Ram le miphun caah tiin CDF mara pakhat nih anunnak apek

CDF Mara Commando Pakhat Nih Amiphun Caah Anunnak Apek
========
Ram le miphun caah tiin CDF mara commander pakhat nih anunnak apek. Upat tlak pasak asinak alanghter lengah chanchung philh khawh tilomi tuanbia dawh a ttial zong asi. Upat nak sangpi kan inpek.

CNDF nih Special Commando training kharnak an tuah. CNDF Special Commando Training (1/2021) cu tlamtling in an lim ca ah, nihin December 3 ah Closing Ceremony tluangten kan tuah tiah CNDF nih an thanh. NUG Cozah, Runvennak Minister U Yee Mon zong nih lawmhpinak ca a tanglei bantuk in a kuat hna tiah kan theih.

CDF-Kanpetlet nih Sianginn ah umhmun a khuar mi ralhraang an kah hna; Ralhraang pahnih an thi i pakhat hma faakpi a pu. Chin Ramkulh, Kanpetlet khua taang hra sianginn ah umhmun a khuar mi Council ralhraang hna cu CDF-Kanpetlet nih nihin chun hnu suimilaam 1:00 in 2:00 tiang an kah hna.

Ralhraang pahnih an thi i pakhat hma faakpi a pu. CDF lei cu hmapu um lo tein an kir kho tiah CDF-Kanpetlet nih an thanh.

Hakha Peng ah CDF-Hakha Dah Lo Hriamtlaiphu Um Khawh A Si Lonak le Senthang CDF Kong Statement. CDF-Hakha cu ralhrang uknak in kan miphun le ram a luat khawh nakhnga caah Hakha peng dihlak caah tuahmi a si. Asinain Battalion 2 hruaitu hna nih 2021 September 23 ni thok in Senthang CDF kan dirh cang tiah Battalion 2 cu a min an thlen i anmah duh paoh in kal an i tim.

Battalion 2 ah um a duhmi le Senthang CDF in um a duhmi karlak ah CDF-Hakha nih nemnak tein tawlrel a si. Cucaah 2021 October 19-20 ah hruaitu tonnak kan tuah i General meeting i au sehlaw an biachahnak kan zulh lai, tiah ceihhmai le lungtlinnak kan ngei.

Cuticun 2021 October 26 ah General meeting cu auh a si i meeting kai ding sawmmi chungin 84.4% an kai. An dihlak lungtling consensus in CDF-Hakha Battalion 2 (Senthang) tiin kan um lai i CDF-Hakha ah kan um ko lai, tiah biachahnak tuah a si. Cu hnuah 2021 November 13-14 tonnak ah CDF-Hakha nih Hakha peng ah hriamtlaiphu dang ser, um le cawlcangh khawh a si lo, tiah dihlak lungtling consensus in policy a fehter than.

Cucaah a tanglei bantukin mizapi sinah thawngthanhnak kan in tuah hna: 1. Hakha peng ah CNF/A le CDF-Hakha dah ti lo hriamtlaiphu ser, um le cawlcangh khawh a si lo, 2. Cun anmah General meeting lungtlinnak bantuk in Senthang CDF cu a um ti lo.

Cu policy le General meeting biachahnak a zul lomi cu dothlennak, mizapi le CDF-Hakha i kan sizungyi le kan i thithruainak a hrawktu le mizapi ca zong ah tih a nungmi an si caah policy ning tein action lak ding a si.

Cu bantukin nawl a ngai lomi hna an um ahcun CDF-Hakha theihpinak tel loin ahohmanh nih pehtlaih, cohlan le riantuan tinak ti bantuk nan ngeih nakhgna lo thawng kan in thanh fawn hna. ​​​​​​​Chinland Defense Force – Hakha. Source: Chinland Defense Force-Hakha

TUARNÂK PHÊN I THLUACHUAHNÂK! Uk 66 a simi kan Baibal ah uk 18 nâk ah chiah a simi Job cauk ah kan hmuhmi Biatak cu TUARNÂK PHÊN I THLUACHUAHNÂK a si. Ruah awk ah ai tlak tak takmi cu Job temtuarnâk vialte kha zeiruang set ah dah a si ti kha amah Job siseh, a nupi siseh, a hawile siseh an hngalh lomi kha a si.

