Saw Peng Kahdohnak Ah PDF 5 An Nunnak A Liam!
=========
Magway ramṭhen, Saw peng, Yinke khua pawng ah PDF ṭangṭi phufonh le SAC ralhrang karlak ah kahdohnak faak ngai a chuak i PDF ralkap 5 an nunnak a liam, tiah Saw peng PDF in ṭuanvo ngeitu pakhat nih a chim.
Saw peng in Chin ramkulh, Kanpetlet peng, Kyin-dway khuapi lei ah a kalmi SAC ralhrang pawl cu July 14 zing ah PDF ṭangṭi phufonh nih an kah hna caah Yinke khua cu SAC ralhrang nih an khanghpiak hna. Cu hnu July 15 ah kaphnih kar kahdohnak a chuak ṭhan i SAC ralhrang nih cunglei in a kah bawmh hna, tiah an chim.
“Yinke khua pawng kahdohnak ah PDF pasalṭha 5 an nunnak a liam i hriamnam pawl zong SAC ralhrang nih an laak chih. Vanlawng in voi 2 tiang a kan kah nain nunnak liammi hna hi cunglei kahnak ruang ahcun an si lo. An ṭaang ah kuanhma pawl zong hmuh an si, SAC ralhrang lei thimi le hliam pumi an um ve lai zumh a si” tiah tualchung PDF in ṭuanvo ngeitu pakhat nih a chim.
Kanpetlet peng, Kyindway khuapi lei ah a kalmi SAC ralhrang pawl hi PDF ṭangṭi phufonh nih an kahdoh hna caah meng 30 tluk lawng aa hlatnak khua cu ni 3 a rau cang nain an phan kho rih lo. Kahdohnak a fah deuh paoh ah cunglei in an kah bawmh hna, kanmah lei nihcun cunglei kahdohnak lawng kan thin phanmi a si, a pawngkam khua hna cu khua chuahtak in ral an hrial hna, tiah a cunglei upa nih a chim chih.
Thlahnih Chung Naypyidaw Siizung Ah SAC Ralhrang Kut Le Ke Bul Mi 200 Leng An I Thlop. Ralhrang lutlai umhmun khuarnak Naypyidaw khua ralhrang siizung a si mi ihkhun 1000 siizung pakhat ah thlahnih chung ah SAC ralhrang kut le ke bul in aa thlop mi 200 leng an um tiah ralhrang lei neihniam hna nih an chim.
Mah hna pawl cu a bik in Shan le Karen ramkulh kahdohnak ah a kal mi deuh an si hna i Mipi ralkap Drone bom nih a hliamh mi hna deuh an si fawn. “Ralhrang kut le ke bul mi hna caah bawmhnak an pek mi hna zong an cunglei bawi deuh nih a thli in an rak ei hna” tiah neihniam hna nih cun an chim.
“Ralhrang sakhan kan tukdoh hna ah hin kan mah lei kan thawnnak bik hi Drone lei in a si. Kan chanbau nak tete zong mah nak tha deuh le thawng deuh in kan i zuam rih lai. A bik in tangka lei ah kan chanbau deuh. Cuzong cu mipi thazaang thiam in kan tlamtling ko lai”tiah PDF tuanvo ngeitu pakhat nih a chim.
Caan Karlak Uknak Thla 6 Chung Kan Pehsoh Rih Lai Tiah Min Aung Hlaing Nih A Chim Than. Hramhram in mipi uknak a la tu Min Aung Hlaing nih caan karlak Myanmar ram ukhruainak cu thla 6 chung a caan kan pehsoh than lai tiah a chim than.
July 13 Naypyidaw ah tuah mi SAC cozah lutlai tonpumhnak chung ah rampi humhimnak kong a daih rih lo ca, mah pin ah tuahtuan ding rian a um rih caah le 2023 July ni 11 tiangah puahkehnak voi 489 a cang mi chung ah minung 782 an thih nak kong Min Aung Hlaing nih hi tonpumhnak ah a chim.
Sagaing ramthen, Chin le Karen ramkulh chung cu kahdohnak a fah bik nak hmun an si i humhimnak kong zongah mah nak in thazaang chuah a herh deuh tiah a chimchap. Min Aung Hlaing cu 2021 Febuary 1 uknak lak hnu in thla 6 dan lengmang in caan karlak uknak a chap lengmang caah 2023 July 31 in hramhram in uknak a lak kum 2 le cheu nak a si cang lai tiah kan theih.
Rungtlang SAC Ralkap Pakhat CDF-Hakha Sin Ah Meithal He Aa Fonh;Lawmman Sing 50 An Pek. Hakha khua hrambunh Rungtlang SAC ralhrang Battalion 266 in pakhat cu uknak tha lo tang riantuan duh lo le mipi donthlennak ah kaa tel ve lai tiin meithal he CDF-Hakha sin ah aa fonh.
2023 July 17 ah aa fonh hi a si. Mah pin ah MA-1 zun khat, Magazine – 4 le Meithal kuan 126 zong a rak i chuah pi chih. “Hi bantukin CDF- Hakha sinah CDM in dohthlennak a tuahmi cu lunglawm tein kan cohlan i phaisa sing 50 kan pek lengah a humhimnak hmun a phak tiang ṭuanvo kan lak” tiah CDF-Hakha July 17 ah thanhca an chuah.
SAC ralkap rianṭuannak doh in, mipi dohthlennak (Pau dohthlennak) ah CDM in tel a duh mi paoh cu, CDF-Hakha sinah pehtlai khawh peng kan si, a humhim nak nan phak tiang ṭuanvo kan i lak hna lai tiah an langh ter chih.
Mizoram Ah Chin Nu Pakhat Le Mizo Pa Pahnih Sinin Rithaisii Tampi An Tlaih Hna. Mizoram Champhai District chungah July 15 zing suimilam 11 tluk ah Zokhuathar in Aizawl lei ah a kal mi khualtlawng motor pakhat chung ah Chin nu pakhat le Mizo ram mi pa pahnih sin in rithaisii tampi an tlaih hna tiah Mizoram palik nih an langh ter.
Champhai palik nih check gate pakhat ah motor an check hna tik ah Tamu peng Kanaan khua mi Pi Van Neih Kim (kum 30) sin ah Bing rang 1.329 kg, Aizawl khua um John Vanlalruata (kum 19) sin in Bing rang 22 gram le Aizawl khua um Jonathan Biakthanpui (kum 20) Bing rang 22 gram tiin an tlaih hna hi a si. Credit: Lungmili Media