Rev. Chan Thang cu Rev. Sang Fen thawngtha chimnak in Lungler khua ah Pathian Dawtnak a thei

Rev. Chan Thang Nun in Lungchuak bia:
========
Nihin cu Rev. Nawl Ling he caan saupi bia kan i ruah. Rev. Chan Thang (Dr. Thawngling Mualhlun) pa kong a ka chimh.
Rev. Chan Thang cu Rev. Sang Fen thawngtha chimnak in Lungler khua ah Pathian Dawtnak a thei. Pathian dawtnak a theihmi aa thutpi khawh lo caah Thangzang Khua ah Thawngtha chim ah (Missionary bantuk in) aa thial.

Khuahrum biak chan asi caah an rak cohlang lo nain Inn chiate aa sak i khua asa. Hlanchan Thangzang Khua nupa nih cun, Chan Thang te pawl chimmi cu – “Sumkhal a hnah a cawrh i, Cangai nih lupawng aa pawnh lo ahcun kan zum bal lai lo,” an rak ti.

Culak ah pakhat pa a piangthar. Voikhat cu Khrihfa thar pa cu a dam lo. Chungkhat nih Khuachia pawn piak an duh nain mizaw pa cu Khrihfa asi cang caah, ka Unau pa Chan Thang nih thla ka camh seh law ka dam ko lai a ti hna i khuachia pawnh cu a duh lo.

Rev. Chan Thang cu an va auh. Inn tual a rung luh ah, mi damlo pa a nu nih cu Chan Thang hung lut tuah na lu hi Hreitlung in in ceek tuah ning tiah inn leng in a rak don. Rev. Chan Thang nih cun mizaw pa a nu cu a tih pah tung i, lam hlaat nawn khin, “Bawipa nangmah an in cohlan khawh nakhnga caah hi pa hi damter ko,” tiah tawi tein thla a cam i a dam. Mizawpa Nu tihpah he mit hmanh chin ngam set lo in tawite a cam!

Siangbawipa nih Rev. Chan Than cu Hakha ah Bible a cawnpiak hnu ah Tlang Khua ah Thawngtha chim ding in a chiah. Tlangkhua zong nih cun hlanlio chan uknak hawih cun Lopil an tlak tikah Rev. Chan Thang cu lo hamnak nawl a rak ngei lo.

Kumkhat cu Lopil an tlak i khuabawi nih camcawhfung (me) zuk dingin an khan. Rev. Chan Thang nih cun ka zuk kho ve maw a ti hna. Khuabawi pa nih tutan cu zuk ve ko tiah a ti. Zan ah thlacam nanh tein thaizing ah me cu a va zuk i lo tha taktak a ting. Cu kum ah cun facang Tang 500 a ngeih.

A lo vawlei cu a that tuk caah lo cil in a tuan than. Tlangkhua nih cun locil tuan cu Rit/Vate nih an ei dih lai tiah an thloh nain Rev. Chan Thang nih cun a duh lo i a tuan. Khuami chimning te cun Rit cu a hung hrang tuk i Rev. Chan Thang zongnih cun an ei dih te ko lai tiah a ruah caah an nu he rit cu an dawn tawn.

Zarhpi zing voikhat cu thawngtha chim a hauh caah Lo cu kaltak a hau. Nikhat hngah lo ahcun rit nih a facang ei dih ding cu a fiang ngaingai. Sinain Rev. Chan Thang cu Pathian sin ah thla a cam. Bawipa ka lo a ei dingmi rit vialte hi rak ka zohkhenh piak ko hna tiah a ti hnu ah hnangam tein a tlung. Khua mi nih cun Pastor pa na lo cu kal duh ti hlah, Rit nih an rak ei dih cang ko lai tiah an ti. Amah Rev. Chan Thang zong nih cun singai tak ko tiah a ruah.

Nikhat ni ah lo a va veh cu rit pakhat hmanh an rak um lo. Zeikodah a cang tiah khua a vun zoh cu, Lo laifang ah thingkung sang pi hau lo in a teng an rak thlamhmi a um i cu cungah cun MUPI ngan taktak a rak fu. Zuang lo in a thut peng caah zei vate hmanh nih lo cu an rak naih ngam lo. Mupi nih a lo rit cu a rak donh piak! Cu kum cu facang tang 200 fai a ngei than.

