, tiah The Irrawaddy nih a ṭial.
Myanmar ram uknak latu SAC ralhrang lei pahnihnak bawizik Soe Win le Tuluk ralbawi (Acting Director of Military Intelligence) Major General Yang Yang cu Naypyidaw khuapi ah i tonnak an ngei, tiah SAC thawngzamhnak nih a langhter.
“2023, May 30 ah atu bantuk in Tuluk ralbawi (Acting Director of Military Intelligence) Major General Yang Yang le SAC pahnihnak bawizik Soe Win nih ceihhmainak an ngeihmi cu Tuluk-Myanmar ramri a deih khawhnak ding ca ah a si” tiah SAC ralhrang nih an langhter.
Atu hi Tuluk cozah nih Arakan Army(AA), Ta’ang National Liberation Army(TNLA) le Myanmar National Democratic Alliance Army(MNDAA) hna telh in nitlak lei hriamtlai ṭangṭi phufonh (3) hna le SAC ralhrang karlak ah remdeihnak ceihmai ding in Mongla hmunram ah i tonnak an ngeih khawhnak ding ah timhlamhnak an ngei, tiah theih a si.