Ralkap le Palek nih rubber bullets in Bawi Mang a baan ah hliamh

Ralkap le Palek nih rubber bullets in Bawi Mang a baan ah hliamh
=============================
March 24, 8:00 PM hrawng in Hakha Khuathar BOC kiang, Innwa Bank le CB Bank (Bank then) hrawng in Golf Club lampial tiang hrawng tear-gas an kah, khairiat-kuan (rubber bullets) in an kah hna i Bawi Mang cu a baan hmun thum ah an khen, tiah kan theih.

Bawi Mang cu siikhaan ah an kalpi. Tlaih mi minung pathum an si lai tiah ruah mi chung in minung 2 cu an thlah cang hna. Chin Oo Sii in Golf Club lampial tiang a himlo, meithal an puah cuahmah, tiah kan theih. Ralkap nih Hakha Kokkun le Chin Oo Sii karlak ah mino an dawi hna. Meithal voi hnih an puah. An tlaih hna le tlaih hna lo a fiang rih lo. Atu hi ralkap an i chawk i an kawl cuahmah hna, tiah kan theih.

Hakha Khuathar BOC kuaih, Innwa Bank pawng hrawng ah Ralkap le Palek nih March 24, 8:30 PM tiang ah minung 3 an tlaih cang hna. Innwa le CB Bank (Bank then) in Golf Club lampial tiang tear-gas an kah cuahmah. Meithal zong an puah len, tiah kan theih. Credit: The Hakha Times

Tuzaan thil cang kongah. Zuurit le zuuri sual phawt mawhchiat thangchiat soisel len a herhnak le aa dawhcahnak le sullam a ngeihnak zeihmanh ka hmu kho rih lo. An tlaihmi zuuri hi zeitin an va um ruangah dah an tlaih hna a si ti kan hngal kho rih lo. Ralkap le palek nih hin zuurit le zuuri kha an huat an ral ruang I an tlaih hna khi a si hrimhrim lai lo; mipi an kan huat, an kan ral, an kan sel le tlaihkhih an kan duh hrimhrim bia khi a si kho.

Zuuri kan tlaih hna lai I mipi nih chuah hnawh hna seh law, mi tampi tlai hna usih ti khi an I timhmi a si hrimhrim lai ti ka ruat. Silent Stike kan tuah ni a zaan, ralkap le palek an I funtom dan, Rubber bullet le mitthli thlaknak smoke hna an thlah ti kong an chim ning ka ruah tikah ka lung a hring.