Rev. Chan Thang cu Hakha Pastor Van Hre a nau pa nih Thiangthunh dawh taktak khi a serpiak. A lu ah Mupi a cuan ter i, a cungah Mupi nih Rit a donhpiak kum te cu a tial i cu thiangthunh he cun a tlungkal tawn. Thangzang khua Jubilee ah Rev. Chan Thang cu an sawm. A Mupi thiangthunh te he cun a hung phan. Amah biachim can a hung phak tikah, “Thangzang khuami hna, Sum nih a hnah a corh cang i, Cangai nih lupawng aa pawnh cang” tiah Bawipa thangthatnak bia a chim.

Rev. Chan Thang nunnak in ka lung ah a chuakmi cu: 1. Matthai 28:19-20 “The Great Commission” – Jesuh nih Biakam thar ah rian a kan fialmi pakhat te lawng a um tiah tiang an ti phahmi; Khuazakip ah kal in Zultu ser u,” timi Riansung hi ho nih fial lo zongah Jesuh a dawtu taktak hna nih cun an nunnak ah biapi bik rianah an rak chiah i an rak i nunpi nak kha a lang.

2. Bible lei cawnnak le fimthiamnak ah cawnnak sang ngeih lo zongah Pathian a daw tu hna riantuan nak cu, Pathian nih thlua a chuah i sunparnak caah ngan taktak in a hman ko hna ti a lang. 3. Thawngtha hi mi nih an co hlan lo zongah Pathian bochan buin a mah nawlngaihnak he, tuah u a timi, “Miphun kip sinah thawngtha chim le Zultu sernak rian hi” zumhtlak tein tuan ko ahcun mah santlaih ruang ah siloin Pathian nawlngaihnak nih a chuahpi mi theipar: Thlarau faphal tampi he kir a si ko ti a lang.

4. A pianthar sinin Bawipa caah a nunnak dihlak a thawnnak dihlak a thazang dihlak in aa pe mi Rev. Chan Thang nun ah Nawlbia Ngan (The Great Commandment)- Thinlung dihlak, ruahnak dihlak, Nunnak dihlak, thawnnak dihlak in Pathian dawt; Innpa kha mah dawt bantuk tein dawt ding timi Jesuh pekmi Nawlbia a ngaih/zulhnak Nun nih Khuaruahhar tuahkho tu Pathian thawnnak hmual a cawlter i sunparnak caah lohma a lim ti a lang.

Nun Cawn tlak: Rev. Chan Thang Nunnak chungin cawn phu mi sining cu: Jesuh fialmi riantuan hi Zumtu le Khrihfabu i a nunchan a si. Piangthar/Khrihfa poahpoah nih Thlarau tlau kawlnak riantuan ding tuanvo kan ngei. Kei cu ka thiam lo, fimnak ka ngei lo tiah biasi phai in thlarau tlau siaherhnak ngei lo le Bawipa caah nung bak lo in mah pawcawm nak ca lawngah khuaruah le Mah Khrihfabu in le lo kong lawng ruat in Thlarau tlau kawlnak riantuan nak caah zeihmanh siang lo in kan um theu tawnmi hi sersiam le remh can a phan.

Kan Pu Rev. Chan Thang nih Thawngtha a aupi tikah, vawlei fimthiamnak sang a ngeih i a tlam a tlin caah le ngeihchiah chawva tampi a ngeih i, a fimbik a si ruang ah le Tlamtling mi nun a ngeih ruangah si lo in Bawipa fialmi rian kha zumhtlak tein a tuannak nih Pathian thawnnak a cawl ter i teinak a hmu. Bawipa nih sunparnak a co.
Hlan lio kan pupa hna zumhnak le nunning hi tuchan Laimi Khrihfabu le zumtu hna nih kan fuh than a herhmi Bible cawnpiak mi nunning asi.

Note: Tuanbia ruah in i ruah mi chungin lungchuak bia le i chingchiah zat in ka hun tial mi asi caah tlamtlin lo nak a um lai. A ruahzia ka thiam piak te u. Thawngtha karhnak caah nunnak a hman ning ka ruah ah pumpak nun a hnurmi ka hun in hrawmh ve hna bia tu asi. Credit: Zathawngcin Siakhel