Rezua Palek Sakhan in palek pahnih CDF-Zotung sin ah an i fon!

Rezua Palek Sakhan in palek pahnih CDF-Zotung sin ah an i fon
==========
Chin Ramkulh, Zotung ram, Rezua Palek Sakhan ah palek a tuan lio mi Senthum rank pakhat le Senkhat rank pakhat cu CDF-Zotung sin ah i fon in CDM an tuah tiah CDF-Zotung nih nihin ah an thanh.

Hramhram uktu dohthlennak le a dik fel mi federal democracy ram sernak ah rammi sin a rak i fon mi hna cu CDF-Zotung nih lunglawm tein kan in don hna, rammi sin i fonh awk ah harnak nan ton ahcun himnak hmun nan phanh tiang kan in bawmh hna lai ti zong an langhter.

Thantlang khuapi chung pehzulh in inn a kaang rih. Hramhram in uknak chuttu le aa hruhpi tu Min Aung Hlaing ralkap kut in inn 200 hrawng a kangh cang nak Thantlang khuapi chung cu 2021 November 9 zaan ah an khangh than i atu suimilaam 11:00PM tiang pehzulh in a kaang rih tiah kan theih.

Hi kong he pehtlai in, “Suimilaam 9:00PM tiang ahkhan inn 4 a kaang cang. Atu zong hi pehzulh in a kaang cuahmah ko. Inn zat setdah a kaang cu kan thei ve rih lo,” tiah min langhter duh lo pakhat nih a chim.

Thantlang khuapi chung hi khuami nih an zaam tak hlan ah inn 20 a kaang. Khuami nih an zaam tak hnu ah voi thum an khangh. A voi khatnak an khangh ah inn 164, a voi hnihnak ah inn 8 le atu hi a si. Tuzaan an khangh hi inn zat set dah a kaang theih a si rih lo.

Mindat Peng ni hnih chung kahdohnak ah Council ralkap 28 an thi. Chin Ramkulh thlanglei laitlang Mindat peng ah ni hnih chung mizapi ralkap CDF le bawi aa cuhmi Min Aung Hlaing ralkap hna karlak ah kahdohnak a chuak i MAH ralkap minung 28 an thi tiah kan theih.

Min langhter duh lo pakhat nih, “Ni hnih chung pehtlai in kahdohnak a chuak. Tutan kan kah hna i lamkam ah bawh in naih ngai in kan kah hna. A nikhatnak ah council ralkap pariat an thi. Nihin November 7 kahnak ah 20 an thi,” tiah thawng a theitu pakhat nih a chim.

November 6 le 7 kahdohnak ah Mindat CDF lei in pakhat a nunnak a liam i minung pakhat hliam a tuar. Cun, council ralkap lei zong in minung tampi thi deengmang in hliam an tuar. Cun, Council ralkap nih an kalnak i an hmuh Sia, Caw, Ar le vok zong an duh poh in an thah tiah kan theih.

Dalaan ruang ah Hakha Haithlan ah Kawl ralkap nih bomb le meithal puah, khuami 2 tlaih, inn pakhat bauh. Nihin November 7 zaanlei, Dalaan nih phuan ruang ah Kawl ralkap pawl Hakha Haithlan ah an kal i meithal le bomb an puah, khuami 2 zong an tlaih hna, tiah kan theih.

“Hi thil a can hi 2:40 PM in 4:00 PM tiang hrawng a si i meithal cu zuun tamlak an puah. Bomb voi khat an puah fawn. Khuami pahnih an tlaih hna. Cun, Tin Tin pa (Thlang um Sang) inn zong an bauh i thilri an laak. Hihi Dalaan nih Haithlan ah ral an um tiin a chimh ruang ah a si,” tiah khuami pakhat nih The Hakha Times ah a chim. Nihin ah Kawl ralkap nih an tlaih i an kalpi mi hna hi aho an si hngalh a si rih lo.

Kyunhla peng ralhraang le PDF kar kahdohnak a chuak i ralhraang 25 hrawng a thi mi le hliam tuar an um. Sagaing ramthen Kyunhla peng Ayechianthar khua ah November 6 zing suimilaam 9:00 hrawng ah hmunhma thianh ah a vaak mi ralhraang thazaang 200 hrawng le Kyunhla PDF kar kahdohnak a chuak tiah kan theih.

Kyunhla PDF nawlngeitu pakhat nih “Kaphnih kar kahdohnak voi hnih a chuak i ralhraang 25 hrawng an thi lai, kanmah lei in pakhat le khuami pakhat hliamtuar an um. Ayechianthar khua Nitlak lei cu ralhraang nih an khangh caah mizapi kilvengtu phu nih khuami cu kan chanhchuah hna” tiah a chim.

Ralhraang nih Ayechianthar khua cu hriamngan in an kah caah inn hnih a kaang. A voi khatnak kan i kahnak hi Innhla le Ayechianthar khua kar ah a si i ralhraang 20 hrawng a thi mi le hliamh mi an um tiah chim. Ayechianthar le Leiksintaung khua kar ah a voi hnihnak kahdohnak a chuak than i ralhraang 6 hrawng hliam tuar an um than tiah Kyunhla PDF nih an thanh.

Ralhraang nih khua chung ah hriamngan an kah caah khuami cu an zaam hna tiah tualchung mi pakhat nih a chim. Khua phungki sianginn i a taang mi nu hna cu an tulkvelh hna i an checkhlat hna. Khua phungki lutlai i phone le ralzaam hna phone an chuh dih hna tiah a chim.