Ruat cio hmanh uh.

Ruat cio hmanh uh.
=======
Chinmi, a bikin laimi hi mah zawn lawng aa ruatmi le Lutlai le hruaitu țuan a duh tukmi, mah fimthiamnak zong aa tuaktan pah lomi kan tamtuk caah lungrual timi cu a har ding hrim asi. Cu lawng hlah, mi palhnak le mi sualnak hmuh piak le kawl piak ah kan khul a rang bikmi miphun kansi.

Chimhrin le cawnpiak aduh lomi kansi fawn. Lutlai le hruaitu timi hi, mi zapi nih țuan thiam zong asi lo i, mi zapi nih țuan phung zong asi lo. Hi bantuk lungput kan ngeinak a ruang cu, tangdawr nun kan ngei khawh lo caah asi. Hi bantuk kan nunning le kan lungput hi kan biakmi, kan zumhmi kan i fianglo ca asi ko.

Kannih cu Khrihfa kansi ti cu awl ngai in kan chim fawn i khrih rian kan fiang fawn lo. Kik lo lum lo ka kaa chung in kan chak hna lai a timi cu laimi hi kansi. Lungrualnak cu kan chim cio i kan hngalh ko. Asi nain, kan lungput kan thleng duh lo i kanlung kan țhumh duh fawn lo.

Tutan zongah MAH nih Aana a ting i, kawlram chung miphun vial te lak ah hriamtlai phu tambik kan si cang. Phu tam a chuahnak cu ruat cio ko ulaw nan hngalh cio ko lai. Khua tuak huaha lomi nih cun,Kawl ralkap an doh paoh ah cun phu tam zong a poi lo nanti ko lai.

Mi cheu nih nan i thawh lai i, CNA kan pa le hna hmanh nih phu tam kansi zongah a poi lo ralhrang an doh dih ko anti nan ti lai. An hrut lo caah mah ti an chim kha a hau cang. An lung chung te cun an țap ko tihi theih a hau. Mi cheu nih nan i thawh lai i, CNA pei an sual tuk an țha lo tuk cu mah caah pei phu a tamnak asi cu nan ti lai.

Asi hrimhrim lo. Lu tlaih a duh tukmi le bawlung chuih ve țung loin a leng in a zoh i bawlung chuih tupa nathiamlo tuk tiin sik a hmang mi kan tamtuk. CNA nih pumpek in ram caah a țuannak le a temtuar nak bel kan chim duh lo.
Phaisa an hmang mi cazin tuah cu kan thiam tuk fawn.

Pumpak pakhat cio in an cawlcanghnak le an ei din vial te le a zun an ek tiang theih dih kan duh. minung ansi i an palh kho, an sual kho. Palhnak le sual nak i chimhrin le i maimilh piak kqn duh lo. Cu caah kan tuhmi kan zun i phu tampi ah kan i țhen dih. Ram caah rian a țuan mi a palh kho.

Chungkhar pakhat caah řian țuan hmanh palhnak a tam tuk tihi kan hngalh lo silo in kan lungput a chia tuk caah asi ko. Phu/ Bu a tamnak nih a chuahpi mi cu,lungrualnak nakin lungruallonak le i țhen nak a chuah pi peng ko lai.
Nu pahnih hrinmi fa chungkhar pakhat ah umți cu a fawilo. Credit: HC Bawi Dawt