Russia nih computer raldohnak a tuah khawh!

Russia nih computer raldohnak a tuah khawh!
=========
Nizan ahkhan US President Joe Biden nih thawngthanhnak a tuah. Biden thawngthanhnak tuah hlan in DHS tbk nih ralrin peknak an rak thanh cang. EU lei cu ralring tein an um cang tiah theih an si. “Computer raldohnak” tiah tulio sining he ai tlakin tlaangtar ka tuah nain, Russia nih “cyber attack” a tuah khawh tiah an zumhnak kong a si.

“Cyber attack” timi cu na computer chungah mifir sual nih an luh hnawh khawh i na phaisa vialte an fir khawh dihmi phun khi si. Joe Biden biachim ningah cun, “Russia nihhin, US ram chungah cyber attack tuah kho dingin thiamnak le fimnak an ngei,” a ti. Cucaah iralrin dingin US president simi pi nih a thanhnak cu si. Nihin hrawngah cun Korea lei news pawl zong nih an thanh leen.

Kapersky Anti-virus timi kha Russia ta a si. Vawleicung minthang computer anti-virus software pakhat si ve khi mu; nan theih cio ko lai. Mah khakha hman lo bak ding a si, an ti ko cang. Biden thawngfianhnak cu ka zoh ve i, ka uar dom. A mirh pah salam. Russia khi phihlik tluk hmanh ah rel hlah sehlaw, ka lawhter.

Russia nih Chemical weapons a hmang cang maw cang lo ti pawl kong khi a hrilhfiah. Biden bia ningah cun Ukraine zong nih Chemical le Bio he an neih ve ko, ti si. Cu bantuk hriamnam phun cun an itawng hraw rih lo, ti khi si.
An itongh citcet, kan zoh sawh ti hna lai lo, tinak si dawh si.

Media pipi zong nihcun, an rak phai dih cangmi si tikah, Russia nih Chemical hriamnam phunphai a hman ahcun, Nitlak lei phu pawl kan in doh cang hna hih a ti duhnak si lai caah a hmang lai lo, an rak ti.

Biahlei sawh: Ukraine ahkhin Russia ralkap zeizat an va thih, an raltuknak vanlawng le tanks, hriamnam zeizat a va rawh, an va sungh zongah Ukraine caah cun teinak ding lam cu a tlawm. Putin nihcun a ralkap milu 50,000 nunnak a rak thaap tiah UK media nih an rak thanh bal. Credit: Salai C Alenxader

𝗨𝗸𝗿𝗮𝗶𝗻𝗲 𝗣𝗿𝗲𝘀𝗶𝗱𝗲𝗻𝘁 𝗭𝗲𝗹𝗲𝗻𝘀𝗸𝘆𝗷 𝗻𝗶𝗵 𝗜𝘀𝗿𝗮𝗲𝗹 𝗽𝗮𝗿𝗹𝗶𝗮𝗺𝗲𝗻𝘁 (𝗞𝗻𝗲𝘀𝘀𝗲𝘁) 𝘁𝗵𝗶𝗻 𝗮 𝗵𝘂𝗻𝘁𝗲𝗿 𝗻𝗴𝗮𝗶𝗻𝗴𝗮𝗶. A liancia ni 4/5 ah khan Israel nih Russia le Putin a hlawt sian lomi kong ka rak ttial, nan rel ahcun atu ka ttialmi na fiang chin la. Tutan cu Ukraine president cung ah an thinhunnak an langhtermi tete a si. Israel parliament nih Ukraine president Zelenskyj cu biachim ding in an sawm in online cun bia a van chim.

“February 24, 2022 ah Rasia nih Ukraine a luhhnawh. Cun February 24, 1920 ah Nazi nih party an rak dirh. Cu party nih Hitler kha 1933 ah uktu an rak siter khawh.” tiah a chim. Germany i Nazi pawl nih uknak an tlaih kum 12 chung ah Holocaust timi Jew miphun million paruk thahnawnnak a rak chuak le million pakhat hrawng hi Ukraine Jew an rak si.

Zelenskyj hi a nu le pa Jew an si ve, le ralpi pahnihnak ah khan a sahlawh tam ngai cu Nazi nih an rak thah hna. Jew a si caah Khrifa ram pawl nih an uar le an dirkamh khun. Culio ah Israel cozah nih Rasia mawhchiatnak le phihnak a tuah lo ruang ah thinhunnak a langhter pah ve biachim lio ah.

“Nazi nih khan kan nehngang hmanh um lo ding in hloh an rak kan duh. JEW kong biahalnak phisinnak “Final solution on Jews question” taktak a si an rak ti khah nan i cinken rih ko la ti a fiang ko. Asinain, Moscow in a rami bia hi nan hna nan tun awk a si ve, Nazi he ai lomi bia dakaw a si hih. Amahbelte tutan cu Ukraine kong a si.”

Mah ti a chimmi cu Parliament member pawl le cozah an thinphawh hna; Holocaust le atu Ukraine hna cu tahchun awk a tlak lo, cun zei bantuk he hmanh tahchun awk tha lomi a tahchun an ti. Cucu a tang ah Link in an chimmi Mirang rel kho nih relte. Israel cozah lawng si lo, party dang zong nih Holocaust le atu Ukraine hna tahchunh cu an duh bak lo.

Israel hi leicung ah hriamnam thabik a neimi ram tlawmte lakah ai tel. Vanlawng siseh rocket tlaitu Iron Dome zong a sertu a si. Ralkap thazang zong a thabak. NATO chungtel cu a si lo, le NATO nih Rasia he ral thawh sual lo ding ai ralrin caah Ukraine nih Van lei phih ding a halmi an bawmh khawh lomi cu Israel a hal.

“Mah hi zeidah a si? Zeidah nan ttih? Kap i thim loin kaphnih kar lamkal sawh maw? Ka biahalnak cu ka let tuah u. Ram hnih kar daihnak cu nan ser khawh lai nain a tha le a chia kar ah cun nan ser kho la lo,” a ti hna le bia hal rih hna. “Zeiruang ahdah nan sin in hriamnam kan lak khawh lo? Zeiruang ahdah Israel nih Rasia hi phihnak nan tuah ve lo?”

Israel nih Zelenskyj cu an thangthat ngai, tha an pek ngai, Ukraine mipi caah tampi an tuahmi a um ko. Nain zahan a bia i Holocaust kha an rem lo, cucu a theih tikah tu zing ah khan, Israel thangthatnak a van chim colh. 1990 hrawng ah khan Soviet Union (Rasia) Jew pawl Israel ah 1 million hrawng an rak i tthial le a tamdeuh cu atu Ukraine khin an si.

Cucaah Israel ah khin Ukraine le Rasia kong a thei ngaimi an tam. Atu Ukraine ah Jew 360 000 le 160 000 in 180 000 kar hi Rasia ah an um ve. Israel nih Rasia le Ukraine cu tonter le biaruahter ai zuam. Asinain Turkey tu a hlawhtlingdeuh tutiang cu. Ca sau hi rel kan huam cio lo, nain ca cu ca si ko. Credit: Hlawnching Bawimang Lian