Rev. Dr. Thlaawr Bawihrin; Mizoram cozah le mipi sinah lawmhnak:

Mizoram cozah le mipi sinah lawmhnak:
==========
Ralhrang ruangah Mizoram ah a zammi kan unau hna a zohkhenhtu le him tein a chiatu Mizoram cozah sinah lawmhnak a thar in CBCUSA min in chim than ka duh. LADC le MADC ram ah a ummi hna zong anmah le district cio in an zohkhenh ning hna, LADC CEM V Zirsanga, MADC CEM N Zakhai le an tuanti hawi cungah lawmhnak chim ka duh ko.

Theihtop chuah in an zohkhenh hna, umnak inn an sak piak hna, ti le mei an tuah piak hna, a herhmi poah CYMA le CYLA, MTP he rian an tuanti. Upatnak ka pek hna. Kan unau an si, kan eimi an ei ve lai, kan umnak ah an um ve lai, tiah unau chuahkhat thinglung an ngeihnak kan theih tikah lung a hmui hringhran ko.

Hnahthial District nawlngeitu upa hna he kan i ton tikah a tlizammi hna cungah zawnruahnak an ngeih ning, district upa hruainak in inn an sak piak hna, nunnak caah a herhmi an bawmh hna. Bawipa nih Mizoram cozah le mizapi thluachuah pe chin hna seh.

Biahalmi lehnak: India ah a ummi ralzam hna ram thumnak kalnak caah an ra, tiah biahalnak a um ngai. Ram thumnak kalnak tuaktan dingah kan ra lo. India ah a um ciami UNHRC card aa tlai cangmi hna caah ram thum nak ram ah kal khawhnak caah a rami kan si lo.

CBCUSA nih cun Mizoram ah a tlizammi kan miphun hna, kan ram ah kir than in IDP camp ah um hi thazang pekmi asi. Kan ram zamtak loin ramchungah himnak khuar in IDP a zohkhenhtu NGO hna he riantuanti hi thlacamnak asi. Bawipa nih Chinram le Chin miphun himnak pe hram seh. Bawipa cu kan himnak le kan teinak asi.

Mizoram cozah le mizapi sinah lawmhnak; Kawlram buai ruangah Mizoram ah a tlizammi hna a lam kip in a rak bawmhtu Mizoram Chief Minister le Mizoram mizapi sinah lawmhnak chim le ralzam hna thlacam piak dingah Chin miphun aiawh in CBCUSA nih Mizoram ah a kan thlah. November 28 ni ah upat tihzahmi Pu Zoramthanga he tonnak kan ngei.

Kawlram kong chim thiam asi lo caah, ralzam le, Chinram IDP caah nan thinlung, nan inn le nan vawlei nan kan on piak, kannih cu duh thim ruangah unau siloin, thisakhat, holh le nunphung khat kan si, A then thiam ding kan si lo caah kan intuarnak in piak ve dingah le India nih a foreign policy hi review a tuah khawh nak lam kawl piak dingah nan sin kan rat nak asi, ti hi CBCUSA nih kan chim.

A kan lehmi cu unau chuahkhat kan si caah ramri nih a kan then kho lo, nan harnak le nan tonmi vialte Mizoram mipui dihlak nih kan tuar ve, ka ti khawh tawk in bawmhnak lam ka kawl lai, Central Cozah sinah bawmhnak ka hal nain a tu tiang thawng kan theih rih lo.

A poi lo, central budget kan hmuh rih lo zongah Mizoram budget in bawmhnak lam ka kawl thiamthiam lai, hmaikum ahcun ei le din, sii le ai zong Chin IDP caah kaa zuam lai, India cozah zong Burma kongah a foreign policy review tuah dingah ka nor lai, USA ram in kan sinah lawmhnak chim ah nan rat cu kaa lawm tuk ve. Bawipa nih a kan umpi lai, tiin kan i then. Pu Zoramthanga dam law, na nun khua sau ko seh. Mizoram minung dihlak upatnak kan in pek hna. Credit: Rev. Dr. Thlaawr Bawihrin