July 13 lio ahkhan Timit le Thantlang kar Auto tlang cu, ralhrang 200 tluk nih an fuh tiah kan theih. Hakha in Timit/Thantlang lei an rak kal termi ralhrang hi, battalion 5 an si i, battalion pakhatah hraang 70/90 kar an si lai tiah an zumh.
Ralhrang battalion pakhat ah minung zeizat set dah um tihi anmah ralhrang sen 2/3 pawl hmanh nih an theifiang kho ti lo. Kan ralkap pawl hna caah Mipi nih thlacam piak an herh peng ve rih ko. Credit: Salai William
Relchap: Tuzing Timit Le Vankham Tlang Kahdohnak ah Chin Ralkap 3 Nunnak Liam 7 Liam An Tuar, SAC Ralkap 10 Renglo An Thi, Hliamtuar An Tam Chin ramkulh, Hakha Timit le Vankham tlang karah Chin ralkap le SAC ralkap hna cu nihin July 18 zinglei ah an i kap, tiah theih a si.
“SAC ralkap hi Hakha lei in a ra mi an si i 150 leng cu an si lai. Nihin July 18 zinglei ah Timit le Vankham tlang karah kaphnih in kan i kap. SAC ralkap nih hriamngan in an kan kah tuk caah Chin ralkap lei in ralkap 7 hrawng hliamhma an pu i, 3 an nunnak a liam,” tiah Chin ralkap pakhat nih The Chin Post ah a chim.
Nunnak a liam mi hi CDF-Thantlang Battalion-1 in Salai Zo Ram Thang le Salai Cung Lian Uk an si i pakhat cu CNA in a si tiah kan theih. SAC ralkap a thi mi 10 renglo an si i hliamtuar an tam ngai tiah, Chin ralkap pakhat nih The Chin Post ah a chimchap. Timit lei in rallam a sial mi SAC ralkap hna cu Thantlang ah kal aa tim mi an si. Tutan kahdohnak hi SAC ralkap nih an fuh hmasa mi hna a si tiah kan theih. Credit: TCP
Relchap: NUG Nih US Cozah Sinah Dollar Million 500 Leng Bawmh A Hal NUG nih Myanmar ramchung ralhrial hna ca ah hriamnam a si lomi bawmhnak pe dingin US cozah cu dollar million 500 leng bawmh a hal, tiah VOA nih a langhter.
Ralhriam a si lomi drone, motor, ngiathlainak thilri leng ah khat le khat i pehtlaihnak seh thilri cawknak ca ah dollar million 200 le kahdohnak ruangah a zaammi minung 1.5 million hna ca ah NUG nih US cu dollar 525 million bawmhnak a hal.
Sinain Russia-Ukraine kahdohnak le Tuluk tlerhkhawnnak a linhsat tuk lio a si ruangah Myanmar ram dohthlennak thawngpang cu media ah a lang lo ngai i, atu dirhmun ah NUG nih a halmi thilri hna cu ralram hman khawh mi phun an si caah bawmhnak pek dingah a fawi lo ngaimi a sinak kong kherhhlaitu hna nih VOA ah an chim ve.
“SAC ralkap nih rammi a nuai in harnak an pek hna i nifatin in innlo an khangh ruangah inn khanghpiak a tongmi hna ca ah US lawng si loin International Community hna le cozah dang hna sin zong ah bawmhnak kan hal zungzal,” tiah NUG President zung in chimphuannak nawlngeitu Kyaw Zaw nih a chim.
US nih a luancia kum December thla lioah 2023 kum ca ah National Defense Authorization Act(NDAA) cu fehternak an rak tuah. Cu Act chung ah cun NUG, PDF le tlangcung hriamtlai EAOs hna telh in Democracy hmuh khawh nak ding ca ah dohthlennak a tuahtu phu vialte cu fimthiamnak le hriamnam a si lomi bawmhnak pek ding kong aa tel.
