Ruahchannak Um Ko

Ruahchannak Um Ko
===========
Feb. 1, 2021 ah Kawl Ralkap (KR) nih uknak cu meithal in an lak. Democracy, chawlehnak le tthanchonak ah tthawng le rianrang ngaimi in a kalmi “Myanmar” cu tapung, misual le terrorist nih an van uk tthan. Lamzawh le CDM kan tuah. Terrorist tuahsernak cu SoMe le news ah kan phawtzamh. Ngeihchun tangka CDM le harsa caah, kutsamhnak kan tuah. Midang le ramdang sinah kut kan dawk. CDM, CRPH le NUG dirkamhnak cu SoMe, news, lamzawhnak le cakuatnak tbk ah kan langhter. Pumpak, community, kohhran le dangdang tiah tangka kan sengson cio – tangka hi khua, pengtlang, miphun tiah thawhnak tam ngai. Miphun caah kan lungput uar um kho tuk.

Nizan lamzawhnak ah kan biachimtu nih “KR nih minung 900+ leng an thah cang hna i, 5000+ leng an tlaih in hrem hna” ti bak si. Cun, “kahnak, bomnak le tlaihnak hi a karh i, a zaammi an tam cang” tihi si. Sual lomi thah, hrem le tlaih hi KR tuahvo ngan bik a van si. Launak, harnak le mitthli he kan ram cu a mui dup ko. Chinram ah mino tampi an nunnak a liam cang. Chinram hi thisen in kan ven ahcun, thisen lila in tuanbia thar kan ttial hau. Nunnak le thisen thaphnawhmi thil hi – a sawhsawh si hrim lo. Tutan ah tei tiang kan doh hna locun, kan thisen, kan chawva le kan lamzawh vialte hi pakpalawng an si dih kho. Cihmih an kan tiimtu KR hi teinak in tutan cu doh le dawi an hau.

Nizan lamzawh chung cu khua tampi ka ruat. Mino nih an thisen le nunnak in KR an dohnak kong, KR nih nu an tlaihhremnak kong, KR nih hngakchia an thahnak kong, KR nih sual lomi tlaihnak, vuaknak le hremnak kong, KR nih tthenttheknak policy in miphun cihmih an kan timhnak kong tbk hi ka ruat i, ka hnarnoruh a ka ttam zuahmah ko. A ruang tampi ruangah nizan lamzawh cu voidang bang kan tam lo. Tawlreltu nih “minung 100 leng kan si lai” an ti. Nain, nizan lamzawhnak ah hngakchia tampi ka hmuh hna. An celmen, an catar le an angki tbk kan zoh hna – duh an nung tuk. Suimilam pahnih chung KR dohnak ah an dir ve ko. An tthirual pei KR nih Myanmar ahcun, an velh in thah hna timi ka mitthlam ka cuanter khin – ka celh ve lo. Credit: Van Nun Lian