Rev. Dr. Rualuk: Khrihfabuu Phaisa CNF/A Bawmhnak Ah Kan Hmanmi Cu Za Ah Za Bak A Palh Taktak Mi A Si

Rev. Dr. Rualuk: Khrihfabuu Phaisa In CNF/A Bawmhnak Ah Kan Hmanmi Cu Za Ah Za Bak A Palh Taktak Mi A Si
===============
Rev. Dr. Rualuk nih Messenger in mipi nih biahalnak an tuahnak kongah letnak a tuah hna nak kong a chimmi cu ruah phu ngaingai a si. Ramthumnak a ummi pawl nih Khrihfabu tangka in Chin National Front/Army (CNF/A) bawmhnak an pek mi hi na hna a tlak maw? tiah an ka hal. Khrihfabu tangka in CNF/A bawmhnak pekmi cu za ah za bak in a palh mi a si. Khrihfabu phaisa hi hmuh khawhmi ramkhel ah hmang pung a si hrimhrim lo. Cu ti ka ti tikah CNF/A hna hi an thatlo tuah ding a si lo, ka ti hna nak a si lo. Pumpak tu in bawmh khawh le a si lo ah Organization pakhat min in bawmhnak tuah ding an si.

Vawlei le Organization pakhat min in CNF/A hi kan bawmh bak ding zong a si i, moral support zong kan tuah bak ding a si. Kei zong phaisa an rak ka khawlh a si ahcun ka ngeih tawk cu ka pek bak lai. Zei caah, taksa vawlei ah ka um rih. Kan umnak Lairam caah rian a tuanmi cu ka bawmh lai. Cun, ka rian zong a si. punpak cio kan rian zong a si. Asinain, Khrihfabuu phaisa timi Kha bantuk lei kalter timi hi palh taktak a si. Palh sawhsawh zong a si lo. Palh taktak a si. Zeicaah, Jesuh vailam ah an tah lai ni ah khan Pontius Pilate’s nih Jesuh sinah bia a halmi cu Siangpahrang na si maw? a ti. Aw ka si, asinain aw, kei ka pennak cu hi vawleicung thil ah hin a si lo ee. Ka pennak hi hi vawlei thil siseh law, Nan sin zongah ka phak lai lo. Judah mi hruaitu sin zong ka phan manh lai lo, ka kut tang ummi hruaitu zong nih an doh ve ko hna lai, tiah a let.

Cucaah, Khrihfabu timi hi vawleicung mit hmuh khawhmi pennak caah a dirhmi a si lo. Cucaah, kan phaisa hrimhrim hi vawleicung mithmuh le kut tawnghmi pennak hi ramkhel nak ah hmang ding hi a si in a si hrimhrim lo. Keicu ca ka tialnak zongah feltein ka tial. Hi bantuk in hmang a duhmi pawl hi an khrihfabu hruaitu zong Pathian biatak ah a nun a pem lomi thiangthlarau ah hrinthan lomi hna an si. Tuchan holh in kan chimh ahcun Liberal pawl an si ko. Mah kha Liberal pawl lawnglawng an si lai.

Pathian biatak ah thiangthlarau in a hrinthan mi nih cun kha bantuk lei kha zeitik hmanh ah kan kal pi ding a si lo. Kan rian zong a si lo, zei caah, kan nih cun zungzal ram mit in hmuh khawh lomi ram kha Pathian nih kan sin ah dirh a timhmi a si. Kha ram caah a tuan mi kan si. Kan Phaisa vialte zong kha ram caah Pathian nih a kan pekmi a si. Cu ka ah Khrihfabu phaisa cu kan hmang lai. Asinain, CNF/A caah kan tuan hrimhrim lai lo tinak a si lo, pumpak in kan tuan lai. Kan bawmh khawh tawk kan bawmh lai. Buu pakhat khat min zong in kan tuan lai. Asinain, cu tin si loin Khrihfabu phaisa hna kha bantuk in kan hmang timi cu za ah za bak in a palh taktak mi a si. Hi ti ningin kan kal lengmang ahcun Pathian lung zong kan fakter ngaingai lai ti hi kei ka hmuh. khuaawng zong kan tong bak lai lo, ti khi ka hmuhmi a si.

Note: Thawngtha Production nih Biaruahnak an tuahnak ah a chimhmi a si i, ngai na duh ahcun minutes 50 – 58 karlak ah a chimhmi a si. Thawngtha Production sinah Video in ngai khawh zong a si.