Zeicatiah kha kha thuh a si. Amah he ai naih bikmi an nu nih an pa tuarnâk kha Pathian dântatnâk ah a ruah i Pathian kha chiatserh law thi ko tiah a ti.

Job hawi le pathum hna zong nih na temtuarnâk vialte hi na sual man dântatnâk na hmuhmi a si tiah an ti dih.
Job nih ka sual ruangah ka tonmi dântatnak a si hrim hrim lo tiah a ti hna i asinain zeiruang set ah dah kha tluk zatlak puicimhnâk le a pum cung tiang ah kha tluk fahnâk kha a tuar timi kha a hngal lo.

Cucaah Pathian nih bia a ruah lio ah Job chimmi cu ‘Ahodah hngalhnâk tel loin remruatnâk a thuptu hi’ tiah a ti.
Fapa 7 le fanu pathum nih an thihtâk i a ngeihmi țilva vialte le inn le lo, a hnu bik ah a ngandamnâk tiangin a sunghnâk kha zeiruang set ah dah a si ti kha amah siseh, a nupi siseh a hawile nih siseh an hngal lo i sonhmi le puhmi a phun phun in an puh i an sonh.

Nihin kan ram ah minung thong reng lo an thih i thong tampi thong ah thlak an si i inn le lo chawva tampi kan sungh i a hleikhun in Thantlang inn le thilri kanghutnâk zong ah zeiruang zet ahdah hi thil hna hi kan ton timi kongah puhmi le sonhmi a phun phun fb ah tam nawn kan hmuh cang.

Job zatlak puicimhnâk le temtuarnâk ah khan ai thupmi remruatnâk a um i cucu amah Job le a nupi le a hawile zong nih an hngal lo. Cubangin nihin kan zatlak le puicimh le temtuarnâk ah hin kan hngalh khawh rih lomi remruatnâk TUARNÂK PHÊN I THLUACHUAHNÂK hi hmuh le hngalh a har tuk ko rua.

Job tuarnâk a ruang bik kha PATHIAN HNATLAKPINAK IN SEHTAN CAWLCANGHNÂK a si. Zeicatiah Pathian nih Sehtan kha nawl a pek i Job fanu fapa le ngeihchiah vialte hlei ah Job ngandamnâk tiang hrawk dingin a thlahmi a si a nunak bel zuah dingin.

Zeicatiah Pathian nih amah zûmtu hna hi TUATNÂK PHÊN I THLUACHUAHNÂK kha coter a kan duh Cucu Job nih a hun hngalh tikah a hngalh lo ruang ah a chimmi bia vialte kha ai ngaihchih i leidip ah țhu in ai ngaihchih tik ah a sunghmi nâk in a tam deuh i a țha deuhmi TUARNÂK PHÊN I THLUACHUAHNÂK kha a hmuh țhân tiah Job cauk hi a tlâng komh a si.

Nihin i kan ton cuahmah mi thih le lohnâk. zatlak puicimh le kangh le ût nâk zong hi Pathian hnatlakpinâk in Sehtan cawlcanghnâk ah ruat kho in kan lung țhum hna u sih law Job bangin a donghnâk ah cun kan sunghmi nak in a tam deuh mi le a țha deuhmi TUARNÂK PHÊN I THLUACHUAHNÂK in a tlâng kan komh khawh ve dah kaw.

Zeicatiah zûmtu Pathian fa le kan cungah hin thlarau lei kan Pa, zeizong vialte a tuah kho i zeizong vialte a hngal i zeizong vialte ah a um kho mi Jehovah Pathian hngalhpinak tel loin asiloah siannak tel loin zei thil hmanh a tlung lai lo ti hi Baibal cawnpiaknak chungmuru phun khat a si. Credit: Evan Rualuk